LinVB - Job - 6

6:1  Na nsima Yob azongisi, alobi :

6:2  Malamu, bameka bozito bwa mawa ma ngai, batia malozi ma ngai o emekeli.

6:3  Mawa ma ngai maleki zelo ya mbu na boike, yango wana nakomi kolobaloba bobele bongo.

6:4  Nzambe abeteli ngai makula, nzoto ya ngai ebebi na ngenge ya mango, malozi ma Nzambe mayeli ngai etumba.

6:5  Mpunda ekoki nde kolela o esobe etondi na matiti ? To ngombe ekoki kolela soko ezali na matiti ma kolia ?

6:6  Eloko ezangi bokenzu, bakoliaka yango na mongwa te ? Bakoyokaka nde mpembe ya liki elengi ?

6:7  Nalingi biloko bina bileka o monoko mwa ngai te, nayoki byango mpi.

6:8  A, Nzambe ayoka losambo la ngai, akabela ngai eloko eye nazali kotia motema.

6:9  Nzambe ándima konyatanyata ngai, átombola loboko la ye mpe áboma ngai !

6:10  Yango ekokitisa ngai motema, mpe ekoyokisa ngai esengo o kati ya mpasi, mpo nabosani liloba lyoko lya Mosantu te.

6:11  Ngai nde nani mpo ’te natia elikya na bokasi bwa ngai ? Awa nakosuka bongo, mpo nini nakanga motema ?

6:12  Nzoto ya ngai ezali nde libanga ? Misuni mya nzoto mizali nde bibende ?

6:13  Nazali kozila lisalisi se mpamba, makasi masileli ngai nye !

6:14  Oyo aboyi koyokela moninga mawa aboyi mpe Nzambe wa bokasi bonso.

6:15  Bandeko, baye natiaki motema, bakosi ngai, lokola moluka mosila mai.

6:16  Ntango mbula ya matandala ekokoma lisusu mai, ntango mai makangemi makonyangwa, miluka mikotonda.

6:17  O ntango ya elanga, miluka mikokauka, mikosila mai o eleko ya moi makasi.

6:18  Bato ba mobembo, soko balongwi o nzela mpe bayingeli o eliki, bakobunga kuna.

6:19  Lokola bato bauti o Tema bakotalaka nzela, to baye bauti o Saba bakotiaka yango mitema,

6:20  ntango bakomi wana, babulungani, mpo batiaki elikya se mpamba.

6:21  Bino se bongo, bozali mpamba o miso ma ngai, zambi bomonoki mpasi ya ngai mpe bobangaki.

6:22  Mokolo nini nalobaki na bino : « Bopesa ngai eloko, bobonzela ngai ndambo ya biloko bya bino ;

6:23  bobikisa ngai o maboko ma monguna, bolongola ngai o maboko ma banyokoli ? »

6:24  Soko boyebi koteya ngai, nakoloba lisusu te, soko nasalaki mabe, bolakisa ngai.

6:25  Maloba ma solo makoki kozokisa motema te, kasi maloba ma bino ma bopaleli ngai mazangi ntina.

6:26  Bolingi kopalela ngai mpo ya makambo nalobaki ? Maloba ma moto abwaki elikya, botali mango se mpamba ?

6:27  Bolingi nde kobete zeke likolo lya mwana etike, to koteke moninga lokola eloko mpamba ?

6:28  Nabondeli bino, boboya kotala ngai te ! O miso ma bino nakoki kobuka lokuta te.

6:29  Botika kosambisa ngai, bokata likambo lya ngai na bosembo, bokomono ’te nasali mabe te.

6:30  Nazali koloba mabe, solo ? Nayebi lisusu malamu na mabe te ?