LinVB - Job - 10

10:1  Bomoi bwa ngai boyokisi ngai mpi, nakotika te kolela mpasi ya ngai, nakosakola makambo ma ngai na motema bololo.

10:2  Nakoloba na Nzambe : Okitisa ngai te, oyebisa ngai mpo nini osali ngai bongo.

10:3  Oyoki esengo awa olakisi ngai motema libanga ? Oboyi nde ekelamo okelaki na maboko ma yo ? Olingi kolongisa bato babe o makambo ma bango ?

10:4  Ozali nde na miso lokola bato ? Okotalaka makambo se lokola bato ?

10:5  Okokufa nde lokola bato bakokufaka ? Mpe okoumelaka lokola bato, mwa mibu ?

10:6  Bongo, mpo nini ozali kososolo mabe ma ngai, mpe olingi koyeba masumu ma ngai ?

10:7  Oyebi malamu ’te nazali na likambo te, mpe moto moko te akoki kobikisa ngai o maboko ma yo.

10:8  Yo moto oyemaki ngai mpe okelaki ngai na maboko ma yo, sikawa oboyi ngai mpe olingi koboma ngai !

10:9  Kanisa ’te okelaki ngai na mabelé libazi, mpe okozongisa ngai lisusu o mabelé.

10:10  Okelaki ngai na mai mpembe lokola mabéle, okaukisaki mango makangema lokola mbika ilambami ;

10:11  na nsima opesi ngai nzoto ezali na nsuni, lomposo, minkuwa na minsisa.

10:12  Yo moko opesi ngai bomoi, na bokasi bwa yo obateli mpema ya ngai.

10:13  Kasi, o kati ya motema obombelaki ngai likambo, nayebi malamu ’te ozalaki na makanisi masusu :

10:14  olingaki kotala malamu soko nakosala mabe, mpe kolimbisa ngai lisumu lyoko te.

10:15  Bongo soko nasali mabe solo, mawa na ngai ! Soko nasali mabe te, nakoki kotombola motó te, zambi nayoki nsoni mpo ya mpasi eleki.

10:16  Soko nameki koteleme, okokanga ngai lokola nkosi, mpe okokoba kolakisa bokasi bwa yo.

10:17  Okofunda ngai na makambo masusu, mpe okolakisa ngai bobele nkanda enene ya yo ; na nguya ya sika okobimela ngai.

10:18  Mpo nini obimisi ngai o libumu lya mama ? Mbele nakufaki liboso ’te moto moko amono ngai.

10:19  Mbele sikawa nazalaki te, mbele batiaki ngai o lilita ntango nabimaki o libumu.

10:20  Ngai e ! Mikolo mya ngai mizali se moke ; bongo tika ngai, nayoka mwa esengo,

10:21  liboso ’te nakende o esika bakozongaka lisusu te, o mboka ya bawa mpe ya molili tuu,

10:22  esika ezali molili mpe mobulu, esika mwinda moulani na molili makasi.