ABPGRK - Job - 6

6:1  υπολαβών δε Ιωβ λέγει

6:2  ει γαρ τις ιστών στήσαί μου την οργήν τας δε οδύνας μου άραι εν ζυγώ ομοθυμαδόν

6:3  και δη άμμου παραλίας βαρυτέρα έσται επί τούτω τα ρήματά μου κατεπατήθησαν

6:4  βέλη γαρ του ικανού εν τω σώματί μου εστίν ων ο θυμός αυτών εκπίνει μου το αίμα όταν άρξωμαι λαλείν κεντουσί με

6:5  τι γαρ μη διακενής κεκράξεται όνος άγριος αλλ΄ η τα σίτα ζητών ει δε και ρήξει φωνήν βους επί φάτνης έχων τα βρώματα

6:6  ει βρωθήσεται άρτος άνευ αλός ει δε και έστι γεύμα εν ρήμασι κενοίς

6:7  ου δύναται γαρ μου παύσασθαι η ψυχή βρόμον γαρ ορώ τα σίτά μου ώσπερ οσμήν λέοντος

6:8  ει γαρ δώη και έλθοι μου η αίτησις και την ελπίδα μου δώη ο κύριος

6:9  αρξάμενος ο κύριος τρωσάτω εις τέλος δε μη με ανελέτω

6:10  είη δε μου πόλις τάφος εφ΄ ης επί τειχέων ηλλόμην επ΄ αυτής ου φείσομαι ου γαρ εψευσάμην ρήματα άγια θεού μου

6:11  τις γαρ μου η ισχύς ότι υπομενώ η τις μου ο χρόνος ότι ανέχεταί μου η ψυχή

6:12  μη ισχύς λίθων η ισχύς μου η αι σάρκες μου εισί χάλκειαι

6:13  η ουκ επ΄ αυτώ επεποίθειν βοήθεια δε απ΄ εμού απέστη

6:14  απείπατό με έλεος επισκοπή δε κυρίου υπερείδε με

6:15  ου προσείδόν με οι αδελφοί μου ώσπερ χειμάρρους εκλείπων η ώσπερ κύμα παρήλθόν με

6:16  οίτινές με διευλαβούντο νυν επιπεπτώκασί μου ώσπερ χιών η κρύσταλλος πεπηγώς

6:17  καθώς τακείσα θέρμης γενομένης ουκ επεγνώσθη όπου ην

6:18  ούτως καγώ κατελείφθην υπό πάντων απωλόμην δε και έξοικος εγενόμην

6:19  ίδετε οδούς Θαιμανών ατραπούς Σαβών οι διορώντες

6:20  και αισχύνην οφειλήσουσιν οι επί πόλεσι και χρήμασι πεποιθότες

6:21  ατάρ δε και υμείς επέβητέ μοι ανελεημόνως ώστε ιδόντες το εμόν τραύμα φοβήθητε

6:22  τι γαρ μήτι υμάς ήτησα η της παρ΄ υμών ισχύος επιδέομαι

6:23  ώστε σώσαί με εξ εχθρών η εκ χειρός δυναστών ρύσασθαί με

6:24  διδάξατέ με εγώ δε κωφεύσω ει τι πεπλάνημαι φράσατέ μοι

6:25  αλλ΄ ως έοικε φαύλα αληθινού ρήματα ου γαρ παρ΄ υμών ισχύν αιτούμαι

6:26  ουδέ ο έλεγχος υμών ρήμασί με παύσει ουδέ γαρ υμών φθέγμα ρήματος ανέξομαι

6:27  πλην ότι επ΄ ορφανώ επιπίπτετε ενάλλεσθε δε επί φίλω υμών

6:28  νυνί δε εισβλέψας εις πρόσωπα υμών ου ψεύσομαι

6:29  καθίσατε δη και μη είη άδικον και πάλιν τω δικαίω συνέρχεσθε

6:30  ου γαρ εστιν εν γλώσση μου άδικον η ουχί ο λάρυγξ μου μελετά σύνεσιν