CopSahBible2 - Sirach - 27

27:1  ⲉⲧⲃⲉ ⲡϣⲃϣⲓ ⲅⲁⲣ ⲁϩⲁϩ ⲣⲛⲟⲃⲉ ⲁⲩⲱ ⲡⲉⲧϣⲓⲛⲉ ⲛⲥⲁ ϫⲡⲉϩⲁϩ ⲛⲁⲕⲧⲟ ⲉⲃⲟⲗ ⲛⲛⲉϥⲃⲁⲗ

27:2  ϣⲁⲩⲟⲩⲉϣⲧⲱⲕⲥ ⲛⲟⲩϣⲙⲟⲩ ⲉⲟⲩⲧⲁⲡⲟⲩⲱϣ ⲛⲟⲩⲱⲛⲉ ϣⲁⲣⲉⲡⲛⲟⲃⲉ ϩⲱⲱϥ ⲉⲓ ϩⲛ ⲧⲙⲏⲧⲉ ⲛϯ ⲉⲃⲟⲗ ϩⲓ ϣⲱⲡ

27:3  ⲉϥϣⲁⲛⲧⲙⲁⲙⲁϩⲧⲉ ⲛⲑⲟⲧⲉ ⲙⲡϫⲟⲉⲓⲥ ϩⲛ ⲟⲩϭⲉⲡⲏ ⲡⲉϥⲏⲓ ⲛⲁⲧⲁⲕⲟ ⲛⲧⲉⲩⲛⲟⲩ

27:4  ⲛⲑⲉ ⲉϣⲁⲣⲉϩⲛⲉⲓⲧⲛ ϣⲱϫⲡ ϩⲙ ⲡϣⲟⲗϣⲗ ⲛⲟⲩⲥⲟⲗϥ ⲧⲁⲓ ⲧⲉ ⲑⲉ ⲉⲣⲉⲙⲡⲉⲑⲟⲟⲩ ⲙⲡⲣⲱⲙⲉ ϩⲙ ⲡⲉϥϩⲏⲧ

27:5  ⲧⲉϩⲣⲱ ⲇⲉ ⲧⲉϣⲁⲥⲇⲟⲕⲓⲙⲁⲍⲉ ⲛⲛⲥⲕⲉⲩⲏ ⲙⲡⲕⲉⲣⲁⲙⲉⲩⲥ ⲁⲩⲱ ⲉⲣⲉⲡⲡⲓⲣⲁⲥⲙⲟⲥ ⲙⲡⲣⲱ[ⲙⲉ …]

27:6  ⲛⲑⲉ ⲉⲧⲉϣⲁⲣⲉⲡⲉⲧⲣϩⲱⲃ ⲉⲩϣⲏ[ⲛ ⲟⲩⲉ]ⲛϩⲡⲉϥⲕⲁⲣⲡⲟⲥ ⲉⲃⲟⲗ ⲧⲁⲓ ⲧⲉ ⲑⲉ ⲉⲧⲉϣⲁⲣⲉⲡϣⲁϫⲉ ⲙⲛ ⲡ[…] ⲟⲩⲉⲛϩⲫⲏⲧ ⲙⲡⲣⲱⲙⲉ ⲉⲃⲟⲗ

27:7  ⲙⲡⲣⲧⲁⲓⲉⲟⲩⲣⲱⲙⲉ ⲙⲡⲁⲧⲕⲉⲓ[ⲙⲉ] ⲡⲁⲓ ⲅⲁⲣ ⲡⲉ ⲡⲡⲓⲣⲁⲥⲙⲟⲥ ⲙⲡ[ⲣⲱⲙⲉ]

27:8  ⲉⲕϣⲁⲛⲡⲱⲧ ⲛⲥⲁ ⲧⲙⲛⲧⲙⲉ […] ⲁⲩⲱ ⲕⲛⲁⲧⲁⲁⲥ ϩⲓⲱⲱⲕ ⲛⲑⲉ ⲛⲧϣⲛⲧⲱ ⲛⲉⲟⲟⲩ

27:9  ⲛⲑⲉ ⲉϣⲁⲣⲉⲛϩⲁⲗⲁⲧⲉ ⲟⲩⲱϩ ϩⲁⲧⲛ ⲛⲉϯⲛⲉ ⲙⲙⲟⲟⲩ ⲧⲁⲓ ⲧⲉ ⲑⲉ ⲉϣⲁⲣⲉⲧⲙⲉ ⲕⲟⲧⲥ ⲉⲛⲉⲧⲉⲓⲣⲉ ⲙⲙⲟⲥ

