Kapingamarangi - Leviticus - 16

16:1  Dimaadua ga-helekai gi Moses i-muli di mmade o-nia dama-daane dogolua a Aaron, ala ne-mmade i-di nau de-hagalongo gi Dimaadua.

16:2  Dimaadua ga-helekai gi Moses boloo, “Helekai gi do duaahina-daane go Aaron bolo ma go di madagoaa-hua donu dela e-hana-ieia gi-tua di gahu-duuli, mo gi-lodo di Gowaa Dabuaahia Huoloo, idimaa deenei di gowaa e-gila-mai-iei Au i-lodo di gololangi i-hongo di uhi Tebedebe o-di Hagababa. Mee ga-de-hagalongo-mai gi-di-Au, gei mee ga-daaligi gii-made.

16:3  Mee gaa-mee di-ulu gi-lodo di Gowaa Dabuaahia Huoloo deelaa, i-muli dono gaamai dana kau-daane dulii e-hai tigidaumaha wwede nia huaidu, ge tama-siibi-daane e-hai tigidaumaha dudu.”

16:4  Gei Dimaadua ga-hagi-anga ana helekai aanei gi mee: I-mua Aaron ma-ga-ulu gi-lodo di Gowaa Dabuaahia Huoloo, mee e-hai gi-gaugau, ga-ulu nia goloo tangada hai-mee-dabu, aalaa go nia gahu lloo ‘linen’, mo dono gahu wae laa-lodo, di tuu mo dono goobai-‘linen’.

16:5  Digau Israel e-hai gi-wanga gi Aaron nia damaa-kuudi-daane e-lua e-hai tigidaumaha wwede nia huaidu, ge dahi dama-siibi-daane e-hai tigidaumaha dudu.

16:6  Gei mee e-hai gi-tigidaumaha dana damaa-kau-daane e-wwede ono huaidu mo nia huaidu o dono madahaanau.

16:7  Ga-nomuli, gei mee gaa-kae nia kuudi-daane e-lua gi-di bontai di Hale-laa Dimaadua.

16:8  Gei mee gaa-hai dana hilihili i-di gowaa deelaa, e-hai-hegau gi-nia hadu e-lua, e-dahi e-hihi nonua bolo “Ang-gi Yihowah”, ge dahi e-hihi bolo “Ang-gi Azazel”.

16:9  Aaron gi-heia tigidaumaha gi-di kuudi dela ne-hilihili gi-di hai o-di hudu di hadu ne-hai, la-gi Yihowah, gi-heia tigidaumaha wwede nia huaidu.

16:10  Gei di kuudi dela ne-hilihili ang-gi Azazel le e-wanga-hua mouli gi Dimaadua, e-hagau gi-lodo di anggowaa gi Azazel, e-wwede nia huaidu o-nia daangada.

16:11  Di madagoaa-hua o Aaron ma-ga-tigidaumaha dana damaa-kau-daane, e-hai tigidaumaha e-wwede ono huaidu mo nia huaidu o dono madahaanau,

16:12  gei mee e-hai gii-kae dana baalanga akaa ahi e-honu i-nia malala-gaa, ala ne-gaamai i-hongo di gowaa dudu tigidaumaha, ge lua lima honu ‘incense’, gaa-kae nia maa gi-tua di tuuli gi-lodo di Gowaa Dabuaahia Huoloo.

16:13  Deelaa di gowaa e-llingi-ai nia ‘incense’ gi-hongo di ahi i-mua o Dimaadua, gei di huiahi o-nia ‘incense’ aalaa gaa-gahu di uhi Tebedebe o-di Hagababa la-gii-ngala, gi-dee-mmada ginai mee gaa-made.

16:14  Mee e-hai gii-kae ana dodo i-di kau-daane deelaa, ga-haga-nonnono nia maa gi ono madaalima gi-hongo di uhi Tebedebe deelaa, gaa-lawa ga-haga-nonnono labelaa i-nia holongo e-hidu i-mua Tebedebe o-di Hagababa.

16:15  Nomuli, gei mee ga-daaligi dana kuudi e-hai tigidaumaha e-wwede nia huaidu o-nia daangada, gei mee gaa-kae nia dodo di-maa gi-lodo di Gowaa Dabuaahia Huoloo, ga-haga-nonnono gi-hongo di uhi Tebedebe, mo i-mua Tebedebe o-di Hagababa, gadoo be dana hai dela ne-hai gi-nia dodo kau-daane.

16:16  Deenei di hai-hegau dabu e-haga-madammaa di Gowaa Dabuaahia Huoloo deelaa gi-daha mo nia hai gulugulua digau Israel mo nadau de-hagalongo. Mee e-hai gii-hai di mee deenei ang-gi di Hale-laa deelaa, idimaa di Hale-laa le e-duu i tungaalodo di waahale-laa dela gu-milimilia.

16:17  Tangada e-ulu gi-lodo di Hale-laa Dimaadua ai, i-di madagoaa o Aaron ma-ga-ulu gi-lodo di Gowaa Dabuaahia Huoloo e-hai ana hegau dabu haagi-hala, gaa-dae-loo gi dono ulu-mai gi-daha. Muli dono hai tegau dabu deenei e-haagi ono hala mo nia hala o dono madahaanau mo digau huogodoo,

16:18  gei mee e-hai-loo gii-hana gi-di gowaa dudu tigidaumaha, e-hai dana tigidaumaha dudu, e-haga-madammaa di-maa. Mee gii-kae ana dodo kau-daane mono dodo kuudi, e-dugu gi-hongo nia madaagoo ala i-nia madaaduge e-haa o-di gowaa dudu-tigidaumaha.

