Kapingamarangi - II Samuel - 14

14:1  Joab e-iloo-ia bolo David e-hidihidi huoloo i dana dama-daane go Absalom,

14:2  gei Joab ga-gahi-aga dana dama-ahina kabemee dela e-noho i Tekoa. Gei di ahina ga-dau-mai, gei Joab ga-helekai gi mee, “Heia goe be tangada e-noho i-lodo di manawa-gee huoloo. Ulu i-nia gahu manawa-gee, hudee dala-ina nia ngaahulu o do libogo, heia goe gii-hai be-di ahina e-noho lodo-huaidu huoloo i-di madagoaa looloo.

14:3  Gei goe gaa-hana gi-baahi di king ga-helekai i agu helekai ala gaa-hai-adu gi-di-goe.” (Gei Joab gaa-hai gi mee di mee dela bolo gi-helekai-ai.)

14:4  Di ahina la-gaa-hana gi-baahi di king, ga-dogoduli-iha gi-hongo nia gelegele, ga-helekai, “Meenei, goe dumaalia-mai.”

14:5  Di king ga-heeu-adu, “Ma di-aha dela e-hiihai ginai goe?” Gei mee ga-helekai, “Au di ahina hagaloale, guu-made dogu lodo.

14:6  Meenei, agu dama-daane dogolua, di laangi e-dahi gei meemaa gu-heebagi i-lodo henua, di gowaa ono gau e-daa meemaa ai, ge e-dahi i meemaa guu-made.

14:7  Dolomeenei, digau huogodoo dogu madahaanau gu-hai-baahi mai gi-di-au, digaula e-hai-hai-mai gi-wanga-ina dagu dama gi ginaadou e-daaligi gii-made, idimaa mee dela ne-daaligi dono duaahina. Maa tangidangi digaula la-gaa-gila, gei au ga-modogoau-hua, dagu dama-daane ai. Digaula ga-haga-huaidu dogu hagadagadagagee hagaodi, gei tangada e-dadaahi di ingoo o dogu lodo gi-muli ai.”

14:8  Di king ga-helekai, “Hana gi doo hale, au ga-hagamaamaa goe i-di hai deenei.”

14:9  Di ahina ga-helekai, “Meenei nia mee huogodoo ala ma-gaa-hai kooe, gimaadou mo dogu madahaanau ala gaa-dau gi-di mee huaidu deenei. Goe mo do madahaanau hagalee dau gi-di hai deenei.”

14:10  Di king ga-helekai, “Maa tangada bolo ia e-haga-huaidu goe, gei goe gi-haga-iloo-ina mai gi-di-au, gei di-maa ga-hagalee haga-deaadee goe labelaa.”

14:11  Gei di ahina ga-helekai, “Meenei, dalodalo gi Dimaadua go doo God, bolo tangada i dogu madahaanau dela ga-hagaanga ginai di hala o tama-daane dela ne-made, gi-dee-hai labelaa di huaidu e-daaligi dagu dama-daane dela i-golo.” David ga-helekai, “Au e-hagababa i-di ingoo Dimaadua dela e-mouli, bolo dau dama-daane hagalee doo gi-lodo di haingadaa.”

14:12  Di ahina ga-helekai, “Meenei, goe gi-dumaalia-mai bolo au gi-helekai di mee dela i-golo.” Gei David ga-helekai gi mee, “Helekai.”

14:13  Di ahina ga-helekai, “Goe e-aha dela guu-hai tagadilinga hala ang-gi nia daangada a God? Goe hagalee dumaalia ang-gi dau dama-daane gi-hanimoi labelaa i dono gowaa dela ne-lele hagammuni ginai, malaa, goe e-bida e-hagamodu goe gii-hai be au helekai aanaa dogo helekai-iei goe.

14:14  Gidaadou huogodoo digau ala belee mmade. Gidaadou e-hai gadoo be nia wai ala ne-dui gi-hongo nia gelegele dela e-deemee di-hagabudu-mai labelaa gi-di gowaa e-dahi. God hagalee e-laha-mai labelaa digau ala guu-mmade gi-lodo di mouli dolomeenei, gei-ogo di king e-mee di-laha-mai labelaa tangada dela ne-lahi gi-daha.

14:15  Deenei laa, meenei di king, tadinga o dogu hanimoi gi do baahi, idimaa nia daangada gu-hagamahi-mai, gei au ga-hagamaanadu bolo au e-hanadu gi do baahi i-di hagadagadagagee bolo goe ga-haga-gila-aga dagu mee dela e-madau-adu gi-di-goe.

14:16  Au e-hagamaanadu bolo goe ga-hagalongo-mai laa gi-di-au ga-hagamouli au gi-daha mo tangada dela e-hagamada bolo ia e-daaligi au mo dagu dama-daane, gaa-hai gimaua gi-hagalee i tenua dela ne-gaamai go God.

