Geez - Numbers - 13

13:1  ወነበቦ ፡ እግዚአብሔር ፡ ለሙሴ ፡ ወይቤሎ ፤

13:2  ፈኑ ፡ ዕደወ ፡ ሰብአ ፡ ዐይን ፡ እለ ፡ ይሬእይዋ ፡ ለምድረ ፡ ከናአን ፡ እንተ ፡ አነ ፡ እሁቦሙ ፡ ለደቂቀ ፡ እስራኤል ፡ ከመ ፡ ይኰንንዋ ፤ አሐዱ ፡ አሐዱ ፡ ብእሲ ፡ እምውስተ ፡ ነገዶሙ ፡ ወእምውስተ ፡ ሕዘቢሆሙ ፡ ዘአብያተ ፡ አበዊሆሙ ፤ ወትፌኑ ፡ ኵሎ ፡ ዐበይቶሙ ።

13:3  [*ወፈነዎሙ ፡ ሙሴ ፡ እምነ ፡ ገዳም ፡ ዘፋራን ፡ በቃለ ፡ እግዚአብሔር ፡ ወእሉ ፡ ኵሎሙ ፡ ዕደው ፡ ዐበይቶሙ ፡*] ለደቂቀ ፡ እስራኤል ፡ እሙንቱ ።

13:4  ወዝንቱ ፡ አስማቲሆሙ ፡ ዘእምነገደ ፡ ሮቤል ፡ [ሰ]ሙ ፡ ወልደ ፡ ዝ[ኩር] ።

13:5  ወዘእምነገደ ፡ ስምዖን ፡ ሰፈጥ ፡ ወልደ ፡ ሱሪ ።

13:6  ወዘእምነገደ ፡ ይሁዳ ፡ ካ[ሌብ] ፡ ወልደ ፡ ዬፎኔ ።

13:7  ወዘእምነገደ ፡ ይስካር ፡ ኢጋል ፡ ወልደ ፡ ዮሴፍ ።

13:8  ወዘእምነገደ ፡ ኤፍሬም ፡ አውሴ ፡ ወልደ ፡ ነዌ ።

13:9  ወዘእምነገደ ፡ ብንያሚ ፡ ፈልጢ ፡ ወልደ ፡ ራፈው ።

13:10  ወዘእምነገደ ፡ ዛቡሎን ፡ ጉዲዬል ፡ ወልደ ፡ [ሶ]ዲ ።

13:11  ወዘእምነገዶ ፡ ዮሴፍ ፡ ዘእምደቂቀ ፡ መናሴ ፡ ገዲ ፡ ወልደ ፡ ሱሲ ።

13:12  ወዘእምነገደ ፡ ዳን ፡ አሚሔል ፡ ወልደ ፡ ገማሊ ።

13:13  ወዘእምነገደ ፡ አሴር ፡ ሳቱር ፡ ወልደ ፡ ሚካኤል ።

13:14  ወዘእምነገደ ፡ ንፍታሌም ፡ ናቢ ፡ ወልደ ፡ ያቢ ።

13:15  ወዘእምነገደ ፡ ጋድ ፡ ጉዲያል ፡ ወልደ ፡ ማኪ ።

13:16  ዝንቱ ፡ ውእቱ ፡ አስማቲሆሙ ፡ ለዕደው ፡ እለ ፡ ፈነወ ፡ ሙሴ ፡ ከመ ፡ ይርአይዋ ፡ ለይእቲ ፡ ምድር ፡ ወሰመዮ ፡ ሙሴ ፡ ለአውሴ ፡ ወልደ ፡ ነዌ ፡ ኢየሱስ ።

13:17  ወፈነዎሙ ፡ ሙሴ ፡ ከመ ፡ ይርአይዋ ፡ ለይእቲ ፡ ምድረ ፡ ከናአን ፡ ወይቤሎሙ ፡ ዕረጉ ፡ ውስተ ፡ ውእቱ ፡ ገዳም ፡ ወእምዝ ፡ ተዐርጉ ፡ ውስተ ፡ ደብር ።

