LinVB - Job - 31

31:1  Napesaki miso ma ngai mobeko moye : natala elenge mwasi na miso ma boluli te.

31:2  Kuna o likolo abongiseli ngai lifuta nini ? Nzambe wa bokasi abombeli ngai bolamu nini ?

31:3  Akobombelaka bato bazangi bosembo mpasi te ? Makambo ma mawa, lifuta lya bato babe te ?

31:4  Kasi ye akomonoko ezalela ya ngai mobimba, akolanda ngai o bisika binso nakotia makolo.

31:5  Bongo, mokolo nini nalandaki nzela ya lokuta ? Mokolo nini nalingaki kokosa bato ?

31:6  Tika Nzambe ameka ngai na emekeli elamu, bongo akomono ’te nazali na likambo lyoko te.

31:7  Soko makolo ma ngai malongwaki o nzela elamu, soko motema mwa ngai mondimaki mambi mabe miso mamonoki, soko mbindo ekangemi na maboko ma ngai,

31:8  moto mosusu alia biloko nalonaki, apikola nzete iye nalonaki.

31:9  Soko o kati ya motema nalulaki mwasi wa bato, to nazalaki konongo monoko mwa ndako ya moninga,

31:10  mwasi wa ngai anikela mobali mosusu fufu, mpe babali basusu bakamata ye lokola mwasi wa bango,

31:11  zambi mpo ya mambi ma bosoni zuzi akokatela ngai etumbu.

31:12  Mbele napelisaki móto motumbi biloko bya ngai binso, mpe mosilisi nkita ya ngai nye mpenza.

31:13  Nazalaki kopesa basali babali na basi biye bikoki na bango, mpe kosamba na bango se na bosembo.

31:14  Soko ezalaki bongo te, nakosala boni mokolo Nzambe akobenga ngai ? Ntango akotuna ngai, nakopesa ye eyano nini ?

31:15  Nzambe se moko akelaki ngai, akelaki mpe bango, se ye moko abongisaki biso o libumu lya mama.

31:16  Mokolo nini napimaki babola eloko ? Mwasi akufeli mobali abondelaki ngai nde mpamba ?

31:17  Nazalaki nde kolia mampa bobele ngai moko, mpe naboyaki kokabela bana batike ?

31:18  Ut’o bomwana Nzambe abokoli ngai lokola tata, yango wana, ut’o libumu lya mama, nazalaki kobatela bango.

31:19  Ná mobola azangaki elamba, ná moto wa mawa azalaki na bolangiti te,

31:20  batondi ngai na motema monso, mpo nalatisi bango mposo ya mpata.

31:21  Soko nabeteki ata mbala yoko mwana etike mbata, mpo nayebani na bazuzi baye bakolongisa ngai,

31:22  lipeke lya ngai likoki kokabwana na nkingo, mpe loboko lokoki kokatana na biteni bibale !

31:23  Solo, nazalaki kobanga etumbu ya Nzambe, mpo nakoki na bonene bwa ye te.

31:24  Natiaki nde motema na wolo ? Nalobaki mokolo moko : nakobika na yango ?

31:25  Nasepelaki nde mpo nazalaki na biloko biike, to mpo nazwaki mosolo mingi na maboko ma ngai ?

31:26  Ntango namonoki mwese mozalaki kongenge kitoko, mpe namonoki sanza ezalaki kongala makasi,

31:27  o motema nandimaki nde lisenginya lya kokumisa yango, loboko liboso lya monoko ?

31:28  Mbele zuzi akotumbola ngai mpo ya likambo lina ; soko nasalaki bongo, nawanganaki Nzambe wa likolo.

31:29  Nasepelaki nde liwa lya banguna ba ngai, to nayokaki esengo o ntango bazalaki na mpasi ?

31:30  Ngai moto nandimaki kosala masumu na monoko te, nakanela moninga ’te akufa, solo ?

31:31  Baye tozalaki na bango ndako yoko bakokaki koloba : « Nani aliaki naino nyama te » ?

31:32  Mouta ata moko te alalaki o libanda, natikelaki moto wa mobembo ndako polele.

31:33  Nabombaki nde masumu ma ngai lokola Adamu asalaki ? Nabombaki nde mabe ma ngai o kati ya motema ?

31:34  Nabangaki nde bilobaloba bya bato ? Soko nabangaki ’te bandeko baseke ngai, mbele nakangaki monoko mpe nabimaki o ndako lisusu te.

31:35  E ngai e, nasala nini mpo ’te bato bayoka ngai ? Nalobi, esili ! Sikawa Nzambe ayanola ngai ! Soko monguna akomaki monkanda mwa bofundi ngai,

31:36  mbele namemeki mwango awa, to nalataki mwango lokola enkoti ya lokumu.

31:37  Solo, nakolakisa ye makambo nasali, nakobeleme na ye lokola mwana wa mokonzi. Maloba ma Yob masili se bongo.

31:38  Soko nakataki mabelé malamu te, mpe bikokaki kobota mbuma mingi te,

31:39  soko naliaki mbuma ya mabelé, iye nafutaki te, soko nabomaki nkolo wa mabelé na nzala,

31:40  malamu, nzube ikola o esika ya mbuma ya mampa, mpe matiti mabe o esika ya loso.