Kapingamarangi - Numbers - 8

8:1  Dimaadua ga-helekai gi Moses,

8:2  “Helekai gi Aaron bolo ia ma-ga-haga-noho nia malama e-hidu gi-hongo nadau lohongo, geia gaa-dugu nia maa gii-mee di maahina gi-mua.”

8:3  Aaron gu-hagalongo gu-haga-noho nia malama e-huli gi-mua ono lohongo malama.

8:4  Mai di ulu gi-nua gaa-tugi i-di tono i-lala o-di lohongo malama la-ne-hai gi-nia goolo ne-tugi gi-di haamaa gii-hai be-di hai Dimaadua ne-hagi-anga gi Moses.

8:5  Dimaadua ga-helekai gi Moses,

8:6  “Dugua-gee gi-daha mo digau Levi mo digau Israel, ga-haga-madammaa digaula

8:7  be-di hai deenei: hagatulu-ina digaula gi-nia wai haga-madammaa, heia digaula gi-dahia gi-daha nia ngaahulu nadau gili hagatau gi tulumanu dahi-ngudu, ge gi-tuugia nadau goloo. Gei digaula ga-madammaa.

8:8  Gei digaula gaa-kae tamaa-kau-daane mo nia palaawaa e-unugi gi-nia lolo-olib ala belee tigidaumaha, gei goe e-kae dau damaa-kau-daane e-hai-ai tigidaumaha wwede nia huaidu.

8:9  Nomuli, gei goe ga-haga-dagabuli digau Israel huogodoo, gaa-hai digau Levi gii-tuu i-mua dogu Hale-laa.

8:10  Digau Israel gii-dugu nadau lima gi-hongo nia libogo digau Levi,

8:11  gei Aaron ga-hagadabu digau Levi mai gi-di-Au e-hai-ai nia wanga-dehuia mai digau Israel, gii-mee digaula di-hai agu moomee.

8:12  Digau Levi la-gaa-dugu nadau lima gi-hongo nia libogo nia damaa-kau daane e-lua ala belee tigidaumaha, e-dahi e-hai tigidaumaha wwede nia huaidu, e-dahi e-hai tigidaumaha dudu, e-hai taumaha o-di haga-madammaa digau Levi.

8:13  “Haga-dabu-ina digau Levi e-hai-ai tigidaumaha wanga-dehuia mai gi-di-Au, ge heia Aaron mo ana dama-daane gi-dagia digaula.

8:14  Dugua-gee digau Levi i-di ala deenei gi-daha mo digau Israel, gii-hai digaula nia daangada ni-aagu.

8:15  I-muli dau haga-madammaa mo-di haga-dabu digau Levi, gei digaula gaa-donu di hai nnegau i-lodo di Hale-laa.

8:16  Au gu-hai-mee gi digaula e-pono nia lohongo nia ulu-mmaadua dama-daane o digau Israel, ge digaula guu-hai nia daangada ni-aagu modogo-Au.

8:17  Dagu daaligi nia ulu-mmaadua huogodoo i Egypt, Au gu-haga-dabu nia ulu-mmaadua nia madahaanau digau Israel mo nia ulu-mmaadua o nadau manu huogodoo.

8:18  Dolomeenei gei Au e-kae digau Levi, hagalee go nia ulu-mmaadua digau Israel,

8:19  gei Au e-wanga digau Levi gi Aaron mo ana dama-daane, e-hai nia wanga-dehuia mai digau Israel, e-ngalua i-lodo di Hale-laa e-pono di lohongo digau Israel, gei e-hagaloohi digau Israel ma-gaa-tale gi-nia haingadaa ma-gaa-hula gi-hoohoo gi-di Gowaa-Dabu.”

8:20  Gei Moses, Aaron mo digau Israel huogodoo ga-hagadabu digau Levi, be nnelekai Dimaadua ne-hai gi Moses.

8:21  Digau Levi gu-haga-madammaa ginaadou mo-di tugi nadau goloo, gei Aaron gu-haga-dabu digaula be nia wanga-dehuia humalia ang-gi Dimaadua. Aaron guu-hai labelaa taumaha o-di haga-madammaa digau Levi.

8:22  Nia daangada guu-hai nia mee huogodoo Dimaadua ne-helekai-ai i-di gili digau Levi. Malaa, digau Levi guu-mee di-hai-hegau i-lodo di Hale-laa i-lala Aaron mo ana dama-daane.

8:23  Dimaadua ga-helekai gi Moses,

8:24  “Tangada Levi dela e-25 ono ngadau le e-ngalua i-lodo dogu Hale-laa,

8:25  gei mee ga-haga-lawa ana hegau i dono 50 ngadau.

8:26  Nomuli, gei mee e-mee di-hagamaamaa ono ehoo Levi di hai nadau hegau i-lodo di Hale-laa, gei mee hagalee bida hai-hua dana mee i nnegau aalaa. Deenei dau hai e-haga-menegenege nnegau digau Levi.”