CopSahBible2 - Sirach - 40

40:1  ⲁⲩⲥⲛⲧⲟⲩⲛⲟϭ ⲙⲙⲛⲧⲁⲧⲥⲣϥⲉ ⲣⲣⲱⲙⲉ ⲛⲓⲙ ⲁⲩⲱ ⲟⲩⲛⲁϩⲃ ⲉϥϩⲟⲣϣ ⲉϫⲛ ⲛϣⲏⲣⲉ ⲛⲁⲇⲁⲙ ϫⲓⲛ ⲡⲉϩⲟⲟⲩ ⲛⲧⲁⲩⲉⲓ ⲉⲃⲟⲗ ⲛϩⲏⲧⲥ ⲛⲧⲉⲩⲙⲁⲁⲩ ϣⲁ ⲡⲉϩⲟⲟⲩ ⲙⲡⲧⲟⲙⲥⲟⲩ ⲉⲡⲙⲁ ⲛⲟⲩⲟⲛ ⲛⲓⲙ

40:2  ⲉⲧⲉⲛⲉⲩⲙⲟⲕⲙⲉⲕ ⲛⲉ ⲙⲛ ⲑⲟⲧⲉ ⲙⲡⲉⲩϩⲏⲧ ⲙⲙⲉⲉⲩⲉ ⲉⲧⲟⲩϭⲱϣⲧ ⲉⲃⲟⲗ ϩⲏⲧⲟⲩ ⲙⲛ ⲡⲉϩⲟⲟⲩ ⲙⲡⲉⲩⲙⲟⲩ

40:3  ϫⲓⲛ ⲡⲉⲧϩⲙⲟⲟⲥ ϩⲓ ⲟⲩⲑⲣⲟⲛⲟⲥ ⲉϥϩⲁⲉⲟⲟⲩ ϣⲁ ⲡⲉⲧⲑⲃⲃⲓⲏⲩ ϩⲛ ⲡⲕⲁϩ ⲙⲛ ⲡⲕⲣⲙⲉⲥ

40:4  ϫⲓⲛ ⲡⲉⲧⲫⲟⲣⲓ ⲛⲟⲩϩⲩⲁⲕⲓⲛⲑⲓⲛⲟⲛ ⲙⲛ ⲟⲩⲕⲗⲟⲙ ϣⲁϩⲣⲁⲓ ⲉⲡⲉⲧⲉⲣⲉⲟⲩϭⲁϭⲓⲧⲱⲛ ϩⲓⲱⲱϥ

40:5  ⲡϭⲱⲛⲧ ⲙⲛ ⲡⲕⲱϩ ⲙⲛ ⲡⲉϣⲧⲟⲣⲧⲣ ⲙⲛ ⲡⲕⲓⲙ ⲁⲩⲱ ⲑⲟⲧⲉ ⲙⲡⲙⲟⲩ ⲙⲛ ⲡⲛⲟⲩϭⲥ ⲙⲛ ⲡϯⲧⲱⲛ ⲁⲩⲱ ϩⲛ ⲧⲉⲩⲛⲟⲩ ⲙⲡⲉⲙⲧⲟⲛ ϩⲓ ⲡⲉⲩⲙⲁ ⲛⲛⲕⲟⲧⲕ ϣⲁⲣⲉⲫⲓⲛⲏⲃ ⲛⲧⲉⲩϣⲏ ϣⲓⲃⲉ ⲙⲡⲉϥⲥⲟⲟⲩⲛ

40:6  [ⲟⲩ]ⲕⲟⲩⲓ ⲛⲑⲉ ⲛⲟⲩⲗⲁⲁⲩ ⲡⲉ ⲡⲉϥⲙⲧⲟⲛ ⲁⲩⲱ ϩⲙ ⲡⲁⲓ ⲉϣϫⲉ ⲉϥϩⲙ ⲡⲉϩⲟⲟⲩ ϩⲙ ⲡϭⲱϣⲧ ⲉⲃⲟⲗ ⲛⲣⲣⲁⲥⲟⲩ ⲉϥϣⲧⲣⲧⲱⲣ ϩⲛ ⲑⲟⲣⲁⲥⲓⲥ ⲙⲡⲉϥϩⲏⲧ ⲛⲑⲉ ⲙⲡⲉⲛⲧⲁϥⲣⲃⲟⲗ ϩⲛ ⲟⲩⲡⲟⲗⲉⲙⲟⲥ

