CopSahBible2 - Sirach - 36

36:1  ⲙⲛⲡⲉⲑⲟⲟⲩ ⲛⲁⲧⲱⲙⲛⲧ ⲉⲡⲉⲧⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲁⲗⲗⲁ ϥⲛⲁⲣⲡⲕⲉⲧⲟⲩϫⲟϥ ϩⲛ ⲡⲉϥⲡⲓⲣⲁⲥⲙⲟⲥ

36:2  ⲛⲛⲉⲟⲩⲣⲱⲙⲉ ⲛⲥⲟⲫⲟⲥ ⲙⲉⲥⲧⲉⲡⲛⲟⲙⲟⲥ ⲡⲉⲧϩⲩⲡⲟⲕⲣⲓⲛⲉ ⲇⲉ ⲛϩⲏⲧϥ ⲉϥⲟ ⲛⲑⲉ ⲛⲟⲩϫⲟⲓ ϩⲛ ⲟⲩϩⲁⲧⲏⲩ

36:3  ϣⲁⲣⲉⲟⲩⲣⲱⲙⲉ ⲛⲥⲁⲃⲉ ⲡⲓⲥⲧⲉⲩⲉ ⲉⲡⲛⲟⲙⲟⲥ ⲁⲩⲱ ⲡⲛⲟⲙⲟⲥ ⲛϩⲟⲧ ⲛⲁϥ ⲛⲑⲉ ⲙⲡⲉⲧⲟⲩϣⲓⲛⲉ ⲙⲙⲟϥ ⲉϥϫⲱ ⲙⲙⲟϥ

36:4  ⲥⲃⲧⲉⲡⲉⲕϣⲁϫⲉ ⲧⲁⲣⲟⲩⲥⲟⲧⲙⲉϥ ⲙⲣⲧⲉⲕⲥⲃⲱ ⲧⲟⲧⲉ ⲛⲅϣⲁϫⲉ

36:5  ⲛⲑⲉ ⲛⲟⲩⲕⲟⲧ ⲛⲁϭⲟⲗⲧⲉ ⲡⲉ ⲡⲥⲁ ⲛϩⲟⲩⲛ ⲛⲟⲩⲥⲟϭ ⲁⲩⲱ ⲉⲣⲉⲡⲉϥⲙⲉⲉⲩⲉ ⲟ ⲛⲑⲉ ⲛⲟⲩⲁⲝⲱⲛ ⲉϥⲕⲱⲧⲉ

36:6  ⲛⲑⲉ ⲛⲟⲩϩⲧⲟ ⲉϥϩⲁ ⲟⲩⲕⲁⲣⲟⲩⲭⲓⲟⲛ ⲉϣⲁϥϩⲙϩⲙ ϩⲁ ⲡⲉⲧϩⲙⲟⲟⲥ ϩⲓϫⲱϥ ⲧⲏⲣϥ ⲧⲁⲓ ⲧⲉ ⲑⲉ ⲛⲟⲩϣⲃⲏⲣ ⲣⲣⲉϥⲥⲱⲃⲉ

