CopSahBible2 - I Samuel - 30

30:1  ⲁⲥϣⲱⲡⲉ ⲇⲉ ⲛⲧⲉⲣⲉⲇⲁⲩⲉⲓⲇ ⲙⲛ ⲛⲉϥⲣⲱⲙⲉ ⲃⲱⲕ ⲉϩⲟⲩⲛ ⲉⲥⲉⲕⲉⲗⲁⲕ ϩⲙ ⲡⲙⲉϩϣⲟⲙⲛⲧ ⲛϩⲟⲟⲩ ⲡⲁⲙⲁⲗⲏⲕ ⲉⲛⲉⲁϥⲧⲱⲟⲩⲛ ⲉϫⲙ ⲡⲉⲧϩⲛⲡⲥⲁ ⲙⲡⲣⲏⲥ ⲁⲩⲱ ⲉϫⲛ ⲥⲉⲕⲉⲗⲁⲕ ⲁϥⲡⲁⲧⲁⲥⲥⲉ ⲛⲥⲉⲕⲉⲗⲁⲕ ⲁϥⲣⲟⲕϩⲥ ϩⲛ ⲟⲩⲥⲁⲧⲉ

30:2  ⲁⲩⲱ ⲛⲉϩⲓⲟⲙⲉ ⲙⲛ ⲛⲉⲧⲛϩⲏⲧⲥ ⲧⲏⲣⲟⲩ ⲛϫⲓⲛ ⲉⲡⲉⲩⲕⲟⲩⲓ ϣⲁ ⲡⲉⲩⲛⲟϭ ⲙⲡⲟⲩⲙⲉⲟⲩⲧ ⲟⲩϩⲟⲟⲩⲧ ⲟⲩⲇⲉ ⲟⲩⲥϩⲓⲙⲉ ⲁⲗⲗⲁ ⲁⲩⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ ⲁⲩⲃⲱⲕ ⲉϩⲣⲁⲓ ⲉⲧⲉⲩϩⲓⲏ

30:3  ⲇⲁⲩⲉⲓ ⲇⲉ ⲙⲛ ⲛⲉϥⲣⲱⲙⲉ ⲁⲩⲉⲓ ⲉϩⲣⲁⲓ ⲉⲧⲡⲟⲗⲓⲥ ⲁⲩⲱ ⲉⲓⲥ ϩⲏⲏⲧⲉ ⲥⲣⲟⲕϩ ϩⲛ ⲟⲩⲥⲁⲧⲉ ⲁⲩⲱ ⲛⲉⲩϩⲓⲟⲙⲉ ⲙⲛ ⲛⲉⲩϣⲏⲣⲉ ⲙⲛ ⲛⲉⲩϣⲉⲉⲣⲉ ⲁⲩⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ

30:4  ⲇⲁⲩⲉⲓⲇ ⲇⲉ ⲙⲛ ⲛⲉϥⲣⲱⲙⲉ ⲁⲩϥⲓϩⲣⲟⲟⲩ ⲉⲃⲟⲗ ⲁⲩⲣⲓⲙⲉ ϣⲁⲛⲧⲟⲩⲗⲟ ⲉⲩⲉϣϭⲙϭⲟⲙ ⲉⲣⲓⲙⲉ

30:5  ⲁⲩⲱ ⲑⲓⲙⲉ ⲥⲛⲧⲉ ⲛ ⲁⲩⲁⲓⲭⲙⲁⲗⲱⲧⲓⲍⲉ ⲙⲙⲟⲟⲩ ⲁⲭⲓⲛⲁⲁⲃ ⲧⲓⲥⲣⲁⲏⲗⲓⲧⲏⲥ ⲁⲩⲱ ⲁⲃⲓⲕⲓⲁ ⲑⲓⲙⲉ ⲛⲁⲃⲁⲗ ⲡⲕⲁⲣⲙⲏⲗⲟⲥ

