CopSahBible2 - Sirach - 30

30:1  ⲡⲉⲧⲙⲉ ⲙⲡⲉϥϣⲏⲣⲉ ϥⲛⲁⲧⲁϣⲉϩⲓⲟⲩⲉ ⲉⲣⲟϥ ϫⲉ ⲉϥⲉⲉⲩⲫⲣⲁⲛⲉ ϩⲛ ⲧⲉϥϩⲁⲏ

30:2  ⲡⲉⲧϯⲥⲃⲱ ⲙⲡⲉϥϣⲏⲣⲉ ϥⲛⲁϫⲓⲉⲟⲟⲩ ⲛϩⲏⲧϥ ⲁⲩⲱ ϥⲛⲁϣⲟⲩϣⲟⲩ ⲙⲙⲟϥ ϩⲓⲱⲱϥ ϩⲛ ⲧⲙⲛⲧⲉ ⲛⲛⲉⲧⲥⲟⲟⲩⲛ ⲙⲙⲟϥ

30:3  ⲡⲉⲧϯⲥⲃⲱ ⲙⲡⲉϥϣⲏⲣⲉ ϥⲛⲁϯⲕⲱϩ ⲛⲛⲉϥϫⲁϫⲉ ⲁⲩⲱ ϥⲛⲁⲧⲉⲗⲏⲗ ⲉⲧⲃⲏⲧϥ [ⲙⲡⲉⲙⲧⲟ] ⲉⲃⲟⲗ ⲛⲛⲉϥϣⲃⲉⲉⲣ

30:4  ⲉⲣϣⲁⲛⲡⲉϥⲉⲓⲱⲧ ⲙⲟⲩ ⲉϥⲛⲁⲣⲑ[ⲉ ⲙ]ⲡⲉⲧⲉ ⲙⲡϥⲙⲟⲩ ϫⲉ ⲁϥⲕⲱ ⲛⲥⲱϥ ⲙⲡⲉⲧⲉⲓⲛⲉ ⲙⲙⲟϥ

30:5  ⲁϥⲛⲁⲩ ⲉϫⲛ ⲡⲉϥⲱⲛϩ ⲁϥⲉⲩⲫⲣⲁⲛⲉ ⲁⲩⲱ ⲙⲡⲉϥⲗⲩⲡ[ⲓ …]ⲛⲁⲙⲟⲩ

30:6  ϫⲉ ⲁϥⲕⲱ ⲛⲟⲩⲧⲁⲓⲕⲃⲁ ⲙⲡⲉⲙⲧⲟ ⲉⲃⲟⲗ ⲛⲛⲉϥϫⲁϫⲉ ⲁⲩⲱ ⲟⲩⲧⲁⲓⲭⲁⲣⲓⲥ ⲛⲛⲉϥϣⲃⲉⲉⲣ

30:7  ⲉⲧⲃⲉ ⲧⲉⲯⲩⲭⲏ ⲛⲛⲉϥϣⲏⲣⲉ ϥⲛⲁⲙⲟⲩⲣ ⲛⲛⲉⲩⲥⲁϣ ⲁⲩⲱ ⲛⲉϥⲙⲛⲧϣⲁⲛϩⲧⲏϥ ⲛⲁϣⲧⲟⲣⲧⲣ ⲉϫⲛ ⲡⲉⲩⲁϣⲕⲁⲕ ⲧⲏⲣϥ

30:8  ϣⲁⲣⲉⲟⲩϩⲧⲟ ⲉⲙⲡⲟⲩⲥⲟⲙϥ ⲉⲓ ⲉⲃⲟⲗ ⲉϥⲛⲁϣⲧ ⲁⲩⲱ ϣⲁⲣⲉⲟⲩϣⲏⲣⲉ ⲉⲁⲩⲕⲁϫⲏⲣ ⲉⲃⲟⲗ ⲛⲥⲱϥ ⲉⲓ ⲉⲃⲟⲗ ⲉϥⲁⲥⲱⲟⲩ