27:10  ϣⲁⲣⲉⲟⲩⲙⲟⲩⲓ ϭⲱⲣϭ ⲉⲩⲡⲁϩⲥ ⲧⲁⲓ ⲧⲉ ⲑⲉ ⲉϣⲁⲣⲉⲡⲛⲟⲃⲉ ϭⲱⲣϭ ⲉⲛⲉϯⲣⲉ ⲙⲡϫⲓⲛϭⲟⲛⲥ

27:11  ⲧⲥⲟⲫⲓⲁ ⲡⲉ ⲡϣⲁϫⲉ ⲙⲡⲣⲙⲛⲛⲟⲩⲧⲉ ⲛⲟⲩⲟⲉⲓϣ ⲛⲓⲙ ⲡⲁⲑⲏⲧ ⲇⲉ ⲛⲧⲟϥ ϣⲁϥϣⲓⲃⲉ ⲛⲑⲉ ⲙⲡⲟⲟϩ

27:12  ϫⲓⲟⲩⲟⲉⲓϣ ⲛⲧⲙⲏⲧⲉ ⲛⲛⲁⲑⲏⲧ ⲧⲁϣⲟⲕ ⲇⲉ ϩⲛ ⲧⲙⲏⲧⲉ ⲛⲛⲥⲁⲃⲉ

27:13  ⲟⲩⲙⲉⲥⲧⲉ ⲡⲉ ⲡϣⲁϫⲉ ⲛⲛⲥⲟϭ ⲁⲩⲱ ⲉⲣⲉⲡⲉⲩⲥⲱⲃⲉ ϩⲛ ⲟⲩⲥⲡⲁⲧⲁⲗⲁ ⲛⲛⲟⲃⲉ

27:14  ϣⲁⲣⲉⲧϭⲓⲛϣⲁϫⲉ ⲛⲟⲩⲣⲉϥⲧⲁϣⲉⲱⲣⲕ [ⲛⲉϩ]ϣⲗϩϥ [ⲉⲡ]ⲉⲕϣⲁϥ ⲁⲩⲱ ⲟⲩϩⲱϫⲡ ⲙⲙⲁⲁϫⲉ ⲡⲉ ⲡⲉϥⲙⲓϣⲉ

27:15  [ⲟⲩ]ⲡⲉϩⲧⲥⲛⲟϥ ⲉⲃⲟⲗ ⲡⲉ ⲡⲙⲓϣⲉ ⲛⲛϫⲁⲥⲓϩⲏⲧ ⲁⲩⲱ ⲟⲩⲥⲱⲧⲙ ⲉϥϩⲟⲟⲩ ⲡⲉ ⲡⲉⲩⲥⲁϩⲟⲩ

27:16  ⲡⲉⲧⲛⲁϭⲱⲗⲡ ⲉⲃⲟⲗ ⲛϩⲛⲙⲩⲥⲧⲏⲣⲓⲟⲛ ⲁϥⲕⲱ ⲛⲥⲱϥ ⲙⲡⲛⲁϩⲧⲉ ⲁⲩⲱ ⲛⲉϥ[ϭⲛ]ⲛϣⲃⲏⲣ [ⲛⲛⲁ]ϩⲣⲛ ⲡⲉϥϩⲏⲧ

27:17  ⲙⲉⲣⲉⲡⲉⲕϣⲃⲏⲣ ⲛⲅⲧⲁⲛϩⲟⲩⲧⲕ ⲛⲉⲙⲁϥ ⲉϣⲱⲡⲉ ⲇⲉ ⲉⲕϣⲁⲛϭⲱⲗⲡ ⲉⲃⲟⲗ ⲙⲡⲉϥⲙⲩⲥⲧⲏⲣⲓⲟⲛ ⲙⲡⲣⲡⲱⲧ ⲛⲥⲱϥ

27:18  ⲛⲑⲉ ⲅⲁⲣ ⲛⲟⲩⲣⲱⲙⲉ ⲉⲁϥⲕⲱ ⲛⲥⲱϥ ⲙⲡⲉϥϫⲁϫⲉ ⲧⲁⲓ ⲧⲉ ⲑⲉ ⲛⲧⲁⲕⲕⲱ ⲛⲥⲱⲕ ⲛⲧⲙⲛⲧϣⲃⲏⲣ ⲙⲡⲉⲧϩⲓⲧⲟⲩⲱⲕ

27:19  ⲁⲩⲱ ⲛⲑⲉ ⲛⲟⲩϩⲁⲗⲏⲧ ⲉⲁⲕⲕⲁⲁϥ ⲉⲃⲟⲗ ϩⲛ ⲧⲉⲕϭⲓϫ ⲧⲁⲓ ⲧⲉ ⲑⲉ ⲉⲛⲧⲁⲕⲕⲱ ⲛⲥⲱⲕ ⲙⲡⲉⲧϩⲓⲧⲟⲩⲱⲕ ⲁⲩⲱ ⲛⲛⲉⲕϣⲧⲁϩⲟϥ