30:6  ⲇⲁⲩⲉⲓⲇ ⲇⲉ ⲁϥϩⲟϫϩⲉϫ ⲉⲃⲟⲗ ϫⲉ ⲡⲗⲁⲟⲥ ⲁϥϫⲟⲟⲥ ⲉϩⲓⲱⲛⲉ ⲉⲣⲟϥ ϫⲉ ⲛⲉⲣⲉⲡⲗⲁⲟⲥ ⲧⲏⲣϥ ⲟⲩⲟⲗⲥ ⲛϩⲏⲧ ⲉⲙⲁⲧⲉ ⲡⲟⲩⲁ ⲡⲟⲩⲁ ⲉϫⲛ ⲛⲉϥϣⲏⲣⲉ ⲁⲩⲱ ⲡⲟⲩⲁ ⲡⲟⲩⲁ ⲉϫⲛ ⲧⲉϥϣⲉⲉⲣⲉ ⲇⲁⲩⲉⲓⲇ ⲇⲉ ⲁϥⲧⲁϫⲣⲟ ϩⲙ ⲡϫⲟⲉⲓⲥ ⲡⲉϥⲛⲟⲩⲧⲉ

30:7  ⲡⲉϫⲉⲇⲁⲩⲉⲓⲇ ⲉϩⲟⲩⲛ ϩⲛ ⲁⲃⲓⲁⲑⲁⲣ ⲡⲟⲩⲏⲏⲃ ⲡϣⲏⲣⲉ ⲛⲁⲭⲓⲙⲉⲗⲉⲭ ϫⲉ ⲁⲩⲉⲡⲉⲫⲟⲩⲇ ⲉⲡⲉⲓⲙⲁ

30:8  ⲁⲩⲱ ⲁϥϣⲓⲛⲉ ϩⲙ ⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉ ⲉⲛⲉⲕⲟⲩⲱϣ ⲛⲧⲁⲡⲱⲧ ⲛⲥⲁ ⲡⲉⲓⲅⲉⲇⲇⲟⲩⲣ ⲁⲩⲱ ⲉⲛⲉϯⲛⲁϫⲓⲧϥ ⲡⲉϫⲉⲡϫⲟⲉⲓⲥ ⲛⲁϥ ϫⲉ ⲡⲱⲧ ⲛⲥⲱϥ ϫⲉ ϩⲛ ⲟⲩⲧⲁϩⲟ ⲕⲛⲁⲧⲁϩⲟϥ ⲁⲩⲱ ϩⲛ ⲟⲩⲛⲟⲩϩⲙ ⲕⲛⲁⲛⲟⲩϩⲙ ⲛⲧⲟⲟⲧⲟⲩ ⲛⲛⲉⲛⲧⲁⲩϥⲓⲧⲟⲩ

30:9  ⲇⲉ ⲛⲧⲟϥ ⲙⲛ ⲡⲉϥⲧⲟⲟⲩ ⲛϣⲉ ⲛⲣⲱⲙⲉ ⲉⲧⲛⲙⲙⲁϥ ⲁⲩⲧⲱⲟⲩⲛ ⲁⲩⲉⲓ ⲁⲩⲙⲟⲟϣⲉ ϣⲁ ⲉϩⲣⲁⲓ ⲉⲡⲉⲭⲓⲙⲁⲣⲟⲥ ⲛⲃⲟⲥⲟⲣ ⲛⲕⲟⲟⲩⲉ ⲇⲉ ⲉⲧⲟ ⲛϩⲟⲩⲟ ⲁⲩⲁϩⲉⲣⲁⲧⲟⲩ ⲉⲡⲁϩⲟⲩ

30:10  ⲡⲉϥⲧⲟⲟⲩ ⲇⲉ ⲛϣⲉ ⲛⲣⲱⲙⲉ ⲁⲩⲙⲟⲟϣⲉ ⲙⲛ ⲇⲁⲩⲉⲓⲇ ⲡϣⲏⲧ ⲇⲉ ⲛⲣⲱⲙⲉ ⲁⲩϩⲙⲟⲟⲥ ϩⲙ ⲡⲉⲭⲓⲙⲁⲣⲟⲥ ⲛⲃⲟⲥⲟⲣ

30:11  ⲁⲩϩⲉ ⲇⲉ ⲉⲩⲣⲱⲙⲉ ⲛⲣⲉⲙⲛⲕⲏⲙⲉ ϩⲛ ⲧⲥⲱϣⲉ ⲉⲁⲩⲁⲙⲁϩⲧⲉ ⲙⲙⲟϥ ⲁⲩϫⲓⲧϥ ⲉⲣⲁⲧϥ ⲛⲇⲁⲩⲉⲓⲇ ⲁⲩⲱ ⲁⲩϯⲟⲉⲓⲕ ⲛⲁϥ ⲁϥⲟⲩⲱⲙ ⲁⲩⲧⲥⲟϥ ⲙⲙⲟⲟⲩ

