LinVB - Job - 15

15:1  Elifaz wa Taman alobi :

15:2  Moto wa bwanya akoki kozongisa nde eyano ezangi ntina ? akotondisa nde libumu na mompepe mwa Esti ?

15:3  Akoluka nde komilongisa na maloba mazangi ntina, mpe kosakola makambo makoki kobikisa ye te ?

15:4  Kutu, obandi kozanga limemya o miso ma Nzambe, mpe obebisi bomanyoli bwa yo o miso ma ye.

15:5  Masumu ma yo mazali kolobisa yo maloba mana, okomi kolanda monoko mwa bato ba lokuta.

15:6  Maloba ma yo mazali kokitisa yo moko, ngai te, monoko mwa yo moko mofundi yo.

15:7  Yo nde moto wa yambo o mokili ? Ntango babotaki yo, ngomba izalaki naino te ?

15:8  Oyokaki malako ma bankumu ba Nzambe. Bwanya bwa yo bouti nde kuna ?

15:9  Makambo nini oyebi, maye biso toyebi te ? Eloko nini oyoki malamu mpe biso toyoki yango te ?

15:10  O ntei ya biso babange na nsuki mpembe bazali, basusu mpe baleki tata wa yo na mibu.

15:11  Otii motema te na mabondi Nzambe azali kobondo yo, mpe na maloba ma biso ma boboto ?

15:12  Mpo nini nkanda ebebisi motema mwa yo ? Mpo nini otali na miso makasi boye,

15:13  awa ozali kosilikela Nzambe mpe okomi koloba maloba maike maike ?

15:14  Boniboni moto akoki komimono ’te azali peto ? Eloko ebotami na mwasi ezali nde na bosembo ?

15:15  Nzambe atii ntembe ata na basantu ba ye, mpe o miso ma ye banzelu bazangi mbindo te.

15:16  Bongo mbindo ezanga na moto mpamba, oyo abeba, awa ameseni kosala masumu lokola akomeleke mai ?

15:17  Yoka ngai, nalingi koteya yo, nakoyebisa yo makambo ngai namonoki.

15:18  Bakolo bayoká maye manso na bankoko, bango bayebisi biso polele, babombi eloko te.

15:19  Bankoko bakomaki bankolo ba ekolo, esika mompaya akotoki naino te.

15:20  Mosumuki akomiyokisaka mpasi bomoi bwa ye mobimba. Ata monyokoli aumeli mibu boni,

15:21  na matoi ma ye azali koyoka bobele makambo ma nsomo, soko afandi na boboto mobebisi azali kokanela ye.

15:22  Elikya ya kokima molili ezali te, ayebi ’te akokufa se na mopanga.

15:23  Azali lokola nyama emeki kokima engondo, ayebi ’te akosuka bobele o liwa ;

15:24  mawa na nsomo ikokanga ye, akobanga lokola mokonzi ayeli ye bitumba.

15:25  Mpamba te, ye moko aluki kobundisa Nzambe mpe atombokeli Nzambe wa bokasi bonso.

15:26  Akitisi motó, akei mbangu mpo ya kobete Nzambe, amibombi o nsima ya nguba ya ye enene.

15:27  Elongi ya ye etondi na mafuta mafuta makangemi o loketo la ye.

15:28  Akei kofanda o mboka ebebi na bitumba mpe o ndako ikoki kobatela ye lisusu te, iye ibandi kokweya mpe kobukana.

15:29  Akokolisa nkita ya ye te, mosolo mwa ye mokoumela soki te, akomeme nkita ya ye o mboka ya bawa te.

15:30  Akoki kokima mboka ya molili te, móto mokokaukisa ye lokola bitapi bya nzete, akokima ata mpema ya monoko mwa ye moko.

15:31  Soko akanisi ’te akobika mpo ya lokuta la ye, amikosi, zambi bakozongisela ye mpe makambo ma lokuta.

15:32  Akosuka, naino mikolo mya ye mikoki te, mpe bitapi bya nzete ya ye bikokola lisusu te.

15:33  Azali lokola nzete ya vino ekweisi mbuma ibesu, mpe lokola nzete ya oliva ekweisi fulele noki.

15:34  Solo, bato babe bakozwa libota te, móto mokosilisa biema bya basumuki.

15:35  Bato bakani kosala mabe bakobimisa se misala mibe, mosala mwa bango, se kolembisa bato.