LinVB - Job - 18

18:1  Na nsima Bildad wa Sua alobi :

18:2  Mokolo nini okotika koloba bongo ? Kanisa liboso, na nsima tokozongisela yo maloba.

18:3  Mpo nini otali biso lokola bazoba ? Okanisi ’te biso tozangi mayele ?

18:4  Yo moko ominyokoli na nkanda ya yo, olingi ’te bato basila o mokili mpo ya yo, mpe ngomba ya mabanga elongwa o esika ya yango ?

18:5  Ntembe te, mwinda mwa moto mabe mokozima, mpe móto mokongenge o ndako ya ye lisusu te.

18:6  Moi mokobongwana molili o ema ya ye, mpe mwinda mozali likolo lya ye mokopela lisusu te.

18:7  Liboso azalaki kotambola makasi, sikawa alembi ; akomi kotuta libaku liye ye moko atielaki baninga.

18:8  Ye moko akokotisa makolo ma ye o motambo, mpe akotambola nzela eye ekokanga ye o monyama.

18:9  Motambo mokokanga ye o litindi, monyama mokokwela ye o nzoto.

18:10  Nsinga eye ekokanga ye ebombami o nse, o nzela eye akoleka motambo mozali.

18:11  Bipai binso akokuta se makambo ma nsomo, makolanda ye o nzela inso akokende.

18:12  Nzala makasi ekosilisa nguya ya ye, malozi maike makotambola na ye nzela yoko.

18:13  Bokono bokosilisela ye lomposo la nzoto, malozi ma liwa makolia binama bya ye.

18:14  Bakolongola ye o esika akomibombaka, bakokamba ye epai ya mokonzi wa liwa.

18:15  Ndokoki kofanda o ema ezali ya yo lisusu te. bakobwakela yango fofolo.

18:16  Minsisa mya nzete ya ye mikokauka, bitapi bya nzete bikolembe.

18:17  O ekolo mobimba moto moko akokanisa ye lisusu te, o ntei ya bana mboka bakotanga nkombo ya ye lisusu te.

18:18  Bakolongola ye o mwinda mpe bakobwaka ye o molili, bakopima ye esika ya bozali o mokili mona.

18:19  O mboka ya ye akotika mwana moko te, nkoko mpe te, o ndako ya ye moto moko akokitana ye azali te.

18:20  Bato ba Westi bakolenge mpenza, bato ba Esti bakoyoka nsomo, bakomilobela :

18:21  « Mboka ya bato babe ekosukaka boye, ná mpe ndako ya bato baboyá Nzambe ! »