36:7  ⲉⲧⲃⲉ ⲟⲩ ⲟⲩⲛϩⲟⲟⲩ ϫⲟⲥⲉ ⲉϩⲟⲟⲩ ⲉⲡⲓⲣⲏ ⲛⲟⲩⲱⲧ ⲡⲉⲧⲣⲟⲩⲟⲉⲓⲛ ⲉϩⲟⲟⲩ [ⲛⲓⲙ ⲛ]ⲧⲉⲣⲟⲙⲡⲉ

36:8  ⲁⲩⲡⲟⲣϫⲟⲩ ⲉⲃⲟⲗ ϩⲙ ⲡⲥⲟⲟⲩⲛ ⲙⲡϫⲟⲉⲓⲥ [ⲁϥ]ϣⲓⲃⲉ ⲛⲛⲉⲟⲩⲟⲉⲓϣ ⲙⲛ ⲛϣⲁ

36:9  ⲁϥϫⲓⲥⲉ ⲉⲃⲟⲗ ⲛϩⲏⲧⲟⲩ ⲁⲩⲱ ⲁϥⲧⲃⲃⲟⲟⲩ ⲁϥⲕⲱ ⲉⲃⲟⲗ ⲛϩⲏⲧⲟⲩ ⲉϩⲛⲏⲡⲉ ⲛϩⲟⲟⲩ

36:10  ⲛⲣⲱⲙⲉ ϩⲱⲟⲩ ⲧⲏⲣⲟⲩ ϩⲛⲉⲃⲟⲗ ϩⲙ ⲡⲕⲁϩ ⲛⲉ ⲁⲩⲱ ⲛⲧⲁⲩⲥⲛⲧⲁⲇⲁⲙ ⲉⲃⲟⲗ ϩⲙ ⲡⲕⲁϩ

36:11  ⲁⲡϫⲟⲉⲓⲥ ⲡⲟⲣϫⲟⲩ ⲉⲃⲟⲗ ϩⲙ ⲡⲁϣⲁⲓ ⲛⲧⲉϥⲥⲃⲱ ⲁⲩⲱ ⲁϥϣⲓⲃⲉ ⲛⲛⲉⲩϩⲓⲟⲟⲩⲉ

36:12  ⲁϥⲥⲙⲟⲩ ⲉϩⲟⲓⲛⲉ ⲛϩⲏⲧⲟⲩ ⲁⲩⲱ ⲁϥϫⲁⲥⲧⲟⲩ ⲁϥⲧⲃⲃⲟ ⲉⲃⲟⲗ ⲛϩⲏⲧⲟⲩ ⲁϥϩⲟⲛⲟⲩ ⲉⲣⲟϥ ⲁϥⲥϩⲟⲩⲣϩⲟⲓⲛⲉ ⲛϩⲏⲧⲟⲩ ⲁⲩⲱ ⲁϥⲑⲃⲃⲓⲟⲟⲩ ⲁⲩⲱ ⲁϥⲧⲁⲩⲟⲟⲩ ⲉϩⲣⲁⲓ ϩⲓ ⲛⲉⲩⲙⲁ ⲛⲁϩⲉⲣⲁⲧⲟⲩ

36:13  ⲉⲩⲟ ⲛⲑⲉ ⲛⲟⲩⲟⲙⲉ ⲛⲕⲉⲣⲁⲙⲉⲩⲥ ϩⲛ ⲧⲉϥϭⲓϫ ⲉⲣⲉⲛⲉϥϩⲓⲟⲟⲩⲉ ⲧⲏⲣⲟⲩ ϣⲟⲟⲡ ⲕⲁⲧⲁ ⲡⲉϥⲟⲩⲱϣ ⲧⲁⲓ ⲧⲉ ⲑⲉ ⲉⲧⲉⲣⲉⲛⲣⲱⲙⲉ ϩⲛ ⲧϭⲓϫ ⲙⲡⲉⲛⲧⲁϥⲧⲁⲙⲓⲟⲟⲩ ⲉⲧⲱⲱⲃⲉ ⲛⲁⲩ ⲕⲁⲧⲁ ⲡⲉϥⲟⲩⲱϣ

36:14  ⲡⲁⲅⲁⲑⲟⲛ ⲙⲡⲉⲙⲧⲟ ⲉⲃⲟⲗ ⲙⲡⲡⲉⲑⲟⲟⲩ ⲁⲩⲱ ⲡⲱⲛϩ ⲙⲡⲉⲙⲧⲟ ⲉⲃⲟⲗ ⲙⲡⲙⲟⲩ ⲧⲁⲓ ⲧⲉ ⲑⲉ ⲙⲡⲣⲉϥⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡⲣⲙⲛⲛⲟⲩⲧⲉ

