LinVB - Job - 11

11:1  Sofar wa Naamat alobi sikawa :

11:2  Bongo bápesa esopa oyo eyano te ? Okanisi ’te okolonga mpo ya maloba ma yo ebele ?

11:3  Bongo tokanga monoko mpo ya bilobaloba bya yo ? Tozongisela yo liloba te, awa ozali koseke biso ?

11:4  Olobaki : « Ngai nalobi se maloba ma solo, o miso ma yo nazali na likambo lyoko te ! »

11:5  Soko Nzambe alingaki koloba mpe kofungola monoko mpo ’te ayanola yo,

11:6  soko ateyaki yo mibombamo mya bwanya bwa ye, bwanya boye boleki mayele ma bato, mbele mposa ya yo ya kozongisela ye esilaki.

11:7  Okanisi ’te oyebi makanisi ma Nzambe manso mpe makambo manso ma Mokonzi wa bokasi bonso ?

11:8  Aleki likolo mosika ! Bongo okosala nini ? Aleki mboka ya bawa na bozindo ! Bongo okoyeba eloko nini ?

11:9  Mayele ma ye maleki mokili na bolai, maleki mpe mai manso ma mbu na bonene.

11:10  Soko Nzambe ayei kokanga yo, mpe kosambisa yo, nani akopekisa ye ?

11:11  Ye ayebi banani bazali na bosembo te, ayebi mabe ma bato, kasi akebi na yango te.

11:12  Moto zoba akoki koloba maloba ma bwanya te, lokola mpunda ya zamba ekobotaka mpunda ya mboka te.

11:13  Bongo yo, bongola makanisi ma yo, mpe tandela Nzambe maboko ma yo,

11:14  bwaka mosika mabe ma yo manso, boya makambo manso mazangi bosembo.

11:15  Bongo okokoka kolakisa bato elongi, okozala na mpiko mpe okobanga lisusu te.

11:16  Okokanisa mpasi ya yo lisusu te, mpe okobosana yango noki lokola mai mazali koleka.

11:17  Bomoi bokongenge lokola moi mwa midi, molili mokobongwana botani bwa ntongo.

11:18  Okoyeba ’te elikya ezali naino solo, ata obulungani ndolali mpongi malamu.

11:19  Okopema mpe moto moko akotungisa yo te, mpe bato baike bakoluka bondeko na yo.

11:20  Kasi miso ma bato babe makomono se molili, bakomono esika ya kozwa libiki te ; elikya ya bango, se liwa.