LinVB - Job - 4

4:1  Elifas moto wa Teman, alobi boye :

4:2  Soko balobi na yo, okondima ? Nani ndakoki kokanga monoko ?

4:3  Tala, yo moko ozalaki koteya bato ebele, oyebaki kolendisa baye balembi.

4:4  Na maloba ma yo otelemisaki baye bakwei, opesaki makasi na baye bazalaki kolenge.

4:5  Sikawa, awa makambo makweli yo, okomi kolembe, mpasi ekangi yo, mayele mabulungani !

4:6  Boyambi bwa yo bokopesa yo elikya te ? Ezalela elamu ya yo ekolendisa yo te ?

4:7  Kanisa malamu : Moto asali mabe te, akoki kobungama, solo ? Omono wapi bato ba bosembo balimwi seko ?

4:8  Ngai mpenza nakomonoko boye : Baye bakosalaka mabe mpe baye bakoyokisaka baninga mpasi, bakosuka na mpasi.

4:9  Soko Nzambe atindeli bango mpema ya nkanda, bawei, soko abimisi yango o zolo, basileli.

4:10  Ata bagangi lokola nkosi, mpe baleli lokola nyama ya zamba, bakosuka lokola mino ma mwana nkosi makobukanaka.

4:11  Nkosi ekokufa zambi ezangi nyama, bana ba yango bakopalangana.

4:12  Moto moko ayebisaki ngai na bonkutu, nayokaki mwa maloba ma ye na matoi.

4:13  Na butu, bakolotoko ndoto, ntango mpongi ekokangaka bato makasi,

4:14  na mbalakaka nayoki nsomo enene, nzoto mobimba ebandi kolenge.

4:15  Ezalaki lokola bapemeli ngai o elongi, yango etelemisi nsuki ya ngai o motó.

4:16  Atelemi wana… kasi nayebi ye te, kasi miso mazalaki komono lokola elilingi. Natikali nye ; na nsima nayoki lolaka lotuni :

4:17  « Nani azali na bosembo o miso ma Nzambe ? Nani akoki kozala peto o miso ma Mozalisi ?

4:18  Ata na basaleli ba ye Nzambe akotiaka ntembe, zambi banzelu ba ye bakoki mpe kobunga.

4:19  Bongo bato bafandi o ndako ya mabelé, iye itongami likolo lya mputulu, bakoleka nde ye ? Bakonyatema lokola monsili !

4:20  Na ntongo bazali na bomoi, na mpokwa bakufi, balimwi seko mpe moto moko akanisi bango lisusu te.

4:21  Nsinga ya biema bya bango esili ekatani, bakufi zambi bazangi bwanya. »