LinVB - Job - 5

5:1  Ata obengi bato, nani akoyanola yo ? Okobenga mosantu nani mpo ’te olonga ?

5:2  Ya solo, zuwa ekoboma moto azangi mayele mpe nkanda ekoboma moto wa bolema.

5:3  Nasili namoni : moto azangi mayele akoki kozwa bolamu, kasi na mbalakaka azali lisusu te.

5:4  Moto moko asalisi bana ba ye te, o esambi bakiti, mpo bazwi molobeli te.

5:5  Moninga akufi na nzala alei mbuma ya bilanga bya ye, babotoli mbuma abombaki o lopango la nzube, mpe bato baluki yango, babotoli nkita ya ye.

5:6  Solo, mabe ma mokili makoutaka o mabelé te mpe makambo ma mpasi makokolaka o nse ya mabelé te.

5:7  Makambo ma mpasi makoutaka se epai ya moto, lokola egondo ekolukaka kopimbwa o likolo mpenza.

5:8  Ngai oyo, ndenabondeli se Nzambe, ndenayebisi ye likambo lya ngai.

5:9  Ye mpenza asalaki misala minene, moto moko akoki kotanga makamwisi ma ye te.

5:10  Ye moto akonokisaka mbula o mabelé, mpe akopesaka bilanga mai.

5:11  Ye moto akotombolaka bato bakiti o nse, akobikisaka baye bazali na mpasi.

5:12  Akobebisaka mikano mya bato ba mayele mabe, mpo ’te makambo ma bango matambola malamu soki te.

5:13  Ye moto akosukisaka bato ba mayele na mabe ma bango moko, mpe akobebisaka likambo bato ba lokuta bakani kosala.

5:14  Na moi mpenza bakangemi na molili, o midi ya moi bazali kotatabana lokola na butu.

5:15  Kasi akobikisa mobola mpo azoka na mopanga te, akolongola ye o mbanga mpe o maboko ma moto monene.

5:16  Mobola akozala na elikya ’te akobika, zambi akokangisa monoko mwa moto wa songisongi.

5:17  Solo, esengo na moto oyo Nzambe apaleli ye ! Oboya likebisi lya Nzambe wa bokasi te !

5:18  Oyo azokisi, akokanga mpe mpota, oyo abeti, akobikisa mpe.

5:19  Mbala motoba akobikisa yo o makambo ma mpasi, mpe mbala ya nsambo mpasi ekokanga yo soki te.

5:20  O eleko ya nzala akobikisa yo o liwa, o ntango ya etumba mopanga mokobete yo te.

5:21  Maloba mabe ma bato makosala yo eloko te, okobanga likambo lyoko libe te.

5:22  Likama linene, nzala makasi : okotala yango mpamba, ata nyama ya zamba, okobanga yango te.

5:23  Mabanga ma elanga makotiela yo libaku te, mpe okoyokana na nyama ya esobe.

5:24  Okofanda na boboto o ema ya yo, okotanga etonga ya yo, mpata yoko ekozanga te.

5:25  Okomono ’te okomi na bankoko baike, bana bakoli lokola matiti ma esobe.

5:26  Mokolo bakokunda yo, okosila kokola mingi, lokola mbuma ya mampa o ntango ya bokati.

5:27  Tosili tomoni makambo mana manso, mazali ma solo, ndima mango mpo ’te obika na mayele mana.