36:15  ⲁⲩⲱ ϥϭⲱϣⲧ ⲛⲧⲉⲓϩⲉ ⲉⲛⲉϩⲃⲏⲩⲉ ⲧⲏⲣⲟⲩ ⲙⲡⲉⲧϫⲟⲥⲉ ⲥⲛⲁⲩ ⲥⲛⲁⲩ ⲟⲩⲁ ⲙⲡⲉⲙⲧⲟ ⲉⲃⲟⲗ ⲛⲟⲩⲁ

36:16  ⲁⲛⲟⲕ ϩⲱ ⲁⲓⲣⲟⲩϣⲏ ⲛⲣⲟⲉⲓⲥ ⲉⲡϩⲁⲉ ⲁⲩⲱ ⲁⲓⲕⲗⲏⲣⲟⲛⲟⲙⲓ ⲙⲙⲟⲟⲩ ⲛⲑⲉ ⲛϣⲟⲣⲡ

36:17  ⲛⲁ ⲙⲡⲗⲁⲟⲥ ⲛⲧⲁⲩⲧⲁϩⲙⲉϥ ϩⲙ ⲡⲉⲕⲣⲁⲛ ⲁⲩⲱ ⲡ ⲉⲛⲧⲁⲕⲧⲛⲧⲱⲛϥ ⲉⲡⲉⲕϣⲣⲡ ⲙⲙⲓⲥⲉ

36:18  ϣⲛϩⲧⲏⲕ ϩⲁ ⲧⲡⲟⲗⲓⲥ ⲙⲛ ⲡⲉⲕⲙⲁ ⲉⲧⲟⲩⲁⲁⲃ ⲑ ⲡⲉⲕⲙⲁ ⲛϣⲱⲡⲉ

36:19  ⲙⲟⲩϩ ⲛⲥⲓⲱⲛ ⲛⲁⲣⲉⲧⲏ ⲛⲛⲉⲕϣⲡⲏⲣⲉ ⲁⲩⲱ ⲡⲉⲕⲗⲁⲟⲥ ⲛⲡⲉⲕⲉⲟⲟⲩ

36:20  ϯⲟⲩⲙⲛⲧⲣⲉ ⲛⲛⲉⲕⲥⲱⲛⲧ ⲛϣⲟⲣⲡ ⲛⲅⲧⲟⲩⲛⲉⲥⲛⲉⲡⲣⲟⲫⲏⲧⲓⲁ ⲛⲁⲓ ⲉⲩϩⲓ ⲡⲉⲕⲣⲁⲛ

36:21  ϯⲟⲩⲃⲉⲕⲉ ⲛⲛⲉⲧϩⲩⲡⲟⲙⲓⲛⲉ ⲉⲣⲟⲕ ⲡϫⲟⲓⲥ ⲁⲩⲱ ⲙⲁⲣⲟⲩⲧⲁⲛϩⲉⲧⲛⲉⲕⲡⲣⲟⲫⲏⲧⲏⲥ

36:22  ⲡϫⲟⲉⲓⲥ ⲥⲱⲧⲙ ⲉⲡⲥⲟⲡⲥ ⲛⲛⲉⲕϩⲙϩⲁⲗ ⲕⲁⲧⲁ ⲡⲉⲥⲙⲟⲩ ⲛⲁⲁⲣⲱⲛ ⲉⲧⲃⲉ ⲡⲉⲕⲗⲁⲟⲥ ⲁⲩⲱ ⲛϭⲓ ⲟⲩⲟⲛ ⲛⲓⲙ ⲉⲧϩⲓϫⲛ ⲡⲕⲁϩ ϫⲉ ⲛⲧⲟⲕ ⲡⲉ ⲡϫⲟⲉⲓⲥ ⲡⲛⲟⲩⲧⲉ ⲛϣⲁⲉⲛⲉϩ