30:9  ϣⲉⲡϣⲡⲡⲉⲕϣⲏⲣⲉ ⲧⲁⲣⲉϥϣⲧⲣⲧⲱⲣⲕ ⲥⲱⲃⲉ ⲛⲙⲙⲁϥ ⲧⲁⲣⲉϥϯⲗⲩⲡⲏ ⲛⲁⲕ

30:10  ⲙⲡⲣⲥⲱⲃⲉ ⲛⲙⲙⲁϥ ϫⲉ ⲛⲉⲕⲙⲕⲁϩ ⲛϩⲏⲧ ⲉϫⲱϥ ⲁⲩⲱ ⲛϥϯⲛⲟⲩϣⲥ ⲛⲛⲉⲕⲛⲁϫⲉ ⲛⲑⲁⲏ

30:11  ⲙⲡⲣϯⲉⲝⲟⲩⲥⲓⲁ ⲛⲁϥ ϩⲛ ⲧⲉϥⲙⲛⲧⲕⲟⲩⲓ

30:12  ⲗⲱϫϩ ⲛⲛⲉϥⲥⲡⲓⲣⲟⲟⲩⲉ ⲉⲛϩⲟⲥⲟⲛ ⲉⲩⲕⲟⲩⲓ ⲡⲉ ϫⲉⲕⲁ[ⲥ ⲛⲛⲉ]ϥⲣ ⲛⲟϭ ⲛϥⲣⲁⲧⲥⲱⲧⲙ ⲛⲥⲱⲕ

30:13  ϯⲥⲃⲱ ⲙⲡⲉⲕϣⲏⲣⲉ ⲛⲅⲣϩⲱⲃ ⲛϩⲏⲧϥ ϫⲉⲕⲁⲁⲥ ⲛⲛⲉⲕϫⲓϫⲣⲟⲡ ϩⲙ ⲡⲉϥϣⲓⲡⲉ

30:14  ⲛⲁⲛⲟⲩ ⲟⲩϩⲏⲕⲉ ⲉϥⲙⲟⲧⲛ ⲉϥϭⲙϭⲟⲙ ϩⲙ ⲡⲉϥⲥⲱⲙⲁ ⲉϩⲟⲩⲉ ⲟⲩⲣⲱⲙⲉ ⲛⲣⲙⲙⲁⲟ ⲉϥϣⲱⲛⲉ ϩⲙ ⲡⲉϥⲥⲱⲙⲁ

30:15  ϥⲥⲟⲧⲡ ⲛϭⲓ ⲟⲩⲙⲧⲟⲛ ⲙⲛ ⲟⲩⲟⲩϫⲁⲓ ⲉϩⲟⲩⲉ ⲛⲟⲩⲃ ⲛⲓⲙ ⲁⲩⲱ ⲟⲩⲥⲱⲙⲁ ⲉϥⲙⲟⲧⲛ ⲉϩⲟⲩⲉ ⲟⲩⲙⲛⲧⲣⲙⲙⲁⲟ ⲉⲙⲛⲧⲥ ⲁⲣⲏϫⲥ

