LinVB - Job - 40

40:1  Yawe atuni Yob :

40:2  « Olingi kowela ntembe na Nzambe wa bokasi bonso ? Awa ofundi ye, ozali na maloba masusu ? »

40:3  Kasi Yob azongiseli Mokonzi monoko, alobi :

40:4  « Nalobaki na bozoba, sikawa naloba lisusu nini ? Malamu nazipa monoko na loboko.

40:5  Nalobaki mbala yoko, ekoki bongo ; mbala ibale… nakomeka koloba lisusu te. »

40:6  Ut’o kati ya ekumbaki Yawe ayanoli Yob boye :

40:7  Sala makasi lokola moto wa mpiko, nakotuna yo mpe okoyanola ngai.

40:8  Olingi te ’te nakata likambo lya yo ? Olingi kokitisa ngai, yo moko olonga ?

40:9  Ozali na bokasi lokola Nzambe ? Mongongo mwa yo mokokani na nkake ya Nzambe ?

40:10  Soko ya solo, omilakisa na bonene bwa bokonzi, omilatisa na bikembiseli bya nkembo.

40:11  Lakisa nkanda ya yo polele bipai binso, silisa bato ba lolendo na botali bwa yo.

40:12  Bobele na miso mpamba, kitisa bango o nse mpe nyata bato babe na mbala yoko.

40:13  Kimisa bango o nse ya mabelé, kanga bango na minyololo o mboka ya molili.

40:14  Bongo ngai moko nakokumisa yo, zambi ozwi lilonga na bokasi bwa yo moko.

40:15  Oyebi Ngubu, nasali yango lokola nasalaki yo : ngubu ekoliaka matiti lokola ngombe.

40:16  Tala naino bokasi bwa mokongo mwa yango, na mpe minsisa minene o libumu lya yango

40:17  Ekotambolaka yango, ekotelemisaka mokila lokola nzete ya sédere, ezali na minsisa o bibelo, minene lokola nsinga.

40:18  Ezali na minkuwa makasi lokola nzete ya mbengi, ezali na mipanzi lokola bibende batuli.

40:19  Yango nde nsuka ya misala minene Nzambe asalaki, kasi Mozalisi akaneli yango na mopanga.

40:20  Ekoliaka matiti o esobe ya ngomba te, mpe nyama ya zamba ikosakanaka penepene na yango.

40:21  Ekolalaka o nse ya nzete ya lilebo, ekobombamaka o nse ya nkekele pene na mai.

40:22  Nzete ya malebo ikopesaka yango molili, nzete ya wenge penepene na mai ikobatelaka yango.

40:23  Soko ebale ekomi na mbonge, ekobanga te, ata mai ma Yordane makoteli yango o monoko, ekoningana te.

40:24  Nani akoki kobimela yango, kokanga yango mpe kotubola yango zolo na ebende ?

40:25  Oyebi Ngando : Okoki kokanga yango na ndobo ? Okotiaka yango nsinga o lolemu mpo ’te obenda yango ?

40:26  Okoki kotiela yango nkekele o zolo, to kotubola yango mbanga na nzube enene ?

40:27  Ngando ekoya kobondela yo ? Ekoloba na yo maloba ma sukali ?

40:28  Ekoyokana na yo mpo esalela yo mosala ? Okosomba yango mpo ezala moombo mwa yo seko ?

40:29  Okosakana na yango lokola okosakana na ndeke ? Bana basi ba yo bakokanga yango na nsinga mpo batambwisa yango ?

40:30  Babomi mbisi bakotekeke yango na mosolo ? Bato ba mombongo bakolukaka kosomba yango ?

40:31  Okotubola nzoto ya yango na makongo ? Okobwakela yango ndobo, lokola bakoloboko mbisi ?

40:32  Meka naino kokanga yango, okobosana etumba yango te, okomeka yango mbala ibale te.