Site uses cookies to provide basic functionality.

OK
PSALMS
Prev Up Next
Chapter 109
Psal Maori 109:1  Ki te tino kaiwhakatangi. He himene na Rawiri. E te Atua, e whakamoemiti nei ahau, kei wahangu koe:
Psal Maori 109:2  Kua puaki hoki te mangai o te tangata kino me te mangai o te tangata tinihanga, ki te he moku: he teka o ratou arero, e korero nei moku.
Psal Maori 109:3  I karapotia hoki ahau e ratou ki nga kupu mauahara, a i whawhai takekore ki ahau.
Psal Maori 109:4  Mo toku aroha he riri ta ratou whakautu: ko ahau ia, he inoi taku.
Psal Maori 109:5  E homai ana e ratou ki ahau he kino mo te pai, he mauahara mo toku aroha.
Psal Maori 109:6  Meinga he tangata kino hei rangatira mona; kia tu he hoariri ki tona ringa matau.
Psal Maori 109:7  Kia tau te he ki a ia, ina whakawakia: kia waiho ano tana inoi hei hara.
Psal Maori 109:8  Kia torutoru ona ra; kia riro tana mahi tirotiro i tetahi atu.
Psal Maori 109:9  Kia pania ana tamariki, kia pouarutia hoki tana wahine.
Psal Maori 109:10  Kia kopikopiko noa ana tamariki, pinono ai: kia rapu kai hoki ma ratou i o ratou wahi mokemoke.
Psal Maori 109:11  Kia haoa e te kaituku moni ana mea katoa; kia pahuatia hoki e nga tangata iwi ke ana mauiuitanga.
Psal Maori 109:12  Kaua tetahi hei hoatu noa i te aroha ki a ia: kaua hoki tetahi hei atawhai i ana pani.
Psal Maori 109:13  Kia hatepea putia ona uri: a i to muri whakatupuranga kia horoia rawatia atu o ratou ingoa.
Psal Maori 109:14  Kia maharatia e Ihowa te kino o ona matua: kei murua hoki te hara o tona whaea.
Psal Maori 109:15  Kia mau tonu ki te aroaro o Ihowa: kia hatepea atu ai e ia te maharatanga ki a ratou i runga i te whenua.
Psal Maori 109:16  Mona kihai i mahara ki te mahi tohu: heoi tukino ana ia i te ware, i te rawakore, i te hunga ngakau maru, kia patua ai ratou.
Psal Maori 109:17  Ae ra, i pai ia ki te kanga, a kua tae mai ki a ia: kihai ia i aro ki te manaaki, heoi kua mamao tera i a ia.
Psal Maori 109:18  I kakahu ia i te kanga ki a ia, ano ko tona kakahu: na kua tae tera ki roto ki a ia ano he wai, me he hinu hoki ki roto ki ona wheua.
Psal Maori 109:19  Waiho ki a ia hei kakahu hipoki mona, hei whitiki hoki e whitikiria tonutia ai ia.
Psal Maori 109:20  Na hei utu tena ma Ihowa ki oku hoariri, ki te hunga hoki e korero kino nei ki toku wairua.
Psal Maori 109:21  Kia puta tau mahi moku, e te Atua, e te Ariki, he whakaaro ki tou ingoa: na te mea he pai tau mahi tohu, whakaorangia ahau,
Psal Maori 109:22  He ware hoki ahau, he rawakore, kua mamae hoki toku ngakau i roto i ahau.
Psal Maori 109:23  Ka riro ahau me te atarangi e whakawairua kau ana: e peipeia ana ahau me he mawhitiwhiti.
Psal Maori 109:24  Hurorirori kau oku turi i te nohopuku; a e kohia ana te ngako o oku kikokiko.
Psal Maori 109:25  Kua waiho ahau hei tawainga ma ratou: ka kite ratou i ahau, ka ruru o ratou matenga.
Psal Maori 109:26  Awhinatia ahau, e Ihowa, e toku Atua: kia rite ki tou aroha tau whakaora i ahau.
Psal Maori 109:27  Kia matau ai ratou ko tou ringa itene: a nau tenei, e Ihowa, i mea.
Psal Maori 109:28  Ma ratou e kanga, mau ia e manaaki: kia whakama ratou ina whakatika; ko tau pononga ia kia hari.
Psal Maori 109:29  Kia whakakakahuria oku hoariri ki te whakama, a ko to ratou numinumi hei koroka hipoki mo ratou.
Psal Maori 109:30  Ka tino whakawhetai toku mangai ki a Ihowa, ae ra, ka whakamoemiti ahau ki a ia i waenganui o te mano.
Psal Maori 109:31  E tu hoki ia ki te ringa matau o te rawakore, hei whakaora i a ia i te hunga e whakahe ana i tona wairua.