LinVB - Job - 41

41:1  Oyo akanisi ’te akolonga yango, azali komikosa ; bobele kotala yango na miso, ekoyokisa ye nsomo.

41:2  Moto moko te akomeka kolamusa yango. Bongo nani akokoka komeka yango ?

41:3  Oyo akobanga te kobundisa yango, nakofuta ye binso bizali na ngai.

41:4  Tala mpe binama bya ngando, bokasi na mpe kitoko ya nzoto ya yango.

41:5  Nani ameki kofungola lomposo la libumu lya yango ? Nani akotisi loboko o kati ya mbanga ya yango ?

41:6  Nani afungoli bizibeli bya monoko mwa yango ? Mino manene ma yango, nsomo mpenza !

41:7  Mokongo mwa yango, lokola nguba itandani, biteku bya yango bikangani makasi,

41:8  bizali na lidusu lyoko te, ata mwa mompepe mokoki koleka o kati te.

41:9  Biteku binso bya yango bisimbani malamu, bikangani mpe bikoki kokabwana te.

41:10  Soko ekosoli, moi mongengisi nsoi ya yango, miso ma yango mazali lokola moi mwa ntongo.

41:11  Na monoko ekosanzaka minkalali, mpe ekobimisa mintentei mya móto.

41:12  Molinga mpe mokobima o zolo lya yango, lokola mokobimaka o lisasu lizali na móto.

41:13  Na mpema ya yango ekopelisa makala, móto mokobimaka o monoko mwa yango.

41:14  Bokasi bwa yango, nkingo ya yango, esika ezali, banso bayoki nsomo.

41:15  Nsuni ya yango ezali na minsisa minene, mikangemi makasi, mikoki kolongwa soki te.

41:16  Motema mwa yango bokasi lokola libanga, lokola libanga lya masini ma konika fufu.

41:17  Soko etelemi, bilima binso bibangi, mpe nsomo enene epanzi byango.

41:18  Soko obeti yango na mopanga, okolonga yango te ; na likongo, na mbeli, na likula se bongo.

41:19  Ekotalaka ebende lokola lititi mpamba mpe nzete ya mbengi lokola nkoni ekauki.

41:20  Makula ma litimbo makokimisa yango te, ekomonoko mabanga ma bilingongo lokola matiti

41:21  mpe nzete ya likwangola lokola nkekele ; ekosekeke lokito la mopanga.

41:22  Libumu lya yango lizali na nzube, lokola esaleli ekopasolaka mabelé.

41:23  Ekoningisaka mai lokola mai matoki o nzungu, ekokomisaka mbu lokola lisasu litoki na móto.

41:24  Esika yango eleki, etiki lokola nzela ya mwinda, mbu ekomi lokola ezipami na elamba mpembe.

41:25  Awa o mokili nyama eleki ngando ezali te, ngando ekobangaka eloko te.

41:26  Ekobangaka te kobundisa ata nyama inene, ezali mokonzi wa nyama inso ya mai mpe ya zamba.