30:16  ⲛⲁⲛⲟⲩ ⲧⲙⲛⲧⲣⲙⲙⲁⲟ ⲁⲛ ⲉϩⲟⲩⲉ ⲟⲩⲥⲱⲙⲁ ⲉϥⲟⲩⲟϫ ⲁⲩⲱ ⲙⲛ ⲟⲩⲛⲟϥ ⲥⲟⲧⲡ ⲉⲡⲟⲩⲛⲟϥ ⲙⲫⲏⲧ

30:17  ⲛⲁⲛⲟⲩ ⲡⲙⲟⲩ ⲉϩⲟⲩⲉ ⲟⲩϭⲓⲛⲱⲛϩ ⲉⲥϩⲟⲟⲩ ⲁⲩⲱ ⲉϩⲟⲩⲉ ⲟⲩϣⲱⲛⲉ ⲉϥⲙⲏⲡ ⲉⲃⲟⲗ ⲉⲧⲃⲉ ϭⲓⲛⲟⲩⲱⲙ

30:18  [ⲟ]ⲩ ⲡⲉ ⲫⲏⲩ ⲛϩⲉⲛⲁⲅⲁⲑⲟⲛ ⲉⲩⲡⲁϩⲧ ⲉϫⲛ ⲟⲩⲧⲁⲡⲣⲟ ⲉⲥϣⲟⲧⲙ ⲙⲛ ϩⲛϭⲓⲛⲟⲩⲟⲟⲙ ⲉⲩϩⲟⲣϭ ⲉϫⲛ ⲟⲩⲧⲁⲫⲟⲥ

30:19  ⲁⲩⲱ ⲟⲩⲧⲁⲗⲟ ⲛⲉⲓⲇⲱⲗⲟⲛ ⲟⲩⲧⲉ ⲅⲁⲣ ⲙⲉϥⲟⲩⲱⲙ ⲟⲩ[ⲧⲉ ⲙⲉϥϣⲱⲗ]ⲙ ⲧⲁⲓ ⲧⲉ ⲑⲉ ⲙⲡⲉⲧⲉⲣⲉⲡϫⲟⲉ[ⲓⲥ …] ⲛϩⲏⲧϥ

30:20  ⲉϥϭⲱϣⲧ ⲉⲣⲟⲟⲩ ϩⲛ ⲛⲉϥⲃⲁⲗ ⲉϥⲁϣ[ⲁ]ϩ[ⲟ]ⲙ ⲛⲑⲉ ⲛⲟⲩⲥⲓⲟⲩⲣ ⲉϥϩⲟⲗϭ ⲉⲩⲡⲁⲣⲑⲉⲛⲟⲥ ⲉϥⲁϣⲁϩⲟⲙ

30:21  ⲙⲡⲣϯⲡⲉⲕϩⲏⲧ ⲉⲩⲗⲩⲡⲏ ⲁⲩⲱ ⲙⲡⲣⲑⲗⲓⲃⲉ ⲙⲙⲟⲕ ϩⲙ ⲡⲉⲕϣⲟϫⲛⲉ

30:22  ⲡⲟⲩⲛⲟϥ ⲙⲫⲏⲧ ⲡⲉ ⲡⲱⲛϩ ⲙⲡⲣⲱⲙⲉ ⲁⲩⲱ ⲟⲩⲧⲉⲗⲏⲗ ⲙⲡⲣⲱⲙⲉ ⲡⲉ ⲟⲩⲛⲟϭ ⲛⲁϩⲉ

30:23  ⲥⲗⲥⲗⲧⲉⲕⲯⲩⲭⲏ ⲛⲅⲡⲁⲣⲁⲕⲁⲗⲉⲓ ⲙⲡⲉⲕϩⲏⲧ ⲁⲩⲱ ⲙⲁⲣⲉⲧⲗⲩⲡⲏ ⲟⲩⲉ ⲛⲥⲁⲃⲟⲗ ⲙⲙⲟⲕ ⲁⲧⲗⲩⲡⲏ ⲅⲁⲣ ⲧⲁⲕⲉϩⲁϩ ⲁⲩⲱ ⲙⲛϩⲏⲩ ⲛϩⲏⲧⲥ

30:24  ϣⲁⲣⲉⲟⲩⲕⲱϩ ⲙⲛ ⲟⲩϭⲱⲛⲧ ⲧⲥⲃⲕⲉ ⲛⲉϩⲟⲟⲩ ⲁⲩⲱ ϣⲁⲣⲉⲡⲣⲟⲟⲩϣ ⲉⲓⲛⲉ ⲛⲧⲙⲛⲧϩⲗⲗⲟ ϩⲁⲑⲏ ⲙⲡⲉⲥⲟⲩⲟⲉⲓϣ

