LinVB - Job - 27

27:1  Yob akobi koloba boye :

27:2  O nkombo ya Nzambe oyo alingi kolongisa ngai te, Nzambe wa bokasi bonso oyo ayokisi ngai motema mpasi,

27:3  awa nazali naino kopema, mpe Nzambe alongoli mompepe o zolo ya ngai naino te,

27:4  nalayi ’te nakobuka lokuta na monoko mwa ngai te mpe nakoluka kokosa moto na lolemu la ngai te.

27:5  Nakoki kondima maloba ma bino te, tee liwa nakosakola ’te nasali mabe te.

27:6  Nalembi koloba ’te nazali moto wa bosembo ; nayebi ’te nasali likambo libe mokolo moko te.

27:7  Monguna wa ngai azwa etumbu ya bato babe, monyokoli wa ngai azwa etumbu ya basumuki.

27:8  Bino bokolobaka : « Moto mabe atikali na elikya nini, awa Nzambe akobotolo ye bomoi ?

27:9  O mikolo mpasi ya nsomo ekokwela ye, Nzambe akoyoka ye te, ata aleli makasi.

27:10  Soko ayokaki Nzambe wa bokasi bonso elengi, mbele abondelaki ye mikolo minso. »

27:11  Ngai nakolakisa bino bwanya bonene bwa Nzambe, nakobombela bino makanisi ma Nzambe wa bokasi te.

27:12  Awa bino banso bomonoki mango polele, mpo nini bozali koloba makambo maye ma mpamba ?

27:13  Boyoka boniboni Nzambe akosala na moto mabe, mpe etumbu nini akopesa monyokoli :

27:14  Ata abotaki bana baike, bakokufa na mopanga, mpe bankoko ba ye bakokelela mampa.

27:15  Bokono bobe bokoboma baye batikali, mpe basi bakoki kolela bango te.

27:16  Ata akongoli ngomba ya mosolo, ata azwi bilamba ebele mpenza,

27:17  moto semba akolata bilamba ye abombaki, mpe oyo azali na likambo te akozwa mosolo mwa ye.

27:18  Amitongelaki ndako lokola ndako ya limpulututu, lokola molako bakengeli bakomitongelaka.

27:19  Ye moto wa nkita enene, soko akufi, nkita esili, soko afungoli miso, akomono eloko yoko lisusu te.

27:20  Makambo ma nsomo makokwela ye lokola ekumbaki, o kati ya butu mompepe makasi mokomeme ye.

27:21  Mompepe mwa Esti mokotombola ye mpe mokobenda ye, ekumbaki ekolongola ye o ndako ya ye.

27:22  Bakobetele ye makula mawa te, akomeka kokima mimbai mya moto wa litimbo.

27:23  Bato banso bakosepela mpasi ya ye mpe bakowulola ye bipai binso.