LinVB - Job - 42

42:1  Yob azongiseli Mokonzi :

42:2  Nayebi ’te ozali Nzambe wa bokasi bonso, manso olingi kosala, okokokisa mango.

42:3  Ngai moto natiaki ntembe na mikano mya yo, nalobaki maloba ma bozoba mazangi ntina.

42:4  Solo, lokola elema mpenza natangaki makamwa maye maleki mayele ma ngai

42:5  Liboso nayebaki yo se mpo ya maloba ma bato, kasi sikawa namoni yo na miso.

42:6  Naboyi maloba manso nalobaki, nayoki motema mawa mpe nalali o kati ya mputulu.

42:7  Esilisi Nzambe koloba bongo na Yob, alobi na Elifas wa Teman maloba maye : Nasilikeli yo na baninga ba yo babale, zambi bolobaki ma­mbi ma ngai na bosembo te, lokola mosaleli wa ngai Yob.

42:8  Yango wana sikawa bokamata ngombe nsambo na mpata babali nsambo, mpe bokende epai ya mosaleli wa ngai Yob. Bobonza libonza lya kotumba mpo ya mabe ma bino, mpe mosaleli wa ngai Yob akosambelela bino. Nakondimela ye, nakopesa bino etu­mbu te, awa bolobaki mambi ma ngai na bosembo te lokola mosaleli wa ngai Yob.

42:9  Elias wa Teman, Bildad wa Sua mpe Sofar wa Naamat bakei kosala lokola Nzambe atindaki bango. Mpe Nzambe andimi losambo la Yob.

42:10  Awa Yob azalaki kosambelela baninga ba ye, Mokonzi azongisi nkita ya ye inso ya kala ; azongiseli ye ya­ngo mbala ibale.

42:11  Amoni ba­ndeko ba ye banso, babali na basi, babandi kozonga, na bayebani ba ye ba kala. Banso lisanga basali limpati o ndako ya ye. Balakisi ye mawa mpe babo­ndi ye mpo ya mpasi inso Mokonzi ati­ndelaki ye. Banso bayei kokabela ye mosolo, mpe moko moko atikeli ye mpete ya wolo.

42:12  Mo­konzi abenisi Yob o mikolo miye, leka liboso. Akomi na mpata nkoto zomi na inei, kamela nkoto motoba, ngombe nkoto ibale, mpu­nda basi nkoto yoko.

42:13  Aboti bana babali nsambo na bana basi basato.

42:14  Apesi mwana mwasi wa liboso nko­mbo ‘Ebenga’ ; wa babale ‘Fulele ya za­mba’ ; wa basato ‘Liseke lya malasi’.

42:15  O ekolo mobimba basi kitoko lokola bana ba Yob bazalaki te. Tata apesi bango ndambo ya biloko bya ye lokola apesaki bana babali ba ye.

42:16  Nsima ya yango, Yob aumeli naino na bomoi tee akokisi mibu monkama na ntuku inei ; amoni ba­nkoko mpe bankokolo ba ye.

42:17  Yob akomi mobange mpenza ; mokolo awei akokisi mikolo mya ye.