CopSahBible2 - Sirach - 20

20:1  ⲟⲩⲛϫⲡⲓⲟ ⲉⲛⲉⲥⲱϥ ⲁⲛ ⲁⲩⲱ ⲟⲩⲛⲡⲉⲧⲕⲱ ⲛⲣⲱϥ ⲉⲩⲥⲁⲃⲉ ⲡⲉ

20:2  ⲉϣϫⲉ ⲛⲁⲛⲟⲩϫⲡⲓⲟ ⲉϩⲟⲩⲟ ⲉϭⲱⲛⲧ

20:3  ⲁⲩⲱ ⲡⲉⲧⲣϩⲧⲏϥ ⲛⲁⲁⲙⲁϩⲧⲉ ⲙⲙⲟϥ ⲉⲡⲛⲟⲃⲉ

20:4  ⲛⲑⲉ ⲛⲧⲉⲡⲓⲑⲩⲙⲓⲁ ⲛⲟⲩⲥⲓⲟⲩⲣ ⲉⲣⲟⲩⲡⲁⲣⲑⲉⲛⲟⲥ ⲛⲥϩⲓⲙⲉ ⲧⲁⲓ ⲧⲉ ⲑⲉ ⲙⲡⲉⲧⲉⲓⲣⲉ ⲛⲛⲉϩⲃⲏⲩⲉ ⲛϭⲟⲛⲥ