16:19  Mee ga-haga-nonnono nia dodo gi dono madaalima gi-hongo di gowaa dudu tigidaumaha i-nia holongo e-hidu. Deenei di hai e-haga-madammaa di mee deenei gi-daha mo nia huaidu o digau Israel, ge e-hai di-maa gii-dabu.

16:20  Di madagoaa Aaron ma-gaa-lawa di-hai tegau dabu o-di haga-madammaa di Gowaa Dabuaahia Huoloo, mo nia gowaa ala i-golo i-lodo di Hale-laa Dimaadua, mo-di gowaa dudu-tigidaumaha, gei mee e-hai gii-dugu ang-gi Dimaadua di kuudi mouli dela ne-hilihili ang-gi Azazel.

16:21  Mee e-hai gii-dugu ono lima gi-hongo di libogo o-di kuudi deelaa, ga-haga-modongoohia-aga nia haihai huaidu huogodoo, nia huaidu huogodoo, mo nia de-hagalongo huogodoo o digau Israel, gei mee gaa-wanga nia huaidu aanei huogodoo gi-hongo di libogo di kuudi deelaa. Gei di kuudi deelaa gaa-lahi gi-lodo di anggowaa go taane dela ne-hagatogomaalia belee lahi di-maa.

16:22  Gei di kuudi gaa-kae nadau huaidu huogodoo gi-lodo di gowaa lomo, gei taane deelaa ga-diiagi a-mee i-lodo di anggowaa.

16:23  Gei Aaron gaa-hana gi-lodo di Hale-laa, ga-daa gi-daha ono gahu hai-mee-dabu ala ne-ulu ginai i-mua dono ulu gi-lodo di Gowaa Dabuaahia Huoloo, gaa-dugu nia maa i-golo.

16:24  Mee e-hai gi-gaugau i-lodo di Gowaa Dabu ga-ulu-laa ono goloo donu. Nomuli, gei mee ga-ulu gi-di malaelae gaa-hai dana tigidaumaha dudu, e-haga-madammaa ono huaidu mo nia huaidu o-nia daangada.

16:25  Mee e-hai gii-dudu i-hongo di gowaa dudu-tigidaumaha nia kiliidi o-di manu dela ne-hai tigidaumaha wwede nia huaidu.

16:26  Taane dela ne-lahi di kuudi gi Azazel i-lodo di anggowaa, le e-hai gi-gaugau ono gahu mo dono huaidina gii-mmaa i-mua dono haneia gi-di waahale-laa.

16:27  Gei di kau-daane mo-di kuudi ala ne-daaligi belee hai-tigidaumaha wwede nia huaidu, aalaa nau dodo ne-gaamai gi-lodo di Gowaa Dabuaahia Huoloo ne-haga-madammaa nia huaidu, le e-hai gii-kae gi-daha mo-di waahale e-dudu. Nia gili, nia goneiga mono mee huogodoo ala i-lodo tinae le e-hai gii-dudu.

16:28  Tangada dela e-dudu nia maa le e-hai gi-gaugau ono gahu mo dono huaidina gii-mmaa i-mua dono haneia gi-di waahale-laa.

16:29  Malaa, nia haganoho ala ga-haga-modongoohia i-lala, le e-daudali go goodou i-nia madagoaa huogodoo ala ga-lloomoi. I-di madangaholu laangi o-di hidu malama, gei digau Israel huogodoo mo digau mai i-daha ala e-noho i nadau baahi, le e-hai gi-haga-onge ge hagalee ngalua.

16:30  I-di laangi deelaa, gei tegau dabu o-di haga-madammaa le e-hai e-haga-madammaa digaula gi-daha mo nadau huaidu huogodoo, gi-madammaa digaula i-di madagoaa hai-daumaha.

16:31  Di laangi deelaa e-hai di laangi hagalabagau huoloo, di laangi e-haga-onge ge hagalee ngalua. Nia haganoho aanei le e-hai gi-daudali go goodou i-nia laangi huogodoo ala ga-lloomoi.

16:32  Tagi aamua hai-mee-dabu dela ne-haga-menege-aga ga-hagadabu belee kae di waawa o dono damana, deelaa go mee dela e-hai tegau dabu o-di haga-madammaa deenei. Mee e-hai gi-ulu nia goloo tangada hai-mee-dabu,

16:33  gaa-hai tegau dabu o-di haga-madammaa i-lodo di Gowaa Dabuaahia Huoloo, mo nia gowaa ala i-golo i-lodo di Hale-laa Dimaadua, di gowaa dudu-tigidaumaha, digau hai-mee-dabu, mo digau Israel huogodoo.

16:34  Nia haganoho aanei le e-hai gi-daudali i-nia madagoaa huogodoo. Tegau dabu deenei le e-hai gii-hai haga-dahi i-lodo di ngadau e-dahi, e-haga-madammaa digau Israel gi-daha mo nadau huaidu huogodoo. Malaa, Moses guu-hai nia mee huogodoo gii-hai be nnelekai Dimaadua ne-hai.