30:25  ⲛⲑⲉ ⲙⲡⲉⲧⲥⲣⲓⲧ ϩⲓⲡⲁϩⲟⲩ ⲛⲛⲉⲧϫⲱⲱⲗⲉ ⲁⲩⲱ ⲁⲓⲙⲉϩⲧⲁϩⲣⲱⲧ ⲛⲑⲉ ⲙⲡⲉⲧϫⲱⲱⲗⲉ ⲁⲓⲡⲱϩ ϩⲙ ⲡⲉⲥⲙⲟⲩ ⲙⲡϫⲟⲉⲓⲥ

30:26  ⲁⲛⲁⲩ ϫⲉ ⲛⲧⲁⲓϣⲡϩⲓⲥⲉ ⲛⲁⲓ ⲙⲁⲩⲁⲁⲧ ⲁⲗⲗⲁ ⲛⲟⲩⲟⲛ ⲛⲓⲙ ⲉⲧϣⲓⲛⲉ ⲛⲥⲁ ⲧⲉⲥⲃⲱ

30:27  [ⲥⲱⲧⲙ ⲉⲣⲟⲓ] ⲛⲁⲡⲏⲩⲉ ⲙⲡⲗⲁⲟⲥ [ⲁⲩⲱ] ⲛⲛⲟϭ ⲛⲛⲉⲕⲕⲗⲏⲥⲓⲁ ϫⲓⲥⲙⲏ

30:28  [ⲙⲡⲣ]ϯϩⲧⲟⲣ ⲙⲡⲉⲕϣⲏⲣⲉ ⲙⲛ ⲧⲉⲕⲥϩⲓⲙⲉ ⲁⲩⲱ ⲡⲉⲕⲥⲟⲛ ⲙⲛ ⲡⲉⲕϣⲃⲏⲣ ⲉϩⲣⲁⲓ ⲉϫⲱⲕ ⲉⲕⲟⲛϩ ⲙⲡⲣϯⲡⲉⲕⲭⲣⲏⲙⲁ ⲛⲕⲉⲟⲩⲁ ϫⲉ ⲛⲉⲕⲣϩⲧⲏⲕ ⲛⲅⲥⲟⲡⲥ ⲉⲧⲃⲏⲧⲟⲩ