27:20  ⲙⲡⲣⲡⲱⲧ ⲛⲥⲱϥ ϫⲉ ⲁϥⲟⲩⲉ ⲁⲩⲱ ⲁϥⲡⲱⲧ ⲛⲑⲉ ⲛⲟⲩϭϩⲟⲥ ⲉⲃⲟⲗ ϩⲛ ⲟⲩⲡⲁϣ

27:21  ⲉϣϫⲉ ⲟⲩⲛⲑⲉ ⲙⲙⲣⲟⲩⲥⲁϣ ⲁⲩⲱ ⲟⲩⲛⲑⲉ ⲛϩⲱⲧⲡ ϩⲛ ⲟⲩⲙⲓϣⲉ ⲡⲉⲧⲛⲁϭⲱⲗⲡ ⲉⲃⲟⲗ ⲛϩⲛⲙⲩⲥⲧⲏⲣⲓⲟⲛ […]ⲉⲗⲡⲓⲍⲉ

27:22  [ⲡⲉⲧϫⲱⲣ]ⲙ ϩⲛ ⲛⲉϥⲃⲁⲗ ⲉϥⲙⲉⲉⲩⲉ ⲉϩⲉⲛⲡⲉⲑⲟⲟⲩ [ⲙⲛⲗ]ⲁⲁⲩ ⲛⲁⲧⲟϭϥ ⲉⲣⲟϥ

27:23  […… ⲣ]ⲱϥ ϩⲗⲟϭ ⲙⲡⲉϥⲙⲧⲟ ⲉⲃⲟⲗ ⲛϥⲣ[ϣⲡⲏ]ⲣⲉ ⲛⲛⲉⲕϣⲁϫⲉ ⲙⲛⲛⲥⲱⲥ ϥⲛⲁⲕⲧⲉⲣⲱϥ ⲛϥϯ ⲛⲟⲩϫⲣⲟⲡ ϩⲛ ⲛⲉⲕϣⲁϫⲉ

27:24  ⲁⲓⲙⲉⲥⲧⲉϩⲁϩ ⲙⲡⲓⲧⲛⲧⲱⲛⲟⲩ ⲉⲣⲟϥ [ⲡϫⲟ]ⲉⲓⲥ ⲛⲁⲙⲉⲥⲧⲱϥ

27:25  ⲡⲉⲧⲛⲁⲛⲉϫⲟⲩⲱⲛⲉ ⲉⲧⲡⲉ ϥⲛⲁϩⲉ ⲉϫⲱϥ ⲟⲩⲡⲗⲏⲅⲏ ⲛⲕⲣⲟϥ ϣⲁⲥⲉⲓⲣⲉ ⲛϩⲛⲡⲱⲗϩ

27:26  ⲡⲉⲧϣⲓⲕⲉ ⲛⲟⲩϩⲓⲉⲓⲧ ϥⲛⲁϩⲉ ⲉⲣⲟϥ ⲁⲩⲱ ⲡⲉⲧⲧⲁϩⲟ ⲉⲣⲁⲧϥ ⲛⲟⲩⲡⲁϣ ϥⲛⲁϩⲉ ⲛϩⲏⲧϥ

27:27  ⲡⲉϯⲣⲉ ⲛϩⲛⲡⲉⲑⲟⲟⲩ ⲉⲩⲛⲛⲏⲩ ⲉϩⲣⲁⲓ ⲉϫⲱϥ ⲁⲩⲱ ⲛⲉϥⲉⲓⲙⲉ ϫⲉ ⲛⲧⲁⲩⲉⲓ ⲛⲁϥ ⲧⲱⲛ

27:28  ⲟⲩⲥⲱϣϥ ⲙⲛ ⲟⲩⲛⲟϭⲛⲉϭ ⲛⲛϫⲁⲥⲓϩⲏⲧ ⲁⲩⲱ ⲡϫⲓⲕⲃⲁ ⲛⲁϭⲱⲣϭ ⲉⲣⲟϥ ⲛⲑⲉ ⲛⲛⲓⲙⲟⲩⲓ

27:29  ⲛⲉⲧⲉⲩⲫⲣⲁⲛⲉ ⲉϫⲛ ⲡⲧⲁⲕⲟ ⲛⲛⲣⲙⲛⲛⲟⲩⲧⲉ ⲛⲁⲧⲁⲕⲟ ϩⲛ ⲟⲩⲡⲁϣ ⲁⲩⲱ ⲡⲉⲙⲕⲁϩ ⲛϩⲏⲧ ⲛⲁⲧⲁⲕⲟⲟⲩ ϩⲁⲑⲏ ⲙⲡⲉⲩⲙⲟⲩ

27:30  ϩⲛϥⲟⲧⲉ ⲛⲉ ⲟⲩⲛⲟϭⲥ ⲉϥⲙⲏⲛ ⲉⲃⲟⲗ ⲙⲛ ⲟⲩⲟⲣⲅⲏ ⲁⲩⲱ ⲟⲩⲣⲱⲙⲉ ⲛⲣⲉϥⲣⲛⲟⲃⲉ ϥⲛⲁⲁⲙⲁϩⲧⲉ ⲙⲙⲟⲟⲩ