LinVB - Job - 17

17:1  Mpema ya ngai ekei ; mikolo mya ngai mikoki, nakomi moto akokima lilita lisusu te.

17:2  Pene na ngai se bato bazali kotiola ngai, boseki bwa bango bozali kosilisela ngai mpongi.

17:3  Yo moko omitia ndanga o esika ya ngai, nani mosusu akondima kolongisa ngai ?

17:4  Ya solo, okangi mitema mya bango mpo bakanisa te, olingi mpe te ’te balonga.

17:5  Bazali lokola moto abengi baninga o limpati, ntango bana ba ye moko bazali kokufa na nzala.

17:6  Nkombo ya ngai ekomi nzembo o monoko mwa bango, nakomi lokola moto babwakeli ye nsoi o elongi.

17:7  Motema mwa ngai motondi na mawa, nzoto elembi nye.

17:8  Bato ba bosembo bakamwi mpe bamibendi, bato balamu bayoki mabe, balobi : « Talani mosumuki. »

17:9  Moto semba atiki ezalela ya ye te, mpe moto wa maboko peto azali se na mpiko enene.

17:10  Bino banso boya lisusu, boya ! O kati ya bino nakozwa moto moko wa bwanya te.

17:11  Mikolo mya ngai misili, nalingi nakata motema, makambo nakanaki kosala mabebi.

17:12  Butu, bakomi kobenga yango moi, soko mpokwa eyei, balobi : Ntongo etani !

17:13  Nalula lisusu nini ? Mboka ya bawa ekomi mboka ya ngai, batandi mbeto ya ngai kuna.

17:14  Nakotanga lilita ‘tata wa ngai’, mpe nkusu ‘mama’ to ‘ndeko mwasi’.

17:15  Elikya ya ngai ezali wapi ? Nani akoki komono yango ?

17:16  Yango ekokita kin’o mboka ya bawa, mokolo biso banso tokozinda o kati ya mabelé ?