LinVB - Job - 13

13:1  Solo, namoni makambo mana manso na miso, nayoki mango na matoi mpe nayebi ntina.

13:2  Makambo bino boyebi, ngai mpe nayebi mango. Boleki ngai na mayele te.

13:3  Kasi ngai nalingi koloba na Nzambe wa bokasi, nalingi komilongisa o miso ma ye.

13:4  Kasi bino bozali bato ba lokuta, bino banso boyebi kobikisa soki moke te !

13:5  Nani akokangisa bino monoko seko ? Bozwa bongo mwa mayele makoki na bino !

13:6  Nabondeli bino, boyoka ndenge nakosamba mpe nakomeka komilongisa, botia matoi !

13:7  Mpo ya kolongisa Nzambe bolingi nde kokosa mpe koloba maloba ma lokuta ?

13:8  Bolingi kosalisa ye mpe kolongisa ye bongo ?

13:9  Bondimi ’te atala mitema mya bino ? Bokoki nde kokosa ye lokola bakokosaka bato ?

13:10  Ntembe te, akopesa bino etumbu enene, mpo bolingi kondimela ye na bonkutu.

13:11  Bino bobangi bokonzi bwa ye te, nkembo ya ye eyokisi bino nsomo o mitema te ?

13:12  Maloba ma bino mazali se lokola mputulu, biyano bya bino lokola potopoto mpamba.

13:13  Bokanga monoko, botika ngai naloba, ata likambo likosukela ngai boni.

13:14  Nabangi te kokende tee nsuka, nabangi liwa mpe te.

13:15  Akoki koboma ngai ; nazali na elikya esusu te, nzokande nakosamba o miso ma ye.

13:16  Awa nandimi kosamba, nakobika, zambi moto wa lokuta akoki kobima o miso ma ye te.

13:17  Bondima koyoka maloba ma ngai, botia matoi na maye nakoyebisa bino.

13:18  Nakosamba likambo lya ngai, nayebi ’te nasali mabe te.

13:19  Soko moto akoki kokitisa ngai, nakokanga monoko mpe nakokufa.

13:20  Nazali kosenge yo se mpo ibale, bongo nakosengela kokima yo te :

13:21  longola loboko la yo likolo lya ngai, mpe tika kobangisa ngai na makambo ma nsomo.

13:22  Na nsima tuna ngai mpe nakoyanola yo, to soko ngai natuni yo, zongisela ngai eyano.

13:23  Nasali lisumu mpe nabuki mobeko mbala boni ? Yebisa ngai mabe nini nasali !

13:24  Mpo nini obombeli ngai elongi ya yo, mpe otali ngai lokola monguna wa yo ?

13:25  Olingi konyokolo ngai moto nazali se lokasa la nzete, olingi kokimisa ngai lokola lititi likauka ?

13:26  Mpo nini okaneli ngai bitumbu binene boye, mpe okundoli masumu ma ngai ma bolenge ?

13:27  Ntina nini okangi makolo ma ngai na minyololo, okengi ngai bipai binso nazali kokende, mpe omeki kolanda makolo ma ngai ?

13:28  Yeba ’te moto akokufaka lokola nzete epolo kala, to lokola elamba eliami na nsili.