LinVB - Job - 1

1:1  Ezalaki o mokili mwa Us moto moko, nkombo ya ye Yob. Azalaki moto malamu mpe wa motema semba ; azalaki kobanga Nzambe mpe koboya mabe.

1:2  Abotaki bana zomi, bana babali nsa­mbo, bana basi basato.

1:3  Azalaki na nyama mingi : mpata nkoto nsa­mbo, kamela nkoto isato, ngombe nkoto yoko, mpunda nkama itano. Azalaki mpe na basaleli ebele mpenza ; ye moko nkumu monene aleki bato banso ba ekolo eye ya Esti.

1:4  Bana ba ye babali bameseni kokutana o ndako ya moko moko mpo ya kolia limpati ; bazalaki mpe kobenga bandeko basi ba bango baya kolia mpe komele na bango esika yoko.

1:5  Esilisi bango kolia limpati o ndako ya moto moko moko, Yob azalaki kobenga bango banso mpo ’te bamipetola ; mpe na nta ntongo azalaki kobonzela Nzambe libonza mpo ya moko moko wa bango, zambi azalaki kokanisa : « Mbele bana ba ngai basali lisumu mpe batuki Nza­mbe o ntei ya motema ! » Yob ameseni kosala se bongo.

1:6  Mokolo moko banzelu ba Nza­mbe babimi o miso ma Mokonzi Nzambe, Satana azalaki o kati ya bango.

1:7  Mokonzi alobi na Satana : « Outi wapi ? » Satana azongisi : « Na­uti kotambola mpe kolekaleka o mokili mobimba. »

1:8  Mokonzi atuni Satana : « Bongo omonoki mosaleli wa ngai Yob ? O mokili mobimba moto moko aleki ye na bolamu mpe na bosembo te ; moto moko te azali kobanga Nzambe mpe kokima mabe lokola ye. »

1:9  Kasi Satana azongisi : « Yob azali kotosa Nza­mbe mpamba te.

1:10  Binso bizali na ye, ná ndako ná bilanga, yo moto ozingi byango na lopango. Obenisi misala mya ye minso, mpe esobe etondi na nyama ya ye.

1:11  Kasi soko otomboli loboko la yo mpe obotoli ye ndambo ya biloko bizali na ye, ntembe te, akobetele yo mobondo o miso ma yo ! »

1:12  Mokonzi alobi na Satana : « Sala na biloko bya ye lokola olingi, kasi oboma ye te. » Mpe Satana alongwi o miso ma Yawe.

1:13  Mokolo bana babali na bana basi ba Yob bazalaki kolia mpe komele masanga o ndako ya motomolo wa bango,

1:14  moto moko ayei koyebisa Yob : « Ngombe ya yo izalaki kosala mosala o bilanga, mpe mpu­nda ya yo izalaki kolia o esobe,

1:15  ba-Sabeo bayei koyiba yango, babomi basali ba yo na likongo. Bobele ngai moko nabiki, yango wana nayei koyebisa yo. »

1:16  Naino asilisi koloba te, moto mosusu ayi­ngeli o ndako, alobi : « Nkake ekwei, ezikisi mpata na bakengeli ba yo, mpe ebomi bango. Se ngai moko nabiki ; yango wana nayei koyebisa yo. »

1:17  Naino asilisi maloba mpenza te, mosusu akoti o ndako, alobi : « Ba-Kaldea babimeli biso, ma­ngomba masato mobimba, babotoli kamela inso mpe babomi basali ba yo banso. Se ngai moko nabiki, yango wana nayei koyebisa yo. »

1:18  Naino asilisi koloba te, moto wa banei ayei mpe alobi : « Ntango bana ba yo bazalaki kolia mpe komele vino o ndako ya motomolo wa bango,

1:19  mompepe mokasi mouti o esobe, moningisi ndako mobimba : ndako ekwei mpe bana bakufi. Se ngai moko nabiki mpe nayei koyebisa yo. »

1:20  Sikawa Yob atelemi, apasoli bilamba bya ye, akokoli motó ; ami­bwaki o nse, akitisi elongi o mabelé,

1:21  mpe alobi : « Nabimaki bolumbu o libumu lya mama wa ngai ; nakozonga se bolumbu. Nzambe apesaki, Nza­mbe abotoli, tokumisa se nkombo ya Mokonzi ! »

1:22  O kati ya mpasi iye inso, Yob asali lisumu te, atumoli Nzambe na liloba lyoko te.