20:5  ⲟⲩⲛⲡⲉⲧⲕⲱ ⲛⲣⲱϥ ⲉϣⲁⲩϩⲉ ⲉⲣⲟϥ ⲛⲥⲁⲃⲉ ⲁⲩⲱ ⲟⲩⲛⲡⲉϣⲁⲩⲙⲉⲥⲧⲱϥ ⲉⲧⲃⲉ ⲧⲉϥⲙⲛⲧϩⲁϩ ⲛϣⲁϫⲉ

20:6  ⲟⲩⲛⲡⲉⲧⲕⲱ ⲛⲣⲱϥ ⲉⲙⲛⲧϥϣⲁϫⲉ ⲙⲙⲁⲩ ⲉϫⲱ ⲁⲩⲱ ⲟⲩⲛⲡⲉⲧⲕⲱ ⲛⲣⲱϥ ⲉϥϭⲱϣⲧ ⲉⲡⲉⲟⲩⲟⲉⲓϣ ⲛϣⲁϫⲉ

20:7  ⲟⲩⲣⲱⲙⲉ ⲛⲥⲁⲃⲉ ϣⲁϥⲕⲁⲣⲱϥ ϣⲁ ⲡⲉⲟⲩⲟⲉⲓϣ ϣⲁϥⲣ[]ⲉⲟⲩⲟⲉⲓϣ

20:8  [ⲡⲉⲧ]ⲟ ⲛϩⲁϩ ⲛϣⲁϫⲉ ϣⲁⲩϥⲱ[ⲧⲉ] ⲁⲩⲱ ⲡⲉϯⲣⲉ ⲙⲡⲉϥϩⲧⲟⲣ ⲥⲉ[ⲛⲁⲙⲉ]ⲥⲧⲱϥ

20:9  ⲟⲩⲛⲟⲩⲥⲟⲟⲩⲧⲛ ⲙⲡⲣⲱⲙⲉ [ϩⲛ] ⲛⲉϥⲡⲉⲧⲛⲁⲛⲟⲩⲟⲩ ⲁⲩⲱ ⲟⲩⲛⲟⲩϭⲓⲛⲉ ϣⲟⲟⲡ ⲉⲩϣⲱⲱⲧ ⲡⲉ

20:10  ⲁⲩⲱ ⲟⲩⲛⲟⲩϯ ⲉⲛϥⲣⲛⲟϥⲣⲉ ⲛⲁⲕ ⲁⲛ ⲁⲩⲱ ⲟⲩⲛⲟⲩϯ ⲉⲣⲉⲡⲉϥⲧⲱⲱⲃⲉ ⲕⲏⲃ

20:11  ⲟⲩⲛⲡⲉⲧⲣϭⲣⲱϩ ϫⲉ ⲁⲩϯⲉⲟⲟⲩ ⲛⲁϥ ⲁⲩⲱ ⲟⲩⲛⲡⲉⲛⲧⲁϥϫⲓⲥⲉ ⲉⲃⲟⲗ ϩⲙ ⲡⲉϥⲑⲃⲃⲓⲟ

20:12  ⲟⲩⲛⲡⲉⲧϣⲉⲡϩⲁϩ ϩⲁ ⲟⲩⲕⲟⲩⲓ ⲁⲩⲱ ⲛϥⲧⲟⲟⲃⲟⲩ ⲛⲥⲁϣϥ ⲛⲕⲱⲃ

20:13  ⲡⲥⲟⲫⲟⲥ ϩⲛ ⲛⲉϥϣⲁϫⲉ ϣⲁϥⲧⲣⲉⲩⲙⲉⲣⲓⲧϥ ⲛⲉⲭⲁⲣⲓⲥ ⲇⲉ ⲛⲛⲥⲟϭ ⲛⲁⲡⲱⲱⲛⲉ ⲉⲃⲟⲗ

20:14  ⲙⲛϯ ⲛⲁⲑⲏⲧ ⲛⲁⲣⲛⲟϥⲣⲉ ⲛⲁⲕ ϩⲁϩ ⲅⲁⲣ ⲛⲉ ⲛⲉϥⲃⲁⲗ ⲉⲡⲙⲁ ⲛⲟⲩⲁ

20:15  ϥⲛⲁϯ ⲛⲁⲕ ⲛϩⲛⲕⲟⲩⲓ ⲛϥϫⲡⲓⲟⲕ ⲉⲙⲁⲧⲉ ⲛϥⲟⲩⲏⲛ ⲛⲣⲱϥ ⲉϫⲱⲕ ⲛⲑⲉ ⲛⲟⲩⲕⲏⲣⲩⲝ ϥⲛⲁϯⲛⲁⲕⲥⲉ ⲙⲡⲟⲟⲩ ⲛϥⲧⲟⲕⲥⲉ ⲛⲣⲁⲥⲧⲉ ⲟⲩⲙⲉⲥⲧⲉ ⲡⲉ ⲡⲉⲓⲣⲱⲙⲉ ⲛⲧⲉⲓϩⲉ

20:16  ϣⲁⲣⲉⲡⲥⲟϭ ϫⲟⲟⲥ ϫⲉ ⲙⲛϯϣⲃⲏⲣ ⲁⲩⲱ ⲙⲛϩⲙⲟⲧ ϣⲟⲟⲡ ⲛⲛⲁⲡⲉⲧⲛⲁⲛⲟⲩⲟⲩ

20:17  ⲉⲩϩⲟⲟⲩ ϩⲛ ⲛⲉⲩⲗⲁⲥ ⲛϭⲓ ⲛⲉⲧⲟⲩⲱⲙ ⲛⲛⲁⲟⲉⲓⲕ ϩⲁϩ ⲛⲥⲟ[ⲡ ⲟⲩ]ⲛⲟⲩⲙⲏⲏϣⲉ ⲛⲁⲥⲱⲃⲉ ⲛⲥⲱϥ

20:18  ⲛⲁⲛⲟⲩ…ⲙⲡⲕⲁϩ ⲉϩⲟⲩⲟ ⲉ…ⲗⲁ[ⲥ] ⲧⲁⲓ ⲧⲉ ⲑ[ⲉ ⲉ]ⲧⲉⲣⲉⲡⲉϩⲧⲟⲡ ⲛⲛⲉⲑⲟ[ⲟⲩ] ⲛⲏⲩ ϩⲛ ⲟⲩϭ[ⲉⲡⲏ]