40:7  ⲁϥⲧⲱⲟⲩⲛ ϩⲛ ⲧⲉⲩⲛⲟⲩ ⲙⲡⲉϥⲟⲩϫⲁⲓ ⲉⲛϥⲣϣⲡⲏⲣⲉ ⲁⲛ ⲗⲗⲁⲁⲩ ⲛϩⲟⲧⲉ

40:8  ⲙⲛ ⲥⲁⲣⲝ ⲛⲓⲙ ϫⲓⲛ ⲛⲣⲱⲙⲉ ϣⲁ ⲛⲧⲉⲃⲛⲏ ⲁⲩⲱ ⲥⲁϣϥ ⲛⲕⲱⲃ ⲛⲛⲁⲓ ⲛⲉⲧⲛⲛⲏⲩ ⲉϫⲛ ⲛⲣⲉϥⲣⲛⲟⲃⲉ

40:9  ⲡⲙⲟⲩ ⲙⲛ ⲡϯⲧⲱⲛ ⲙⲛ ⲡⲉⲥⲛⲟϥ ⲙⲛ ⲧⲥⲏϥⲉ ⲛⲉⲥⲛⲁⲩϩ ⲙⲛ ⲫⲉⲃⲱⲱⲛ ⲙⲛ ⲡⲟⲩⲱϣϥ ⲙⲛ ⲙⲙⲁⲥⲧⲓⲅⲝ

40:10  ⲛⲧⲁⲩⲥⲛⲧⲛⲁⲓ ⲧⲏⲣⲟⲩ ⲉⲛⲁⲛⲟⲙⲟⲥ ⲁⲩⲱ ⲛⲧⲁⲡⲕⲁⲧⲁⲕⲗⲩⲥⲙⲟⲥ ϣⲱⲡⲉ ⲉⲧⲃⲏⲧⲟⲩ

40:11  ⲛⲕⲁ ⲛⲓⲙ ⲉⲛⲧⲁⲩⲉⲓ ⲉⲃⲟⲗ ϩⲙ ⲡⲕⲁϩ ⲉⲩⲛⲁⲕⲟⲧⲟⲩ ⲉⲡⲕⲁϩ ⲁⲩⲱ ⲛⲉⲃⲟⲗ ϩⲛ ⲙⲙⲟⲟⲩ ⲉⲩⲛⲁⲕⲟⲧⲟⲩ ⲉⲑⲁⲗⲁⲥⲥⲁ

40:12  ⲇⲱⲣⲟⲛ ⲛⲓⲙ ⲁⲩⲱ ϫⲓⲛϭⲟⲛⲥ ⲛⲓⲙ ⲛⲁϥⲱⲧⲉ ⲉⲃⲟⲗ ⲧⲡⲓⲥⲧⲓⲥ ⲇⲉ ⲛⲁⲁϩⲉⲣⲁⲧⲥ ⲛϣⲁⲉⲛⲉϩ

40:13  ⲛⲉⲭⲣⲏⲙⲁ ⲛⲛⲣⲉϥϫⲓⲛϭⲟⲛⲥ ⲛⲁϣⲟⲟⲩⲉ ⲛⲑⲉ ⲛⲟⲩⲉⲓⲉⲣⲟ ⲁⲩⲱ ⲥⲉⲛⲁⲱϣ ⲉⲃⲟⲗ ⲛⲑⲉ ⲛⲟⲩϩⲣⲟⲩⲃⲃⲁⲓ ⲛⲟϭ ϩⲛ ⲟⲩϩⲱⲟⲩ

