LinVB - Job - 24

24:1  Mpo nini Nzambe abombeli bato mikolo misusu te ? Mpo nini bato bandimi ye bakomonoko myango te ?

24:2  Bato babe bakotindisaka ndelo ya bilanga bya bango, bakobokoloko bibwele bayibaki.

24:3  Bakokamataka mpunda ya bana bitike, bakobotoloko mwasi bozenge ngombe ya ye.

24:4  Bakobenganaka o nzela bato bakeleli, babola basengeli komibomba mosika na bango.

24:5  Lokola mpunda ya esobe bakobimaka ut’o ntongo mpo ya koluka bilei, mpo ’te basilisa nzala ya bana ba bango.

24:6  Mbuma iye bakobukaka, se matiti mpe mbuma ya vino iye itikali o bilanga bya bato babe.

24:7  Na butu bakolalaka bolumbu, mpo bazangi bilamba mpe bolangiti mpo ya komibatela o eleko ya mpio.

24:8  Mbula ekoutaka o ngomba ekopolisaka bango, bakobombamaka o mibenga mpo bazangi ndako.

24:9  Babotoli mwana etike mwa mabelé ma ye, bakamati biloko bya mobola bo ndanga.

24:10  Bakotambolaka bolumbu, elamba o nzoto te, basengeli komeme mikumba ata bakufi na nzala,

24:11  bakokamolaka mbuma ya mafuta na moi makasi, mpe bakonyataka bituka bya vino, ata bakufi na mposa ya mai.

24:12  O engumba bato balingi bakufa bakokimelaka, baye bazoki bakobelelaka mpo bazwa lisalisi, kasi Nzambe akoyokaka bango te !

24:13  Banyokoli ba bango bakoyinaka moi, bameseni na nzela ya babola te, bakolandaka nzela ike te.

24:14  Mobomi akolamukaka na butu, mpo ’te akende koboma mobola na mozangi, mpo ayiba biloko bya bato :

24:15  Moto wa bosoni akozilaka ntango ya molili, akanisi : « Moto moko amono ngai te », mpe azipi elongi ya ye na elamba.

24:16  Moyibi akobukaka ndako ya bato na butu, na moi abombami o ndako, alingi komono mwinda te.

24:17  Bango banso babangi ntongo lokola bakobangaka liwa, bameseni se na nsomo ya molili.

24:18  Makambo ma bango lokola nkoni ekotetwa o mai. Bato banso ba mokili batombela bilanga bya bango bobe. Bakokende lisusu o bilanga bya vino te.

24:19  Lokola molunge mokonyangwisaka mai ma matandala, mboka ya bawa ekolimwisa moto wa masumu.

24:20  Mama wa ye akobosana ye, nkusu ikolia ye, bakotanga nkombo ya ye lisusu te ; mosumuki akosuka mabe lokola nzete bakati.

24:21  Azalaki konyokolo mwasi ekomba, mpe aboyaki kosalisa mwasi akufeli mobali.

24:22  Bongo Nzambe, oyo akolongolaka bato banene na makasi, awa atelemi, moto oyo akomi kobanga liwa.

24:23  Nzokande Nzambe akopesa ye mikolo afanda naino kimia, kasi miso ma ye mazali se kotala ye.

24:24  Akoyoka malamu bobele mwa ntango, na nsima esili, akosuka lokola bato baye basilisaki mobembo. Azali lokola motó mwa lititi bakati.

24:25  Ezali bongo te ? Nani akondimisa ngai mambi ma lokuta ? Nani akoki kowangana maloba ma ngai ?