13:18  ወርእይዋ ፡ ለይእቲ ፡ ምድር ፡ እንተ ፡ ከመ ፡ እፎ ፡ ይእቲ ፡ ወሕዝብኒ ፡ እለ ፡ ይነብሩ ፡ ውስቴታ ፡ እመ ፡ ጽኑዓን ፡ እሙንቱ ፡ ወእመ ፡ ድኩማን ፡ ወእመ ፡ ውሑዳን ፡ እሙንቱ ፡ ወእመ ፡ ብዘኃን ።

13:19  ወእንተ ፡ ከመ ፡ እፎ ፡ ይእቲ ፡ ምድራ ፡ እንተ ፡ ውስቴታ ፡ ይነብሩ ፡ እሙንቱ ፡ እመ ፡ ሠ ናይት ፡ ይእቲ ፡ ወእመ ፡ እኪት ፡ ወዘከመ ፡ እፎ ፡ ውእቶን ፡ አህጉሪሆ[ሙ] ፡ እለ ፡ ውስቴቶን ፡ ይነብሩ ፡ እሙንቱ ፡ ወለእመ ፡ ቦንቱ ፡ ቅጽረ ፡ ወለእመ ፡ አልቦንቱ ።

13:20  ወእንተ ፡ ከመ ፡ እፎ ፡ ይእቲ ፡ ምድራ ፡ ለእመ ፡ ጥልልት ፡ ወለእመ ፡ ይብስት ፡ ለእመ ፡ ቦቱ ፡ ውስቴታ ፡ አእዋመ ፡ ወለእመ ፡ አልቦቱ ፡ ወርእየክሙ ፡ ንሥኡ ፡ እምውስተ ፡ ፍሬሃ ፡ ወመዋዕሊሁ ፡ መዋዕለ ፡ ማእረር ፡ እንበለ ፡ ይትቀሠም ፡ ወይን ።

13:21  ወዐርጉ ፡ ወርእይዋ ፡ ለይእቲ ፡ ምድር ፡ እምነ ፡ ገዳም ፡ ዘ[ፂን] ፡ እስከ ፡ ሮዖብ ፡ እንዘ ፡ የሐውሩ ፡ ለኤመት ።

13:22  ወዐርጉ ፡ እንተ ፡ ገዳም ፡ ወበጽሑ ፡ እስከ ፡ ኬብሮን ፡ ወህየ ፡ ውእቱ ፡ አኪ[መ]ን ፡ ወሴሲ ፡ ወተላሚ ፡ ፍጥረቱ ፡ ለኤናቅ ፡ ወኬብሮንሂ ፡ እንተ ፡ በሰብፀቱ ፡ ዓመት ፡ ተነድቀት ፡ እምቅድመ ፡ ሀገረ ፡ ጠኒ ፡ ዘግብጽ ።

13:23  ወበጽሑ ፡ እስከ ፡ ቈላተ ፡ ዐጽቅ ፡ ወርእይዋ ፡ ወገመዱ ፡ እምህየ ፡ ሐረገ ፡ ወይን ፡ ወውስቴታ ፡ አሐዱ ፡ አስካል ፡ ወጾርዎ ፡ በመዝለል ፡ ወእምውስተ ፡ ሮማንሂ ፡ ወእምውስተ ፡ በለስሂ ።

13:24  ወሰመይዎ ፡ ለውእቱ ፡ መካን ፡ ቈላ ፡ ሐረግ ፡ [በእንተ ፡ ሐረግ ፡] ዘገመዱ ፡ እምህየ ፡ ደቂቀ ፡ እስራኤል ።

