Kapingamarangi - Ecclesiastes - 7

7:1  Di ingoo e-humalia la-koia e-humalia i-di lolo haga-kala huingadaa. Di laangi e-made-iei goe, la-koia e-humalia i-di laangi dela ne-haanau-iei goe.

7:2  Di hana gi-di hale dela e-manawa-gee-ai nia daangada, la-koia e-humalia i-di hana gi-di hale haga-tenetene e-hai nadau hagamiami, idimaa digau ala e-mouli belee langahia-e-ginaadou i-nia madagoaa huogodoo bolo di made le e-tali ginaadou huogodoo.

7:3  Di manawa-gee la-koia e-humalia i-di gadagada. Ma e-mee-hua di hagammada o golomada hagahuaidu, gei di-maa e-haga-kabemee goe.

7:4  Tangada dela e-hagamaanadu di tenetene i-nia madagoaa huogodoo la tangada dadaulia. Tangada kabemee e-hagamaanadu di made.

7:5  Di haga-aago o tangada kabemee la-koia e-humalia i-di hagalongo gi-di haga-hagaamu o tangada dadaulia.

7:6  Tangada dadaulia ma-ga-gadagada le e-hai gadoo be nia laagau-geinga duduia ala e-wwele mamaawa i-lodo di ahi. Huogodoo e-maa gi-daha.

7:7  Holongo goe tangada kabemee, malaa, maa goe e-halahalau dangada, goe e-hai be tangada dadaulia. Maa goe e-kae di hui halahalau, goe e-hagahuaidu do mouli humalia.

7:8  Di hagaodi o-di mee la-koia e-humalia i taamada. Di noho baba la-koia e-humalia i-di manawa hagaamu i ana mee.

7:9  Hudee hagawelewele-ngoohia. Ma e-dadaulia ma-ga-hagadugina.

7:10  Hudee heeu boloo, “Ma-ne-aha dela i-nia laangi namua nia mee la-koia e-humalia?” Ma e-hagalee di heeu kabemee.

7:11  Digau huogodoo ala e-mouli la-ne-belee hai gi-kabemee. Ma e-humalia gadoo be-di kae nia maluagina gowaa mai baahi o maadua.

7:12  Di kabemee ga-gowadu gi-di-goe di benebene do mouli, be-nia bahihadu ala e-mee di-benebene do mouli. Di kabemee le e-benebene goe gi-daha mo nia haingadaa, deenei di humalia o-di kabemee.

7:13  Hagamaanadu-ina nia mee a God ala ne-hai. Dehee di hai o dahi dangada e-mee di-hagahuudonu di mee a God dela ne-hagabiga?

7:14  I-di madagoaa nia mee gaa-gila be do manawa, gi-manawa lamalia, gei di madagoaa di haingadaa ma-ga-gila-aga, gi-langahia bolo God e-gaamai di tenetene mo-di haingadaa. Goe e-de-iloo ma di-aha dela ga-gila-aga maalia.

7:15  Dogu mouli la-nogo maa gi-daha, gei i-lodo di-maa, au gu-gidee nia mee huogodoo. Hunu daangada humalia e-mmade, gei digau i-golo e-mouli gi-muli, ma e-aha maa digaula digau huaidu.

7:16  Malaa, hudee heia goe gi-humalia giibeni, be e-kabemee giibeni. Goe e-daaligi goe eiaha?

7:17  Malaa, hudee heia goe gi-huaidu giibeni, be e-dadaulia giibeni. Goe e-haga-made goe i-mua do madagoaa eiaha?

7:18  Hagaligaliga huoloo giibeni i-daha mo nia mee e-lua aalaa. Maa goe ga-hagalabagau a God, goe gaa-gila humalia i-nia ala huogodoo.

7:19  Di kabemee la-koia e-hai ana mee e-logo gi tangada hua e-dahi i-nia dagi dilongoholu ma-gaa-hai nadau mee gi-di waahale.

7:20  Deai tangada i-hongo o henuailala dela e-hai ana mee e-donu i-nia madagoaa huogodoo, geia dana hala e-hai ai.

7:21  Hudee hagalongo gi-nia helekai huogodoo o-nia daangada. Goe e-mee-hua di-hagalongo gi nnelekai o dau hege e-helekai huaidu i-di-goe.

7:22  Gei goe e-iloo-hua bolo goe gu-leelee huaidu i digau ala i-golo i-nia holongo e-logo.

7:23  Au gu-hai-hegau gi ogu kabemee belee hagamada nia mee huogodoo aanei. Au gu-haga-noho bolo au e-hai gi-kabemee, gei di-maa e-haingadaa.

7:24  Dehee di hai tangada e-halahala tadinga o-di mouli? Ma e-llala balua mai gi gidaadou di modongoohia, gei e-haingadaa.

7:25  Gei au gu-hagamahi belee kabe di kabemee gii-dohu. Au gu-kuulu au gi-iloo di kabemee mo nia helekai gi agu heeu, ge gi-iloo tadinga o tadaulia la-di mee huaidu ge balumee.

7:26  Au gu-gidee dahi mee e-koia e-huaidu i-di made: go-di ahina dela e-mouli be-di gowaa hele-mee. Dono aloho haganeene gaa-kumi goe gadoo be-di gubenge, ono lima i doo gili gaa-kumi goe be taula-baalanga. Taane dela e-haga-tenetene di manawa o God le e-mee di-tanga gi-daha, gei di ahina la-gaa-kumi tangada haihai hala.

7:27  Tangada hagabaubau ne-helekai, “Uaa, au gu-gidee di mee deenei dulii, i dogu madagoaa nogo halahala nia helekai gi agu heeu.

7:28  Au gu-halahala nia helekai gi agu heeu aalaa, gei au digi gidee dahi mee i-golo. Au ne-gidee taane hua e-dahi i-lodo nia daangada e-mana dela e-mee dagu hagalaamua, malaa, deai dahi ahina i digaula ai.

7:29  Deenei la-go dagu mee dela ne-kabe: God ne-hai gidaadou gi-madammaa gei e-modongoohia, gei gidaadou gu-haga-hinihini gidaadou huoloo.”