LinVB - Job - 9

9:1  Yob ayanoli :

9:2  Ya solo, nayebi malamu ’te ezali bongo, moto akoki kolonga Nzambe na likambo ?

9:3  Yo moto omeki kowela ntembe na ye, okotuna ye mituna nkoto, okozwa eyano ata yoko te.

9:4  Moto azala na bwanya mpe na bokasi ata boni, nani akozwa etumbu te soko amekani na ye ?

9:5  Ayebi kolongola ngomba mpe kotia yango o epai esusu ; akoki kokweisa yango soko ayoki nkanda.

9:6  Soko atindiki mokili, makonzi ma mwango makoningana.

9:7  Moi mokobima te soko ye alingi te, minzoto mikongenge te, soko ye azipi myango.

9:8  Ye moko akeli etando ya likolo, mpe atii makolo likolo lya mbonge ya mai,

9:9  Akeli ‘Motongolongo mwa nzoku’, ‘Motó mwa Ekange’, ‘Bangondo nsambo’ mpe minzoto mya Sudi.

9:10  Akeli biloko binene biso bato toyebi te, na bikelamo ebele ya kotanga te, bikokamwisa bato.

9:11  Soko aleki, nakomono ye te, soko abelemi na ngai, bakoyeba ye te.

9:12  Soko alingi kobotolo eloko, nani akopekisa ye ? mpe nani akoloba : Osali nini ?

9:13  Soko ayoki nkanda, moto moko akoki kopekisa ye te, bilimo binso bisengeli kokumbamela ye.

9:14  Bongo ngai nalingi komilongisa, nakozwa mayele ma kokitisa ye epai wapi ?

9:15  Ata nasali mabe te, nakosamba se mpamba ; ye moko mosambisi, nakoki se kobondela ye.

9:16  Ata andimi koya soko nabengi ye, nayebi te soko akondima maloba ma ngai.

9:17  Ye moto akonyata ngai mpo ya likambo lya mpamba, akozokisa ngai mpota ntango inso, ntina te.

9:18  Akotikela ngai ata ntango ya kopema te, mpe akoyokisa ngai motema mpasi.

9:19  Nabunda na ye ? Wapi ! Aleki ngai na bokasi. Nafunda ye ? Nani akosambisa ye ?

9:20  Ata nasali se malamu, akokitisa ngai ; ata nasali mabe te, nakolonga te.

9:21  Nayebi te soko ya solo nazali na likambo te ; ata bongo nayoki mokili moye mpi.

9:22  Solo, nasili nalobi : Akoboma bato banso, ná moto malamu ná moto wa masumu.

9:23  Soko likama likweli na mbalakaka baye bazali na likambo te, akopangana na mpasi ya bango te.

9:24  Soko ekolo yoko ekomi o maboko ma moto mobe, akozipa miso ma bazuzi na elamba. Soki ye te, nani akoki kosala bongo ?

9:25  Mikolo mya ngai mizali koleka noki, lokola baye bakokimaka mbangu o momekano, mikolimwa, mpe nakomono bolamu te,

9:26  lokola mwa bwato bozali kotiyola o ebale, mbangu lokola mpongo epimbwi mpo ekanga nyama.

9:27  Soko nakani kobosana mpasi ya ngai mpe kofungola elongi ya ngai mpo nasepela,

9:28  nayoki nsomo na bokanisi malozi manso, mpo nayebi ’te otali ngai bo moto wa makambo.

9:29  Bongo, lokola omoni ngai nazali na makambo, mpo nini nalembisa nzoto mpamba ?

9:30  Ata nasukoli nzoto na mai ma matandala, ata nasukoli maboko na sabuni,

9:31  yo moto okobwaka ngai lisusu o potopoto, bilamba bya ngai moko bikolinga ngai lisusu te.

9:32  Soko azalaki moto lokola ngai, mbele nakokaki koyanola mpe kosamba na ye.

9:33  Zuzi oyo akoki kosambisa biso babale mpe kokata likambo lya biso, azali te !

9:34  Oyo akondimisa Nzambe ’te abwaka fimbo ya ye, azali te ; oyo akokimisa nsomo ya ye mpe te,

9:35  ngai nakobanga koloba te, zambi nayebi likambo liye te.