30:12  ⲁⲩⲱ ⲁⲩϯⲟⲩⲧⲁϭ ⲛⲁϥ ⲛⲉⲛⲕⲁ ⲛⲟⲩⲱⲙ ⲁϥⲟⲩⲟⲙϥ ⲁⲡⲉϥϩⲏⲧ ⲥⲙⲛⲧϥ ⲉⲣⲟϥ ⲉⲃⲟⲗ ϫⲉ ⲁϥⲣϣⲟⲙⲛⲧ ⲛϩⲟⲟⲩ ⲙⲛ ϣⲟⲙⲧⲉ ⲛⲟⲩϣⲏ ⲙⲡⲉϥⲟⲩⲉⲙⲟⲉⲓⲕ ⲟⲩⲇⲉ ⲙⲡⲉϥⲥⲉⲙⲟⲟⲩ

30:13  ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲛⲧⲕ ⲡⲣⲱⲙⲉ ⲛⲛⲓⲙ ⲁⲩⲱ ⲛⲧⲕ ⲟⲩ ⲉⲃⲟⲗ ⲧⲱⲛ ⲡⲉϫⲁϥ ϫⲉ ⲁⲛⲅ ⲟⲩϣⲏⲣⲉ ϣⲏⲙ ⲛⲣⲉⲙⲛⲕⲏⲙⲉ ⲉⲁⲛⲅ ⲡϩⲙϩⲁⲗ ⲛⲟⲩⲣⲱⲙⲉ ⲛⲁⲙⲁⲗⲏⲕⲓⲧⲏⲥ ⲡⲁϫⲟⲉⲓⲥ ⲇⲉ ⲁϥⲛⲟϫⲧ ⲛⲥⲱϥ ⲉⲃⲟⲗ ϫⲉ ⲁⲓϣⲱⲛⲉ ⲁⲛⲟⲕ ⲉⲡⲁϣⲟⲙⲛⲧ ⲡⲟⲟⲩ

30:14  ⲁⲩⲱ ⲁⲛⲟⲛ ⲁⲛⲃⲱⲕ ⲉⲡⲥⲁ ⲙⲡⲣⲏⲥ ⲙⲡⲉⲭⲟⲗⲑⲓ ⲁⲩⲱ ⲉⲣⲉⲛ ⲛⲉⲙⲟⲉⲓⲧ ⲛⲧⲓⲟⲩⲇⲁⲓⲁ ⲁⲩⲱ ⲉⲣⲉⲙ ⲡⲥⲁ ⲙⲡⲣⲏⲥ ⲛⲭⲉⲗⲟⲩⲃ ⲁⲩⲱ ⲉⲥⲉⲕⲉⲗⲁⲕ ⲁⲛⲣⲟⲕϩⲥ ϩⲛ ⲟⲩⲥⲁⲧⲉ

30:15  ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲕⲛⲁⲉϣϫⲓⲧ ⲉϫⲙ ⲡⲓⲅⲉⲇⲇⲟⲩⲣ ⲡⲉϫⲉⲡϩⲙϩⲁⲗ ⲛⲁϥ ϫⲉ ⲱⲣⲕ ⲙⲡⲛⲟⲩⲧⲉ ⲉⲧⲙⲙⲟⲟⲩⲧ ⲁⲩⲱ ⲉⲧⲙⲡⲁⲣⲁⲇⲓⲇⲟⲩ ⲙⲙⲟⲓ ⲉⲧⲟⲟⲧϥ ⲙⲡⲁϫⲟⲉⲓⲥ ⲁⲩⲱ ϯⲛⲁϫⲓⲧⲕ ⲉϩⲣⲁⲓ ⲉϫⲙ ⲡⲓⲅⲉⲇⲇⲟⲩⲣ

