LinVB - Job - 19

19:1  Yob azongiseli bango maloba maye :

19:2  Mikolo boni naino bokotumola ngai mpe bokotungisa ngai na maloba ma bino ?

19:3  Bosili kofinga ngai mbala zomi, awa bonyokoli ngai bongo, bozali koyoka nsoni te ?

19:4  Ata nabungi nzela mpe nabebi, mabe mana matali se ngai moko.

19:5  Soko bozali kokitisa ngai mpo ’te bolonga, mpe kofunda ngai na makambo makoyokisa ngai nsoni,

19:6  boyeba ’te Nzambe moto ayokisi ngai mpasi, mpe akangi ngai o monyama mwa ye.

19:7  Ata nagangi makasi, akoyanola te, ata nabeleli, akoyokemela ngai te.

19:8  Akangeli ngai nzela mpo naleka te, mpe atindi molili o bisika binso nalingi kokende.

19:9  Alongoli lokumu la ngai, abotoli ngai enkoti ya bokonzi.

19:10  Abebiseli ngai makambo manso, nakufi nye, alongoli elikya ya ngai lokola bakopikolaka nzete.

19:11  Akolisi nkanda ya ye, atali ngai lokola monguna wa ye.

19:12  Bato ba ye babimeli ngai ebele, baluki nzela ya kokoma epai ya ngai, mpe batelemi zongazonga ya ema ya ngai.

19:13  Alongoli bandeko ba ngai pene na ngai, bayebani ba ngai bayebi ngai lisusu te.

19:14  Baninga ba ngai banso bakimi ngai, bato ba libota lya ngai babosani ngai.

19:15  Basali basi ba ngai batali ngai lokola mompaya, lokola bamoni ngai naino mokolo moko te.

19:16  Nabengi mosali wa ngai, kasi ayanoli ngai te, ata nabondeli ye mingi mpenza.

19:17  Mwasi azali kokima nsolo ebe ya mpema ya ngai, bana ngai moko naboti bakomi kokima ngai.

19:18  Ata bana bake bakomi kokinola ngai, soko natelemi, babandi kotiola ngai.

19:19  Baninga ba ngai ba motema bayoki ngai mpi, baye ngai nalingi mingi bapesi ngai mokongo.

19:20  Natikali se minkuwa na mposo mpamba, bobele na mpasi nakoki koteleme naino.

19:21  E bandeko ba ngai, boyokela ngai mawa, zambi loboko la Nzambe lobeti ngai.

19:22  Mpo nini bonyokoli ngai mingi boye, se lokola Nzambe ? Bolingi nde kolia misuni mya ngai ?

19:23  Nalingi bakoma maloba ma ngai o monkanda, bakoma manso na nkoma inene,

19:24  bakoma mango o libanga makotikala seko, bakata mango na ebende ya nsonge.

19:25  Nayebi ’te mobikisi wa ngai azali, akoya kokata makambo manso awa o nse.

19:26  Na nsima akotelemisa ngai pene na ye, bongo ndenamoni Nzambe na miso ma ngai.

19:27  Nakomono ye na miso, akozala pene na ngai, nakomono ye, moto mosusu te ; nawei na mposa ya komono mokolo mona.

19:28  Awa bolobi : « Tonyokolo ye ndenge nini ? Na likambo nini tokofunda ye ? »,

19:29  bino moko bobanga etumbu ya mopanga, zambi nkanda ekozwela moto mabe etumbu, bongo bokoyeba ’te Mosambisi azali.