40:14  ϩⲙ ⲡⲧⲣⲉϥⲟⲩⲱⲛ ⲛⲛⲉϥϭⲓϫ ⲥⲉⲛⲁⲉⲩⲫ[ⲣⲁ]]ⲛ[ⲉ] ⲧⲁⲓ ⲧⲉ ⲑⲉ ⲛⲛⲉⲧⲡⲁⲣⲁⲃⲁ ⲥⲉⲛⲁⲱϫⲛ ⲛ[ⲑⲁ]ⲏ

40:15  ⲛⲛⲉⲛϣⲏⲣⲉ ⲛⲁⲥⲉⲃⲏⲥ ⲧⲁϣⲉⲛⲉⲩⲕⲗⲁⲇⲟⲥ ⲁⲩⲱ ⲛⲛⲟⲩⲛⲉ ⲛⲛⲓⲁⲕⲁⲑⲁⲣⲧⲟⲥ ⲉⲩⲟ ⲛⲑⲉ ⲛⲛⲉⲧϩⲓϫⲛ ⲛⲓⲡⲉⲧⲣⲁ ⲉⲧⲛⲁϣⲧ

40:16  ϣⲁⲩϥⲉϭⲡⲁϩⲣ ⲉⲧϩⲓϫⲛ ⲙⲟⲟⲩ ⲛⲓⲙ ⲁⲩⲱ ⲛⲉⲥⲡⲟⲧⲟⲩ ⲙⲡⲓⲉⲣⲟ ϩⲁⲑⲏ ⲛⲭⲟⲣⲧⲟⲥ ⲛⲓⲙ

40:17  ⲉⲣⲉⲧⲉⲭⲁⲣⲓⲥ ⲟ ⲛⲑⲉ ⲛⲟⲩⲡⲁⲣⲁⲇⲓⲥⲟⲥ ϩⲛ ⲛⲉⲥⲙⲟⲩ ⲁⲩⲱ ⲧⲙⲛⲧⲛⲁ ⲛⲁϣⲱⲡⲉ ⲛϣⲁⲉⲛⲉϩ

40:18  ⲛⲁⲛⲟⲩⲡⲱⲛϩ ⲉⲧⲧⲏϣ ⲛⲟⲩⲉⲣⲅⲁⲧⲏⲥ ⲛⲁϥ ⲡⲉⲛⲧⲁϥϩⲉ ⲇⲉ ⲉⲩⲁϩⲟ ⲥⲟⲧⲡ ⲉⲣⲟϥ

40:19  ϣⲏⲣⲉ ϩⲓ ⲕⲱⲧ ⲙⲡⲟⲗⲓⲥ ⲛⲉϣⲁⲩⲧⲁϫⲣⲉⲣⲁⲛ ⲟⲩⲛⲟⲩⲥϩⲓⲙⲉ ⲇⲉ ⲉⲥⲟⲩⲁⲁⲃ ⲥⲟⲧⲡ ⲉϩⲟⲩⲉ ϩⲣⲁⲓ ⲙⲡⲉⲥⲛⲁⲩ

40:20  ⲏⲣⲡ ϩⲓ ⲙⲟⲩⲥⲓⲕⲟⲛ ⲡⲉϣⲁϥⲉⲩⲫⲣⲁⲛⲉ ⲙⲫⲏⲧ ⲧⲁⲅⲁⲡⲏ ⲇⲉ ⲙⲛ ⲧⲥⲟⲫⲓⲁ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ

40:21  ⲥⲏϥⲉ ⲛϫⲱ ϩⲓ ⲯⲁⲗⲧⲏⲣⲓⲟⲛ ⲛⲉϣⲁⲩϯ ⲛⲟⲩⲗⲗⲉ ⲟⲩⲗⲁⲥ ⲇⲉ ⲉϥⲛⲟⲧⲙ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ

40:22  [ⲡⲉⲕⲃⲁⲗ ⲛⲁⲉ]ⲡⲓⲑⲩⲙⲓ ⲉⲩⲭⲁⲣⲓⲥ ⲙⲛⲟⲩⲥⲁ [ⲡⲟⲩⲟⲧ]ⲟⲩⲉⲧ ⲇⲉ ⲛⲧⲥⲱϣⲉ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ

40:23  [ϣⲁⲣ]ⲉⲡⲉⲕϣⲃⲏⲣ ⲙⲛ ⲡⲉⲕⲣⲱⲙⲉ ⲧⲱⲙⲛⲧ ⲉⲣⲟⲕ ⲙⲡⲉⲕⲟⲩⲟⲉⲓϣ ⲟⲩⲥϩⲓⲙⲉ ⲇⲉ ⲙⲛ ⲡⲉⲥϩⲁⲓ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ

40:24  ϣⲁⲣⲉϩⲛⲥⲛⲏⲩ ϯⲧⲟⲟⲧⲕ ⲙⲛ ⲟⲩⲃⲟⲏⲑⲓⲁ ϩⲙ ⲡⲉⲟⲩⲟⲉⲓϣ ⲛⲟⲩⲑⲗⲓⲯⲓⲥ ⲧⲙⲛⲧⲛⲁ ⲇⲉ ⲛⲁⲛⲟⲩϩⲙ ⲉϩⲟⲩⲉⲣⲟⲟⲩ ⲙⲡⲉⲥⲛⲁⲩ

40:25  ϣⲁⲣⲉⲡⲛⲟⲩⲃ ⲙⲛ ⲫⲁⲧ ⲥⲙⲛⲡⲣⲱⲙⲉ ⲡϣⲟϫⲛⲉ ⲇⲉ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ

40:26  ϣⲁⲣⲉⲭⲣⲏⲙⲁ ϩⲓ ϭⲟⲙ ϫⲓⲥⲉ ⲙⲫⲏⲧ ⲑⲟⲧⲉ ⲇⲉ ⲙⲡϫⲟⲉⲓⲥ ⲥⲟⲧⲡ ⲉⲣⲟⲟⲩ ⲙⲡⲉⲥⲛⲁⲩ ⲙⲛϣⲱⲱⲧ ϩⲛ ⲑⲟⲧⲉ ⲙⲡϫⲟⲉⲓⲥ ⲁⲩⲱ ⲙⲛⲧⲣⲉⲕϣⲓⲛⲉ ⲛⲥⲁ ⲃⲟⲏⲑⲓⲁ ⲉⲕⲛϩⲏⲧⲥ

40:27  ⲉⲣⲉⲑⲟⲧⲉ ⲙⲡϫⲟⲉⲓⲥ ⲟ ⲛⲑⲉ ⲛⲟⲩⲡⲁⲣⲁⲇⲓⲥⲟⲥ ⲛⲥⲙⲟⲩ ⲁⲩⲱ ⲥⲛⲁϩⲟⲃⲥϥ ⲉϩⲟⲩⲉⲟⲩⲟⲛ ⲛⲓⲙ

40:28  ⲡⲁϣⲏⲣⲉ ⲙⲡⲣⲣⲧϭⲓⲛⲱⲛϩ ⲛⲟⲩⲣⲉϥⲧⲱⲃϩ ⲛⲁⲛⲟⲩⲥ ⲅⲁⲣ ⲉⲧⲣⲉⲕⲙⲟⲩ ⲉϩⲟⲩⲉⲧⲱⲃϩ

40:29  ⲟⲩⲣⲱⲙⲉ ⲉϥϭⲱϣⲧ ⲉⲩⲧⲣⲁⲡⲉⲍⲁ ⲉⲛⲧⲱϥ ⲁⲛ ⲧⲉ ⲛⲟⲩⲁϩⲉ ⲁⲛ ϥⲛⲁⲧⲙⲙⲉⲧⲉϥⲯⲩⲭⲏ ⲛϩⲉⲛϭⲓⲛⲟⲩⲟⲟⲙ ⲉⲛⲛⲟⲩϥ ⲁⲛ ⲛⲉ ⲟⲩⲛⲟⲩⲣⲱⲙⲉ ⲇⲉ ⲛⲥⲁⲃⲉ ⲁⲩⲱ ⲉϥⲧⲥⲁ[ⲃⲏⲩ] ⲛⲁϩⲁⲣⲉϩ ⲉⲣⲟϥ

40:30  ⲡⲧⲱⲃϩ ⲛⲁϩⲗⲟϭ ϩⲛⲧⲧⲁⲡⲣⲟ ⲙⲡⲁⲧϣⲓⲡ[ⲉ] ⲁⲩⲱ ⲟⲩⲛⲟⲩⲕⲱϩⲧ ⲛⲁⲙⲟⲩϩ ⲛϩⲏⲧϥ