Esperanto - Psalms - 139

139:1  Ho Eternulo, Vi min esploras kaj min konas.

139:2  Vi scias, kiam mi sidas kaj kiam mi leviĝas; Vi komprenas mian penson de malproksime.

139:3  Kiam mi iras kaj kiam mi ripozas, Vi estas ĉirkaŭ mi, Kaj ĉiujn miajn vojojn Vi konas.

139:4  Ĉar antaŭ ol troviĝas vorto sur mia lango, Jen, ho Eternulo, Vi ĉion jam scias.

139:5  De malantaŭe kaj de antaŭe Vi ĉirkaŭbaris min Kaj metis sur min Vian manon.

139:6  Mirinda estas por mi tia sciado, tro alta; Mi ĝin ne povas kompreni.

139:7  Kien mi iros for de Via spirito? Kaj kien mi kuros for de Via vizaĝo?

139:8  Se mi leviĝos al la ĉielo, Vi estas tie; Se mi kuŝiĝos en Ŝeol, jen Vi tie estas.

139:9  Ĉu mi okupos la flugilojn de la matenruĝo, Ĉu mi loĝiĝos sur la rando de la maro:

139:10  Ankaŭ tie Via mano min kondukos, Kaj Via dekstra mano min tenos.

139:11  Se mi diros: Mallumo min kovros, Kaj la lumo ĉirkaŭ mi fariĝos nokto:

139:12  Eĉ mallumo ne mallumas antaŭ Vi, Kaj la nokto lumas kiel tago; Mallumo fariĝas kiel lumo.

139:13  Ĉar Vi kreis mian internaĵon, Formis min en la ventro de mia patrino.

139:14  Mi gloras Vin, ĉar mi estas mirinde kreita; Mirindaj estas Viaj kreitaĵoj, Kaj mia animo tion bone konscias.

139:15  Ne estis kaŝitaj antaŭ Vi miaj ostoj, Kiam mi estis kreata en kaŝiteco, Kiam mi estis formata en la profundo de la tero.

139:16  Mian embrion vidis Viaj okuloj, Kaj en Via libro estis enskribitaj ĉiuj tagoj destinitaj, Kiam ankoraŭ eĉ unu ne ekzistis.

139:17  Kiel grandvaloraj estas por mi Viaj pensoj, ho Dio! Kiel granda estas ilia nombro!

139:18  Se mi ilin kalkulus, ili estus pli multaj ol la sablo; Kiam mi vekiĝas, mi estas ankoraŭ kun Vi.

139:19  Mortigu, ho Dio, la malvirtulojn, Kaj sangaviduloj foriĝu de mi!

139:20  Ili parolas pri Vi malice, Kaj Viaj malamikoj leviĝas por trompo.

139:21  Viajn malamantojn, ho Eternulo, mi ja malamas, Kaj Viajn kontraŭulojn mi abomenas.

139:22  Per ekstrema malamo mi ilin malamas; Ili fariĝis por mi malamikoj.

139:23  Esploru min, ho Dio, kaj konu mian koron; Provu min kaj sciu miajn pensojn.

139:24  Kaj rigardu, ĉu mi estas sur malbona vojo, Kaj gvidu min sur la vojo de eterneco.