20:19  ⲟⲩⲣⲱⲙⲉ ⲛⲁⲧϩⲙⲟⲧ ⲟⲩϣⲁϫⲉ ⲡⲉ [ⲛⲁⲧ]ⲟⲩⲟⲉⲓϣ ⲉϥⲛⲁⲁϣⲁⲓ ϩⲛ ⲣⲱⲟⲩ ⲛⲛⲁⲧⲥⲃⲱ

20:20  ϣⲁⲩⲥⲧⲟ ⲉⲃⲟⲗ ⲛⲧⲡⲁⲣⲁⲃⲟⲗⲏ ϩⲛ ⲣⲱϥ ⲙⲡⲥⲟϭ ⲛⲛⲉϥϫⲟⲟⲥ ⲅⲁⲣ ⲙⲡⲉⲥⲟⲩⲟⲉⲓϣ

20:21  ⲟⲩⲛⲡⲉⲧⲉⲛϥⲣⲛⲟⲃⲉ ⲁⲛ ⲉⲧⲃⲉ ⲧⲉϥⲙⲛⲧϩⲏⲕⲉ

20:22  ⲟⲩⲛⲡⲉϣⲁϥⲥⲉⲣⲙⲧⲉϥⲯⲩⲭⲏ ⲉⲧⲃⲉ ϣⲓⲡⲉ ⲁⲩⲱ ⲛϥⲧⲁⲕⲟ ⲉⲧⲃⲉ ϫⲓϩⲟ

20:23  ⲟⲩⲛⲡⲉϣⲁϥⲉⲣⲏⲧ ⲙⲡⲉϥϣⲃⲏⲣ ⲉⲧⲃⲉ ⲡϣⲓⲡⲉ

20:24  ⲟⲩϫⲃⲓⲛ ⲉϥϩⲟⲟⲩ ⲡⲉ ⲡϭⲟⲗ ϩⲙ ⲡⲣⲱⲙⲉ ⲉϥⲛⲁⲁϣⲁⲓ ϩⲛ ⲧⲧⲁⲡⲣⲟ ⲛⲛⲁⲧⲥⲃⲱ

20:25  ⲛⲁⲛⲟⲩⲟⲩⲣⲉϥϩⲱϥⲧ ⲉϩⲟⲩⲉ ⲟⲩⲣⲉϥⲁϣⲁⲓ ⲛϫⲓϭⲟⲗ ⲉⲩⲛⲁⲕⲗⲏⲣⲟⲛⲟⲙⲓ ⲇⲉ ⲙⲡⲧⲁⲕⲟ ⲙⲡⲉⲥⲛⲁⲩ

20:26  ⲟⲩⲥⲱϣ ⲡⲉ ⲫⲏⲧ ⲙⲡⲣⲱⲙⲉ ⲛⲣⲉϥϫⲓϭⲟⲗ ⲁⲩⲱ ⲡⲉϥϣⲓⲡⲉ ⲟϣ ⲛⲉⲙⲁϥ

20:27  ϣⲁⲣⲉⲡⲥⲟⲫⲟⲥ ϩⲛ ⲛⲉϥϣⲁϫⲉ ϩⲟⲛϥ ⲉϩⲟⲩⲛ ⲁⲩⲱ ⲟⲩⲣⲱⲙⲉ ⲛⲥⲁⲃⲉ ϣⲁϥⲁⲣⲉⲥⲕⲉ ⲛ…

20:28  ⲡⲉⲧⲣϩⲱⲃ ⲉⲡⲉϥⲕⲁϩ ϥ……… ⲁⲩⲱ ⲡⲉⲧⲁⲣⲉⲥⲕⲉ ⲛϩⲛⲁ… ⲉϥⲛⲁⲣ… ⲉϫⲓⲛϭⲟⲛⲥ

20:29  ⲛⲧⲁⲉⲓⲟ ⲙⲛ ⲛⲇⲱⲣⲟⲛ ϣⲁ[ⲩⲧⲟ]ⲙⲛⲃⲁⲗ [ⲛ]ⲛⲥⲟⲫⲟⲥ ⲁⲩⲱ ϣⲁⲩⲕⲧⲟ ⲉⲃⲟⲗ ⲛⲟⲩϫⲡⲓⲟ ⲛⲑⲉ [ⲛ]ⲟⲩϣⲧⲟⲃ ⲉϥϩⲛ ⲟⲩⲧⲁⲡⲣⲟ

20:30  ⲟⲩⲥⲟⲫⲓⲁ ⲉⲥϩⲏⲡ ⲙⲛ ⲟⲩⲁϩⲟ ⲉⲛϥⲟⲩⲟⲛϩ ⲉⲃⲟⲗ ⲁⲛ ⲟⲩ ⲡⲉ ⲡⲉⲩϩⲏⲩ ⲙⲡⲉⲥⲛⲁⲩ

20:31  ⲛⲁⲛⲟⲩⲟⲩⲣⲱⲙⲉ ⲉϥϩⲱⲡ ⲛⲧⲉϥⲙⲛⲧⲥⲟϭ ⲉϩⲟⲩⲟ ⲉⲟⲩⲁ ⲉϥϩⲱⲡ ⲛⲧⲉϥⲙⲛⲧⲥⲁⲃⲉ -