LinVB - Job - 2

2:1  Mokolo mosusu banzelu ba Nzambe babimi o miso ma Nzambe ; Satana mpe azalaki o kati ya bango.

2:2  Nzambe alobi na Satana : « Outi wapi ? » Satana azongisi : « Nauti kotambola mpe kolekaleka o mokili. »

2:3  Mpe Nzambe atuni Satana : « Bongo omonoki mosaleli wa ngai Yob ? O mokili mobimba moto mosusu lokola ye azali te : moto malamu mpe wa motema bosembo, moto azali kobanga Nzambe mpe kokima masumu ; azali na molende mingi. Osengeki ngai se mpamba mpenza ’te nabotolo biloko bya ye ! »

2:4  Satana azongisi : « Nzoto ezali eloko enene ! Moto akoki kotika biloko binso bizali na ye mpo ya kobikisa nzoto.

2:5  Tombola se loboko, tindela ye mpasi o nzoto, okomono ’te akotombela yo bobe o miso ma yo. »

2:6  Nzambe alobi na Satana : « Likambo te, sala na ye lokola olingi, kasi oboma ye te. »

2:7  Mpe Satana alongwi o miso ma Yawe. Abelisi Yob makwanza mabe o nzoto mobimba, banda motó tee makolo.

2:8  Yob akamati eteni ya mbeki ebolani, akwanyi na yango nzoto mpe akei kofanda o kati ya mputulu.

2:9  Sikawa mwasi wa ye abandi koswanisa ye, alobi : « Naino olembi te ? Olingi bobele Nzambe wa yo ? Malamu otombela ye bobe mpe okufa ! »

2:10  Yob azongisi : « Olobi lokola mwasi zoba ; soko toya­mbi malamu manso Nzambe akokabelaka biso, mpo nini toboya koyamba mpasi ? » O kati ya mpasi iye inso, Yob alobi eloko yoko te.

2:11  Baninga basato ba Yob bayoki nsango ya mabe manso makweli ye. Balongwi o mboka ya bango : Elifas, moto wa Tema, Bildad, moto wa Sua, mpe Sofar, moto wa Naamat. Bayokani ’te bakende kotala mpe kobondo ye.

2:12  Ezali bango naino mosika, batali ye kasi bayebi ye lisusu te. Bongo babandi kolela mingi ; bapasoli bilamba bya bango mpe bamitii mputulu o motó.

2:13  Bafandi o mabelé, penepene na ye ; batikali wana mikolo nsambo butu moi. Moto moko alobi liloba te, zambi bamoni ’te mpasi eleki.