Kapingamarangi - Leviticus - 9

9:1  I-di laangi dela i-muli nnegau dabu o-di haga-dabu ne-hai, Moses ga-gahi-mai a Aaron mo ana dama-daane, mo nia dagi o digau Israel.

9:2  Gei mee ga-helekai gi Aaron, “Kaina dau damaa-kau-daane mo dau siibi-daane ala nau milimilia ai, tigidaumaha-ina nia maa ang-gi Dimaadua, di kau-daane le e-hai tigidaumaha wwede nia huaidu, gei siibi-daane le e-hai tigidaumaha dudu.

9:3  Gei goe helekai labelaa ang-gi digau Israel bolo gi-gaamai di-nadau kuudi-daane e-hai tigidaumaha wwede nia huaidu, mo-di kau-daane dela e-dahi dono ngadau, ge dahi siibi dela e-dahi dono ngadau dela ono milimilia ai, nia manu aanei le e-hai tigidaumaha dudu,

9:4  ge dahi kau-daane mo dahi siibi-daane e-hai tigidaumaha hagadaubuni. Digaula gi-tigidaumaha-ina nia manu aanei huogodoo ang-gi Dimaadua, ngaadahi mo di-nadau tigidaumaha huwa-laagau dela ne-unugi gi-nia lolo. Digaula e-hai gii-hai di mee deenei, idimaa Dimaadua la-ga-hanimoi gi digaula dangi-nei.”

9:5  Gei digaula gu-gaamai gi-mua di Hale-laa nia mee huogodoo ala ne-hagi-anga go Moses gi digaula, gei digau Israel huogodoo gu-dagabuli-mai gi-di gowaa deelaa belee daumaha ang-gi Dimaadua.

9:6  Moses ga-helekai gi digaula, “Dimaadua gu-helekai-adu gi goodou bolo goodou gi-heia nia mee aanei huogodoo, gei di maahina o dono madamada ga-gila-adu gi goodou.”

9:7  Gei mee ga-helekai gi Aaron, “Hana gi-di gowaa dudu tigidaumaha, heia tigidaumaha e-wwede nia huaidu, mo tigidaumaha dudu e-wwede o huaidu mo nia huaidu o-nia daangada. Heia tigidaumaha deenei e-wwede nia huaidu o-nia daangada, gii-hai be nnelekai Dimaadua ne-hai.”

9:8  Gei Aaron gaa-hana gi-di gowaa dudu tigidaumaha, ga-daaligi tamaa-kau-daane e-hai tigidaumaha e-wwede ono huaidu.

9:9  Nia dama-daane a-maa ga-gaamai nia dodo gi mee, gei mee ga-daalo dono madaalima gi-lodo nia dodo, gaa-hunu gi-di gili nia madaagoo ala i-nia madaaduge o-di gowaa dudu tigidaumaha, gaa-llingi nia dodo ala ne-dubu gi tono di gowaa dudu tigidaumaha.

9:10  Nomuli, gei mee gaa-dudu nia kiliidi o-di manu i-hongo di gowaa dudu tigidaumaha, ngaadahi mo nia ‘kidney’, mo nia gowaa ala e-humalia i-di gili di ade, gii-hai be nnelekai Dimaadua ala ne-hagi-anga gi Moses.

9:11  Gei mee gaa-dudu nia goneiga mo dono gili i-daha mo-di waahale.

9:12  Aaron ga-daaligi labelaa di manu dela belee hai dana tigidaumaha dudu. Nia dama-daane a-maa ga-gaamai nia dodo gi mee, gei mee ga-kilikili nia maa gi-di gili nia baahi e-haa o-di gowaa dudu tigidaumaha.

9:13  Digaula gaa-wanga labelaa gi mee di libogo mo nia mee huogodoo o-di manu, gei mee gaa-dudu nia maa i-hongo di gowaa dudu tigidaumaha.

9:14  Gei mee ga-gaugau di geiga mo nia wae, gaa-dudu i-hongo di gowaa dudu tigidaumaha, dalia nia tigidaumaha ala i-golo.

9:15  Nomuli, gei mee ga-hai-tigidaumaha dela ang-gi nia daangada. Mee guu-kae di kuudi dela belee tigidaumaha ang-gi nia huaidu o-nia daangada, ga-daaligi di-maa, ga-tigidaumaha gadoo be tigidaumaha e-wwede ono huaidu.

9:16  Mee ga-gaamai labelaa di manu dela belee hai tigidaumaha dudu, ga-tigidaumaha di-maa be-di hai dela gu-haganoho.

9:17  Mee ga-hai-tigidaumaha huwa-laagau, gaa-taa dono babaalima gii-honu palaawaa, gaa-kae gaa-dudu i-hongo di gowaa dudu tigidaumaha. (Di mee deenei e-hagapuni-ang-gi nia tigidaumaha dudu o-nia laangi huogodoo).

9:18  Mee ga-daaligi di kau-daane mo siibi-daane e-hai tigidaumaha haga-daubuni e-pono nia daangada. Nia dama-daane a-maa ga-gaamai nia dodo gi mee, gei mee ga-kilikili nia maa gi-di gili nia baahi e-haa o-di gowaa dudu tigidaumaha.

9:19  Aaron gaa-dugu nia kiliidi o-di kau mo-di siibi

9:20  gi-hongo nia hadahada o-nia manu, gaa-kae nia maa huogodoo gi-di gowaa dudu tigidaumaha. Mee gaa-dudu nia kiliidi i-hongo di gowaa dudu tigidaumaha,

9:21  gaa-wanga nia hadahada mo nia wae gau-donu e-hai di wanga-dehuia hagalabagau ang-gi Dimaadua, gii-hai be nnelekai Moses ne-hai.

9:22  Di madagoaa Aaron ne-lawa di-hai nia tigidaumaha huogodoo, gei mee ga-daahi ono lima gi-hongo nia daangada huogodoo, ga-hagamaluagina digaula, gaa-lawa gaa-gaga gi-lala.

9:23  Moses mo Aaron gaa-hula gi-lodo di Hale-laa Dimaadua. Di madagoaa meemaa ne-ulu-mai gi-daha, gei meemaa ga-hagamaluagina nia daangada, gei di maahina o-nia madamada Dimaadua gu-gila-mai gi-nia daangada huogodoo.

9:24  I-di madagoaa-hua deelaa, gei Dimaadua ga-hagau-mai dana ahi gaa-dudu tigidaumaha dudu mo nia kiliidi ala i-hongo di gowaa dudu tigidaumaha. Di madagoaa nia daangada ne-mmada gi-di mee deenei, digaula huogodoo ga-wwolowwolo gaa-pala gi-lala, nadau golomada guu-tale i-hongo di gelegele.