LinVB - Job - 26

26:1  Na nsima Yob alobi lisusu :

26:2  Solo, oyebi kosalisa moto azangi bokasi, mpe kolendisa motema mwa moto alembi !

26:3  Oyebi kopesa malako na moto azangi mayele, mpe kolakisa bato bwanya bwa solo.

26:4  Ozali koloba maloba mango na nani ? Nani atindi yo oloba bongo ?

26:5  Bilima o mboka ya bawa bizali kolenge, mbu mpe bikelamo bya yango bizali koyoka nsomo.

26:6  Kin’o mboka ya bawa Nzambe akomonoko makambo manso, elamba ekozipa libulu lizindo ezali te.

26:7  Ye apiki etando ya likolo o bisika bikoki komonono te, mpe apiki mokili na eloko yoko te.

26:8  Ye akobombaka mai o kati ya mampata, mpe mampata makopaswana mpo ya bozito te.

26:9  Soko azipi sanza na mampata, moto moko akoki komono ngwende ya ye te.

26:10  Akati ndelo kuna o likolo lya mai ma mbu, ezala esika moi na butu bikokutana.

26:11  Makonzi ma likolo malengi mpe mayoki nsomo ntango Nzambe akaneli mango.

26:12  Na nguya ya ye akaboli mbu o biteni bibale, na bwanya bwa ye abomi Elima ya mai.

26:13  Na mpema ya ye akweisi bikelamo bya likolo, na loboko la ye atuboli Nyoka na likongo.

26:14  Totangi awa se ndambo ya bikela bya ye, bikela bya ye ebele, toyebi byango te. Nani kutu akoki koyeba bokasi bwa ye, nsomo lokola nkake ?