36:23  ⲉⲥⲟⲩⲉⲙϭⲓⲛⲟⲩⲱⲙ ⲛⲓⲙ ⲟⲩⲛϭⲓⲛⲟⲩⲱⲙ ⲇⲉ ⲉϥⲥⲟⲧⲡ ⲉϭⲓⲛⲟⲩⲱⲙ

36:24  ⲧⲉϣⲟⲩⲱⲃⲉ ⲧⲉϣⲁⲥⲧⲱⲡⲉ ⲛϩⲛⲁϥ ⲧⲁⲓ ⲧⲉ ⲑⲉ ⲉϣⲁⲣⲉⲫⲏⲧ ⲛⲛⲥⲁⲃⲉ ⲧⲉⲡϩⲛϣⲁϫⲉ ⲛϭⲟⲗ

36:25  ϣⲁⲣⲉⲟⲩϩⲏⲧ ⲉϥϭⲟⲟⲙⲉ ϯⲟⲩⲗⲩⲡⲏ ⲁⲩⲱ ϣⲁⲣⲉⲟⲩⲣⲱⲙⲉ ⲛⲥⲁⲃⲉ ⲧⲟⲟⲃⲉⲥ ⲛⲁϥ

36:26  ϣⲁⲣⲉⲧⲉⲥϩⲓⲙⲉ ϫⲓϩⲟⲟⲩⲧ ⲛⲓⲙ ⲟⲩⲛⲥϩⲓⲙⲉ ⲇⲉ ⲉⲛⲁⲛⲟⲩϥ ⲉⲥϩⲓⲙⲉ

36:27  ϣⲁⲣⲉⲡⲥⲁ ⲛⲟⲩⲥϩⲓⲙⲉ ϯⲟⲩⲣⲟⲧ ⲙⲡⲉⲥϩⲟ ⲁⲩⲱ ⲥⲥⲟⲧⲡ ⲉⲉⲡⲓⲑⲩⲙⲓⲁ ⲛⲓⲙ

36:28  ⲉϣⲱⲡⲉ ⲟⲩⲛⲛⲁ ϩⲓ ⲙⲛⲧⲣⲙⲣⲁϣ ϩⲓ ⲛⲉⲥⲡⲟⲧⲟⲩ ⲉⲉⲓⲉ ⲡⲉⲥϩⲁⲓ ⲛⲟⲩⲕⲁⲧⲁ ⲛϣⲏⲣⲉ ⲛⲣⲣⲱⲙⲉ ⲁⲛ ⲡⲉ

36:29  ⲡⲉⲧⲛⲁⲕⲱ ⲛⲁϥ ⲛⲟⲩⲥϩⲓⲙⲉ ⲁϥⲁⲣⲭⲓ ⲛⲕⲱ ⲛⲁϥ ⲛⲟⲩⲃⲟⲏⲑⲟⲥ ⲕⲁⲧⲁⲣⲟϥ ⲁⲩⲱ ⲟⲩⲥⲧⲩⲗⲟⲥ ⲛⲙⲧⲟⲛ

36:30  ⲡϭⲱⲙ ⲉⲧⲉⲙⲛϫⲟⲗϫⲗ ⲙⲙⲟϥ ϣⲁⲩⲧⲟⲣⲡϥ ⲁⲩⲱ ⲡⲉⲧⲉⲙⲛⲧϥⲥϩⲓⲙⲉ ϥⲛⲁⲁϣⲁϩⲟⲙ ⲉϥⲕⲱⲧⲉ

36:31  ⲛⲓⲙ ⲡⲉⲧⲛⲁⲧⲁⲛϩⲟⲩⲧϥ ⲙⲛ ⲟⲩⲥⲟⲟⲛⲉ ⲉϥϩⲏⲕ ⲉϥϥⲱϭⲉ ⲉⲃⲟⲗ ϩⲛ ⲟⲩⲡⲟⲗⲓⲥ ⲉⲟⲩⲡⲟⲗⲓⲥ ⲧⲁⲓ ⲧⲉ ⲑⲉ ⲛⲟⲩⲣⲱⲙⲉ ⲉⲙⲛⲧϥⲙⲁ ⲛϣⲱⲡⲉ ⲉϣⲁϥϭⲟⲉⲓⲗⲉ ⲉⲡⲙⲁ ⲉⲧϥⲛⲁϫⲓⲣⲟⲩϩⲉ ⲛϩⲏⲧϥ