13:25  ወገብኡ ፡ እምህየ ፡ ርእዮሙ ፡ ይእተ ፡ ምድረ ፡ በአርብዓ ፡ ጽባሕ ።

13:26  ወሐዊሮሙ ፡ በጽሑ ፡ ኀበ ፡ ሙሴ ፡ ወአሮን ፡ ወኀበ ፡ ኵሎሙ ፡ ተዓይኒሆሙ ፡ ለደቂቀ ፡ እስራኤል ፡ ውስተ ፡ ገዳም ፡ ዘፋራን ፡ ቃዴስ ፡ ወነገርዎሙ ፡ ዜናሆሙ ፡ ወለኵሉ ፡ ተዓይኒሆሙ ፡ ወአርአይዎሙ ፡ ፍሬሃ ፡ ለይእቲ ፡ ምድር ።

13:27  ወነገርዎሙ ፡ ወይቤሉ ፡ በጻሕነ ፡ ውስተ ፡ ይእቲ ፡ ምድር ፡ ኀበ ፡ ፈነውከነ ፡ ምድር ፡ እንተ ፡ ትውሕዝ ፡ ሐሊበ ፡ ወመዓረ ፡ ወናሁ ፡ ፍሬሃ ።

13:28  ወሕዝብኒ ፡ ዘይነብር ፡ ውስቴታ ፡ ለይእቲ ፡ ምድር ፡ ጽኑዕ ፡ ወአህጉሪሃኒ ፡ ጽኑዕ ፡ ጥቀ ፡ ወዐበይት ፡ ወቦንቱ ፡ ቅጽረ ፡ ወሙላዱ ፡ ለኤናቅ ፡ ርኢነ ፡ በህየ ።

13:29  ወዐማሌቅ ፡ ኅዱራን ፡ ውስተ ፡ ምድር ፡ እንተ ፡ መንገለ ፡ አዜብ ፡ ወኬጤዎስ ፡ ወአሞሬዎስ ፡ ወኤዌዎስ ፡ ወኢየቡሴዎስ ፡ ኅዱራን ፡ ውስተ ፡ አድባሪሃ ፡ ወከናአንሰ ፡ ኅዱራን ፡ መንገለ ፡ ባሕር ፡ ወመንገለ ፡ ፈለገ ፡ ዮርዳንስ ።

13:30  ወአዘዘ ፡ ካሌብ ፡ ያርምም ፡ ሕዝብ ፡ በኀበ ፡ ሙሴ ፡ [ወይቤ ፡] አልቦ ፡ አላ ፡ ዐሪገ ፡ ነዐርግ ፡ ወንትዋረሳ ፡ እስመ ፡ ክሂለኒ ፡ ንክሎሙ ።

13:31  ወይቤሉ ፡ እልክቱ ፡ እለ ፡ ዐርጉ ፡ ምስሌሆሙ ፡ ዕደው ፡ ኢነዐርግ ፡ እስመ ፡ ኢንክል ፡ ዐሪገ ፡ ኀበ ፡ ውእቱ ፡ ሕዝብ ፡ እስመ ፡ ይጸንዑ ፡ እምኔነ ፡ ፈድፋደ ።

13:32  ወግርምተ ፡ ረሰይዋ ፡ ለይእቲ ፡ ምድር ፡ እንተ ፡ ርእዩ ፡ በኀበ ፡ ደቂቀ ፡ እስራኤል ፡ እንዘ ፡ ይብሉ ፡ ምድር ፡ እንተ ፡ ሖርነ ፡ ከመ ፡ ንርአያ ፡ ምድር ፡ ይእቲ ፡ እንተ ፡ ተዐቅቦሙ ፡ ለእለ ፡ ይነብሩ ፡ ውስቴታ ፡ ወኵሉ ፡ ሕዝብ ፡ ዘርኢነ ፡ ዕደው ፡ እሙንቱ ፡ እለ ፡ ፍድፉድ ፡ ኑኆሙ ።

13:33  ወርኢነ ፡ በህየ ፡ እለ ፡ [ያርብ]ሕ ፡ ወኮነ ፡ ቅድሜሆሙ ፡ ከመ ፡ አናብጥ ፡ እለ ፡ ከማሁኒ ፡ ቅድሜሆሙ ።