LinVB - Job - 33

33:1  A Yob, ndima koyoka maloba ma ngai, tia matoi na maloba ma ngai manso.

33:2  Yoka ngai oyo nabandi koloba, lolemu loningani o kati ya monoko.

33:3  Nakoloba se na motema bosembo mpenza, monoko mwa ngai mokosakola se makambo ma solo.

33:4  Bobele mpema ya Nzambe epesi ngai bomoi, se Nzambe wa bokasi akobatelaka ngai.

33:5  Soko okoki, oyanola ngai, omilengele mpo tomekana biso na yo.

33:6  Tala, o miso ma Nzambe biso na yo tokokani, nakelami na mabelé lokola yo.

33:7  Bongo, ntina obanga ngai ezali te, ondima te ’te nakangisa yo monoko.

33:8  Boniboni okokaki koloba na ngai, solo, nayoki yango malamu :

33:9  « Motema mozali peto, nasali lisumu lyoko te, nazali na mbindo te, na likambo lyoko te.

33:10  Kasi Nzambe afundi ngai se mpamba, atali ngai lokola monguna wa ye.

33:11  Akangi makolo ma ngai na minyololo, akengeli ngai bisika binso nazali kokende ? »

33:12  Solo, nalobi na yo : Olongi te, zambi Nzambe aleki bato na bonene.

33:13  Mpo nini ozali kowela ntembe na ye ? Mpo ayanoli ata motuna moko mwa yo te ?

33:14  Nzokande Nzambe azali koloba na biso mbala na mbala, kasi tokokebaka te.

33:15  Azali koloba na ndoto to na limoni lya butu, o ntango mpongi ekangi bato makasi, o ntango bato balali o mbeto ya bango.

33:16  O ntango ena akoya kofungola matoi ma bango mpe akoyokisa makebisi alingi kokebisa bango,

33:17  mpo ’te moto atika misala mibe minso, atika mpe lolendo la ye.

33:18  Akokebisaka bongo moto na liwa, mpe akosalisaka ye asuka o bozindo bwa libulu te.

33:19  Mbala esusu akokebisa ye na mpasi o mbeto ; ntango molunge mozali kolengisa nzoto ya ye,

33:20  ayoki mposa ya kolia lisusu te mpe aboyi ata biloko elengi.

33:21  Bato banso bamoni ’te azali kokondo, minkuwa mizalaki komonono te mibimi polele.

33:22  Akomi penepene na libulu, bomoi bwa ye bokomi pene na mboka ya bawa.

33:23  O ntango ena anzelu molobeli atelemi pene na ye, mosalisi aponomi o ntei ya banzelu nkoto yoko, oyo akolakisa ye nzela nini asengeli kolanda,

33:24  oyo akoki koyokela ye mawa mpe koloba : « Bikisa ye akita o libulu te, namoni maye makoki kosikola ye ! »

33:25  O mokolo mona akozwa lisusu bokasi bwa bolenge, akozongela bonzenga bwa ye.

33:26  Akosambela Nzambe mpe Nzambe akondimela ye, akomono elongi ya Nzambe mpe akosepela mingi, zambi Nzambe akofuta bato malamu manso basali.

33:27  Akoyemba o miso ma bato mpe akoloba : « Nasalaki masumu, nabukaki mibeko, kasi ye azongiseli ngai mabe te.

33:28  Asikoli molimo mwa ngai nakita o libulu te, mwinda mokongengele ngai lisusu. »

33:29  Solo, Nzambe akosalaka moto bongo, mbala ibale to mbala isato,

33:30  mpo ’te abikisa ye o libulu mpe mwinda mwa bomoi mongengele ye.

33:31  Keba, Yob, yoka ngai malamu, kanga monoko, naloba naino.

33:32  Soko ozali na mwa liloba, yanola ngai, loba, zambi nalingi kolongisa yo.

33:33  Soki te, ndima koyoka ngai, fanda nye, nakolakisa yo bwanya bwa solo.