30:16  ⲁϥϫⲓⲧ ⲇⲉ ⲉⲡⲙⲁ ⲉⲧⲙⲙⲁⲩ ⲁⲩⲱ ⲉⲓⲥ ϩⲏⲏⲧⲉ ⲛⲧⲟⲟⲩ ⲉⲩⲛⲏϫ ⲉϫⲙ ⲡϩⲟ ⲙⲡⲕⲁϩ ⲧⲏⲣϥ ⲉⲩⲟⲩⲱⲙ ⲁⲩⲱ ⲉⲩⲥⲱ ⲉⲩⲣⲁϣⲉ ⲉⲃⲟⲗ ϩⲛ ⲛⲉϣⲟⲗⲥ ⲧⲏⲣⲟⲩ ⲛⲧⲁⲩϫⲓⲧⲟⲩ ⲉⲃⲟⲗ ϩⲙ ⲡⲕⲁϩ ⲛⲛⲁⲗⲗⲟⲫⲩⲗⲟⲥ ⲁⲩⲱ ⲉⲃⲟⲗ ϩⲙ ⲡⲕⲁϩ ⲛⲓⲟⲩⲇⲁ

30:17  ⲇⲉ ⲁϥⲡⲱⲧ ⲉϩⲣⲁⲓ ⲉϫⲱⲟⲩ ⲁϥⲡⲁⲧⲁⲥⲥⲉ ⲙⲙⲟⲟⲩ ⲛϫⲓⲛ ⲉⲡⲛⲁⲩ ⲛϣⲱⲣⲡ ϣⲁ ⲡⲛⲁⲩ ⲛⲣⲟⲩϩⲉ ⲁⲩⲱ ⲙⲡⲉϥⲣⲁⲥⲧⲉ ⲙⲡⲉⲟⲩⲣⲱⲙⲉ ⲛⲟⲩⲱⲧ ⲟⲩϫⲁⲓ ⲛϩⲏⲧⲟⲩ ⲛⲥⲁ ϥⲧⲟⲟⲩ ⲛϣⲉ ⲛⲣⲱⲙⲉ ⲛϣⲏⲣⲉ ϣⲏⲙ ⲛⲧⲁⲩⲁⲗⲏ ⲉⲛϭⲁⲙⲟⲩⲗ ⲁⲩⲡⲱⲧ

30:18  ⲇⲁⲩⲉⲓⲇ ⲇⲉ ⲁϥϥⲓ ⲛⲉⲛⲧⲁⲩϥⲓⲧⲟⲩ ⲧⲏⲣⲟⲩ ⲛϭⲓ ⲛⲁⲙⲁⲗⲏⲕⲓⲧⲏⲥ ⲁⲩⲱ ⲑⲓⲙⲉ ⲥⲛⲧⲉ ⲛⲇⲁⲩⲉⲓⲇ ⲁϥϫⲓⲧⲟⲩ

30:19  ⲙⲡϥⲕⲁⲗⲁⲁⲩ ⲉⲡⲁϩⲟⲩ ⲛϩⲏⲧⲟⲩ ⲛϫⲓⲛ ⲡⲉⲩⲕⲟⲩⲓ ϣⲁ ⲡⲉⲩⲛⲟϭ ⲁⲩⲱ ⲉⲃⲟⲗ ϩⲛ ⲛⲉϣⲱⲗ ⲧⲏⲣⲟⲩ ⲙⲛ ⲛⲉⲩϣⲏⲣⲉ ⲙⲛ ⲛⲉⲩϣⲉⲉⲣⲉ ⲁⲩⲱ ⲛⲉⲛⲧⲁⲩϥⲓⲧⲟⲩ ⲧⲏⲣⲟⲩ ⲉⲛⲕⲁ ⲛⲓⲙ ⲇⲁⲩⲉⲓⲇ ⲁϥⲕⲧⲟⲟⲩ

30:20  ⲁⲩⲱ ⲁϥϫⲓ ⲛⲛⲉⲩⲉⲥⲟⲟⲩ ⲧⲏⲣⲟⲩ ⲙⲛ ⲛⲉⲩⲉϩⲟⲟⲩ ⲁⲩϩⲣⲁ ⲙⲙⲟⲟⲩ ϩⲓⲑⲏ ⲛⲛⲉϣⲱⲗ ⲁⲩⲱ ⲛϣⲱⲗ ⲉⲧⲙⲙⲁⲩ ⲛⲉϣⲁⲩϫⲟⲟⲥ ⲉⲧⲃⲏⲏⲧⲟⲩ ϫⲉ ⲛⲁⲓ ⲛⲉ ⲛⲉϣⲟⲗⲥ ⲛ