30:29  ⲉⲛϩⲟⲥⲟⲛ ⲉⲕⲟⲛϩ ⲉⲩⲛⲛⲓϥⲉ ⲛϩⲏⲧⲕ ⲙⲡⲣⲧⲁⲛϩⲟⲩⲧⲕ ⲙⲡⲥⲁⲣⲝ ⲛⲓⲙ

30:30  ⲛⲁⲛⲟⲩⲥ ⲅⲁⲣ ⲉⲧⲣⲉⲛⲉⲕϣⲏⲣⲉ ⲧⲟⲃϩⲕ ⲉϩⲟⲩⲉ ϭⲱϣⲧ ⲉⲧⲟⲟⲧⲟⲩ ⲛⲛⲉⲕϣⲏⲣⲉ

30:31  ϣⲱⲡⲉ ⲉⲕϫⲟⲥⲉ ⲉⲣⲟⲟⲩ ϩⲛ ⲛⲉⲕϩⲃⲏⲩⲉ ⲧⲏⲣⲟⲩ ⲙⲡⲣϯⲧⲱⲗⲙ ⲙⲡⲉⲕⲉⲟⲟⲩ

30:32  ϩⲛ ⲑⲁⲏ ⲛⲛⲉϩⲟⲟⲩ ⲙⲡⲉⲕⲱⲛϩ ⲁⲩⲱ ϯ ⲛⲧⲉⲕⲕⲗⲏⲣⲟⲛⲟⲙⲓⲁ ⲙⲡⲉⲟⲩⲟⲉⲓϣ ⲙⲡⲉⲕⲙⲟⲩ

30:33  ϯⲧⲱϩ ϩⲓ ϭⲉⲣⲱⲃ ϩⲓ ⲉⲧⲡⲱ ⲛⲟⲩⲉⲓⲱ ⲁⲩⲱ ⲟⲩⲟⲉⲓⲕ ⲙⲛ ⲟⲩⲥⲃⲱ ⲙⲛ ⲟⲩϩⲱⲃ ⲛⲟⲩϩⲙϩⲁⲗ

30:34  ⲁⲣⲓϩⲱⲃ ϩⲛ ⲡⲉⲕϩⲙϩⲁⲗ ⲧⲁⲣⲉⲕϩⲉ ⲉⲩⲙⲧⲟⲛ ⲃⲉϣⲧⲟⲟⲧⲕ ⲛⲁϥ ⲧⲁⲣⲉϥϣⲓⲛⲉ ⲛⲥⲁ ⲟⲩⲙⲛⲧⲣⲙϩⲉ

30:35  ϣⲁⲣⲉⲟⲩⲛⲁϩⲃ ⲙⲛ ⲟⲩⲙⲟⲩⲥ ⲕⲗϫⲟⲩⲙⲁⲕϩ ⲁⲩⲱ ϩⲛⲙⲟⲕϩⲥ ⲙⲛ ϩⲛⲃⲁⲥⲁⲛⲟⲥ ⲛⲟⲩϩⲙϩⲁⲗ ⲉϥϩⲟⲟⲩ

30:36  ⲛⲟϫϥ ⲉⲩϩⲱⲃ ϫⲉ ⲛⲛⲉϥⲟⲩⲱⲥϥ

30:37  ϣⲁⲣⲉⲡⲟⲩⲱⲥϥ ⲅⲁⲣ ⲧⲥⲁⲃⲟⲟⲩ ⲉⲩⲛⲟϭ ⲛⲕⲁⲕⲓⲁ

30:38  ⲛⲟϫϥ ⲉⲩϩⲱⲃ ⲛϣⲟⲩⲣⲟϥ ⲉϥⲧⲙⲥⲱⲧⲙ ⲙⲁⲧⲁϣⲉ ⲛⲉϥⲡⲁⲓⲇⲉⲥ ⲁⲩⲱ ⲙⲡⲣⲣϩⲟⲩⲟ ⲙⲛ ⲥⲁⲣⲝ ⲛⲓⲙ ⲁⲩⲱ ⲙⲡⲣⲣⲗⲁⲁⲩ ⲁϫⲛ ϫⲛⲟⲩⲕ

30:39  ⲉϣϫⲉ ⲟⲩⲛⲧⲕ ϩⲙϩⲁⲗ ⲙⲁⲣⲉϥⲣⲧⲉⲕϩⲉ ϫⲉ ⲛⲧⲁⲕⲕⲁⲁϥ ⲛⲁⲕ ϩⲛ ⲟⲩⲥⲛⲟϥ ⲉϣϫⲉ ⲟⲩⲛⲧⲕ ϩⲙϩⲁⲗ ⲁⲛⲓϥ ⲛⲉⲙⲁⲕ ⲉϩⲣⲁⲓ ϩⲱⲥ ⲥⲟⲛ ⲛⲅⲙⲟⲣϥ ⲉⲣⲟⲕ ⲛⲑⲉ ⲛⲧⲉⲕⲯⲩⲭⲏ

30:40  ⲉⲕϣⲁⲛⲑⲙⲕⲟϥ ϥⲛⲁⲧⲱⲟⲩⲛ ⲛϥⲡⲱⲧ ⲁⲩⲱ ⲉⲕⲛⲁϣⲓⲛⲉ ⲛⲥⲱϥ ϩⲛ ⲁϣ ⲛϩⲓⲏ