14:17  Meenei, au gu-hagamaanadu bolo dau hagababa ga-haga-dagaloaha au, idimaa di king le e-hai gadoo be tangada di-langi o God, e-mee di-wwae gi-daha nia mee huaidu mo nia mee humalia. Dimaadua go doo God gi-madalia goe!”

14:18  Di king ga-helekai, “Au ga-heeu-adu gi-di-goe di heeu deenei, gei goe gi-helekai donu mai gi-di-au.” Di ahina ga-helekai, “Meenei, goe e-mee di-heeu-mai au mee huogodoo.”

14:19  Di king ga-heeu, “Ma go Joab dela ne-hagi-adu gi-di-goe au mee huogodoo bolo gi-heia kooe?” Gei di ahina ga-helekai, “Meenei, au e-hagamodu i-nia mee dabu huogodoo, dagu mee e-dahi e-mee dagu hai bolo au gi-de-helekai gi au heeu ai. E-donu, ma go dau dagi-dauwa Joab dela ne-hagi-mai nia mee ala belee helekai-iei au.

14:20  Mee ne-hai di mee deenei belee haga-donu di mee deenei. Dogu dagi aamua dela koia e-kabemee, e-hai gadoo be tangada di-langi o God, gei e-iloo huoloo nia mee huogodoo ala ne-hai.”

14:21  Nomuli gei di king ga-helekai gi Joab, “Au gu-hagababa-aga i ogu lodo bolo au ga-haga-gila dau mee dela e-hiihai ginai. Hana-laa, laha-mai tama-daane go Absalom gi kinei.”

14:22  Joab ga-dogoduli-iha gi-hongo nia gelegele i-mua nnadumada o David, ga-helekai, “God la-gi-hagahumalia-ina goe, meenei dogu dagi di king. Dolomeenei gei au gu-iloo bolo goe gu-tenetene mai gi-di-au, i-di-goe dela gu-haga-gila dagu dangidangi.”

14:23  Gei mee gaa-hana gi Geshur, ga-laha-mai a Absalom gi Jerusalem.

14:24  Di king gaa-hai bolo Absalom la-gi-hudee noho i-lodo di hale king, gei gu-helekai labelaa bolo ia hagalee e-hiihai e-heetugi gi mee. Malaa, Absalom nogo noho-hua i dono hale, digi hana-loo gi-mua nnadumada o-di king.

14:25  Tangada i Israel e-madanga gei e-humalia dono huaidina be Absalom ai, e-daamada i dono libogo gaa-tugi i ono babaawae.

14:26  Nia ngaahulu o dono libogo koia e-maadolu huoloo, gei e-dahi hagadahi i-di ngadau e-dahi, ma-gaa-tomo gaa-lloo. Nia ngaahulu aalaa le e-daamaha nia pauna e-lima, ma-ga-pauna i-di mee-pauna-mee o tenua deelaa.

14:27  Absalom ana dama-daane dogodolu, gei dana dama-ahina hua e-dahi, dono ingoo go Tamar, tama-ahina madanga huoloo.

14:28  Absalom nogo noho i Jerusalem i-nia ngadau e-lua, digi mmada-loo gi-di king,

14:29  gei mee ga-haga-iloo gi Joab bolo mee gi-hanimoi e-hana e-pono ia, e-heetugi gi-di king. Malaa, Joab la-digi hanimoi. Absalom gaa-hai labelaa dana hegau gi mee, gei Joab e-haga-balumee-hua, digi hanimoi.

14:30  Malaa, Absalom gaa-hai gi ana gau hai-hegau boloo, “Mmada, di hadagee a Joab la i-baahi hua dagu hadagee, dela e-tomo-ai nia ‘barley’ no-lodo. Hula, duungia.” Gei digaula guu-hula guu-dudu di hadagee-‘barley’ deelaa.

14:31  Gei-ogo Joab gaa-hana gi-di hale o Absalom, ga-heeu, “Au gau hai-hegau la-ne-dudu dagu hadagee eimaha?”

14:32  Absalom ga-helekai, “Idimaa goe digi hanimoi gi dagu hegau dela ne-hai-adu. Au ne-hiihai bolo goe gii-hana e-pono au, e-hai dagu heeu gi-di king boloo, ‘Ma di-aha ne-hai, dela au gu-diiagi di waahale go Geshur, ga-hanimoi gi kinei? Di mee dela e-mada-humalia mai gi-di-au, la-go dogu noho i-golo.’ ” Absalom ga-helekai labelaa, “Au e-hiihai bolo goe gi-heia dogu madagoaa e-heetugi gi-di king. Maa au gu-ihala, gei mee gi-daaligi au gii-made!”

14:33  Gei Joab gaa-hana gi-di king go David, ga-hagi-anga nia helekai Absalom ala ne-hai. Gei di king gaa-hai dana hegau gi Absalom, gei Absalom gaa-hana gi mee, ga-dogoduli-iha gi-hongo nia gelegele i-mua di king, gei di king guu-hila ang-gi mee, guu-hongi a-mee.