30:21  ⲁⲩⲱ ⲇⲁⲩⲉⲓⲇ ⲁϥⲉⲓ ⲉⲣⲁⲧⲟⲩ ⲙⲡϣⲏⲧ ⲛⲣⲱⲙⲉ ⲉⲧⲙⲡⲟⲩϭⲙϭⲟⲙ ⲉⲟⲩⲁϩⲟⲩ ⲛⲥⲁ ⲁⲗⲗⲁ ⲁϥⲑⲙⲥⲟⲟⲩ ϩⲙ ⲡⲉⲭⲉⲓⲙⲁⲣⲟⲥ ⲛⲃⲉⲁⲛⲁ ⲁⲩⲉⲓ ⲇⲉ ⲉⲃⲟⲗ ϩⲏⲧϥ ⲛ ⲁⲩⲱ ⲉⲃⲟⲗ ϩⲏⲧϥ ⲙⲡⲗⲁⲟⲥ ⲉⲧⲛⲙⲙⲁϥ ⲇⲁⲩⲉⲓⲇ ⲇⲉ ⲁϥⲡⲱϩ ⲉⲡⲗⲁⲟⲥ ⲁⲩⲱ ⲁϥϣⲁϫⲉ ⲛⲙⲙⲁⲩ ϩⲛ ⲟⲩⲉⲓⲣⲏⲛⲏ

30:22  ⲁⲩⲟⲩⲱϣⲃ ⲇⲉ ⲛϭⲓ ⲣⲱⲙⲉ ⲛⲓⲙ ⲙⲡⲟⲛⲏⲣⲟⲥ ⲁⲩⲱ ⲗⲟⲓⲙⲟⲥ ⲛⲓⲙ ⲛⲣⲱⲙⲉ ⲉⲃⲟⲗ ϩⲛ ⲛⲣⲱⲙⲉ ⲛⲣⲉϥⲙⲓϣⲉ ⲛⲧⲁⲩⲃⲱⲕ ⲉⲃⲟⲗ ⲙⲛ ⲇⲁⲩⲉⲓⲇ ⲉⲩϫⲱ ⲙⲙⲟⲥ ϫⲉ ⲉⲃⲟⲗ ϫⲉ ⲙⲡⲟⲩⲉⲓ ⲉⲃⲟⲗ ⲛⲙⲙⲁⲛ ⲛⲧⲛⲛⲁϯ ⲛⲁⲩ ⲁⲛ ⲉⲃⲟⲗ ϩⲛ ⲛⲉϣⲱⲗ ⲛⲁⲓ ⲛⲧⲁⲛϫⲓⲧⲟⲩ ⲁⲗⲗⲁ ⲙⲁⲣⲉⲡⲟⲩⲁ ⲡⲟⲩⲁ ϫⲓ ⲛⲧⲉϥⲥϩⲓⲙⲉ ⲙⲛ ⲛⲉϥϣⲏⲣⲉ ⲛⲥⲉⲧⲱⲟⲩⲛ ⲛⲥⲉⲃⲱⲕ

30:23  ⲡⲉϫⲉ ⲛⲁⲩ ϫⲉ ⲛⲧⲉⲧⲛⲛⲁⲉⲓⲣⲉ ⲁⲛ ϩⲓⲛⲁⲓ ⲙⲡⲉⲓⲧⲱϣ ⲙⲛⲛⲥⲁ ⲉⲧⲣⲉⲡϫⲟⲉⲓⲥ ⲧⲁⲁⲩ ⲉϩⲣⲁⲓ ⲉⲧⲟⲟⲧⲛ ⲛϥϩⲁⲣⲉϩ ⲉⲣⲟⲛ ⲁⲩⲱ ⲡⲉⲓⲅⲉⲇⲇⲟⲩⲣ ⲏ ⲡⲉⲓⲙⲏⲏϣⲉ ⲛⲧⲁϥⲉⲓ ⲉϩⲣⲁⲓ ⲉϫⲱⲛ ⲉⲁϥⲧⲁⲁⲩ ⲉϩⲣⲁⲓ ⲉⲧⲟⲟⲧⲛ

