LinVB - Job - 35

35:1  Eliu abakisi naino maloba maye :

35:2  Okanisi solo ’te yo moto olongi, awa olobi : « Nazali moto semba o miso ma Nzambe »,

35:3  mpe : « Lisumu lya ngai likosala ye nini » ?

35:4  Ngai oyo nakozongisela yo eyano, baninga ba yo mpe bayoka yango.

35:5  Tombola miso likolo mpe tala : tala mampata maleki motó mwa yo mosika.

35:6  Solo, lisumu lya yo likosala ye mabe te ? Ata osali mabe nini, ekosala ye nini ?

35:7  Se bongo, na malamu maye osali okopesa ye litomba nini ? Eloko nini okoki kopesa ye ?

35:8  Mabe ma yo makoki koyokisa se bato mpasi, bosembo bwa yo bokosalisa se baninga ba yo.

35:9  Bato bakomilelaka soko minyoko mileki, bakolukaka lisalisi soko bato banene bayokisi bango mpasi.

35:10  Bakolobaka nde : « Wapi Nzambe oyo akelaki biso, Oyo akoyokisaka nzembo ya esengo o kati ya butu,

35:11  Oyo akopesaka biso mayele, leka mayele ma nyama mpe ma ndeke ? »

35:12  Yango wana, ata babeleli ye, akoyanola bango te, mpo baleki lofundo.

35:13  Nzambe aboyi koyoka maloba mazangi ntina, Mokonzi wa bokasi akotiela bango matoi te.

35:14  Boni okoki koloba : « Namoni Nzambe te, nabimisi likambo lya ngai mpe nazali se kozila ye » ?

35:15  To mpe : « Ata mpo ya nkanda ya ye, akopesa ngai etumbu te, atali matumoli ma ngai se mpamba. »

35:16  Yango elakisi ’te Yob azalaki kofungola monoko se mpamba mpe koloba maloba mazangi ntina.