30:24  ⲁⲩⲱ ⲛⲓⲙ ϭⲉ ⲡⲉⲧⲛⲁⲥⲱⲧⲙ ⲛⲥⲁ ⲛⲉⲧⲛϣⲁϫⲉ ⲉⲧⲉⲛⲁⲓ ⲛⲉ ϫⲉ ⲛⲉⲓⲣⲱⲙⲉ ⲛⲥⲉⲑⲃⲃⲓⲏⲩ ⲁⲛ ⲉⲣⲱⲧⲛ ϫⲉ ⲕⲁⲧⲁ ⲡϣⲓ ⲛⲧⲧⲟ ⲙⲡⲉⲛⲧⲁϥⲉⲓ ⲉⲃⲟⲗ ⲉⲡⲡⲟⲗⲩⲙⲟⲥ ⲉⲥⲛⲁϣⲱⲡⲉ ϩⲱⲱϥ ⲛⲛⲉⲧϩⲙⲟⲟⲥ ϩⲁⲧⲛ ⲛⲉⲥⲕⲉⲩⲏ ⲉⲛⲛⲁⲡⲱϣ ⲉϫⲱⲟⲩ ⲕⲁⲧⲁ ⲡⲉⲓⲧⲱϣ

30:25  ⲁⲩⲱ ⲁⲡⲉⲓⲧⲱϣ ϣⲱⲡⲉ ⲉⲩⲡⲣⲟⲥⲧⲁⲅⲙⲁ ⲙⲛ ⲟⲩⲇⲓⲕⲁⲓⲱⲙⲁ ϩⲙ ⲡ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ

30:26  ⲇⲉ ⲁϥⲓ ⲉϩⲣⲁⲓ ⲉⲥⲉⲕⲉⲗⲁⲕ ⲁⲩⲱ ⲁϥϫⲟⲟⲩ ⲉⲃⲟⲗ ϩⲛ ⲛⲉϣⲟⲗⲥ ⲛⲛⲉⲡⲣⲉⲥⲃⲩⲧⲉⲣⲟⲥ ⲛⲓⲟⲩⲇⲁ ⲙⲛ ⲛⲉⲕⲟⲟⲩⲉ ⲧⲏⲣⲟⲩ ⲉⲧϩⲏⲛ ⲉⲣⲟϥ ⲉϥϫⲱ ⲙⲙⲟⲥ ⲛⲁⲩ ϫⲉ ⲉⲓⲥ ϩⲏⲏⲧⲉ ⲁⲓⲧⲛⲛⲟⲟⲩ ⲛⲏⲧⲛ ⲛⲟⲩⲥⲙⲟⲩ ⲉⲃⲟⲗ ϩⲛ ⲛⲉϣⲟⲗⲥ ⲛⲛϫⲁϫⲉ ⲙⲡϫⲟⲉⲓⲥ

30:27  ⲛⲉⲧϩⲛⲃⲁⲓⲑⲥⲟⲩⲣ ⲙⲛ ⲛⲉⲧϩⲛϩⲣⲁⲙⲁ ⲙⲡⲣⲏⲥ ⲙⲛ ⲛⲉⲧϩⲛ ⲓⲉⲑⲑⲟⲣ

30:28  ⲙⲛ ⲛⲉⲧϩⲛⲁⲣⲟⲏⲣ ⲙⲛ ⲛⲉⲧϩⲛⲁⲙⲙⲁⲇⲓ ⲙⲛ ⲛⲉⲧϩⲛⲥⲁⲫⲓ ⲙⲛ ⲛⲉⲧϩⲉⲛⲉⲥⲑⲓⲉ

30:29  ⲙⲛ ⲛⲉⲧϩⲉⲛ ⲡⲕⲁⲣⲙⲏⲗⲟⲥ ⲙⲛ ⲛⲉⲧϩⲛⲙⲡⲟⲗⲓⲥ ⲙⲡ ⲙⲛ ⲛⲉⲧϩⲛⲙⲡⲟⲗⲓⲥ ⲛⲕⲉⲛⲉⲍⲓ

30:30  ⲙⲛ ⲛⲉⲧϩⲛϩⲓⲉⲣⲓⲙⲟⲩⲑ ⲙⲛ ⲛⲉⲧϩⲛⲃⲏⲣⲥⲁⲃⲉⲉ

30:31  ⲙⲛ ⲛⲉⲧϩⲛⲭⲉⲃⲣⲱⲛ ⲁⲩⲱ ⲉⲙⲙⲁ ⲧⲏⲣⲟⲩ ⲛⲧⲁⲇⲁⲩⲉⲓⲇ ⲃⲱⲕ ⲉⲃⲟⲗ ⲛϩⲏⲧⲟⲩ ⲛⲧⲟϥ ⲙⲛ ⲛⲉϥⲣⲱⲙⲉ