CSlElizabeth - Exodus - 23

23:1  Да не приимеши слуха суетна, да не приложишися с неправедным быти свидетель неправеден:

23:2  да не будеши со многими на злобу, да не приложишися ко множеству уклонитися со множайшими, яко превратити суд,

23:3  и нищаго да не помилуеши на суде.

23:4  Аще же срящеши говядо врага твоего или осля его заблуждающее, обратив да отдаси ему:

23:5  аще же узриши осля врага твоего падшее под бременем его, да не мимоидеши е, но да воздвигнеши е с ним.

23:6  Да не превратиши суда нищему в суде его.

23:7  От всякаго слова неправеднаго да отступиши: неповинна и праведна да не убиеши, и не оправдиши нечестиваго даров ради,

23:8  и да не возмеши даров: дары бо ослепляют очи видящым и погубляют словеса праведна.

23:9  И пришелца не оскорбляйте, ни стужите (ему): вы бо весте душу пришелчу, понеже сами бесте пришелцы в земли Египетстей.

23:10  Шесть лет да сееши землю твою и да собереши плоды ея:

23:11  в седмое же оставление да сотвориши и опустиши ю, и да ясти будут убозии языка твоего, останки же да снедят зверие дивии: тако да сотвориши винограду твоему и масличию твоему.

23:12  В шесть дний да сотвориши дела твоя, в седмый же день покой: да почиет вол твой и осел твой, и да почиет сын рабы твоея и пришлец.

23:13  Вся, елика глаголах вам, сохраните, имен же богов инех не поминайте, ниже да слышатся изо уст ваших.

23:14  Три краты в лете сотворите Ми праздник:

23:15  праздник опресноков сохраните творити, седмь дний ядите опресноки, якоже заповедах тебе, во время месяца новых плодов, в той бо изшел еси из Египта, да не явишися предо Мною тощь:

23:16  и праздник жатвы первородных жит сотвориши от дел твоих, яже посееши на ниве твоей: и праздник скончания при исходе лета в собрании дел твоих, яже от нив твоих.

23:17  Три краты в лете да явится всяк мужеск пол твой пред Господем Богом твоим.

23:18  Егда бо изжену языки от лица твоего и разширю пределы твоя, да не пожреши на квасе крове жертвы Моея, ниже да долежит тук праздника Моего до утрия.

23:19  Начатки первых жит земли твоея да внесеши в дом Господа Бога твоего. Да не свариши ягняте во млеце матере его.

23:20  И се, Аз послю Ангела Моего пред лицем твоим, да сохранит тя на пути, яко да введет тя в землю, юже уготовах тебе:

23:21  вонми себе и послушай Его, и не ослушайся Его: не обинется бо тебе, имя бо Мое есть на Нем:

23:22  аще слухом послушаеши гласа Моего и сотвориши вся, елика Аз заповедаю тебе, и сохраниши завет Мой, будете Ми люди избранни от всех язык: Моя бо есть вся земля, вы же будете Ми царское священие и язык свят. Сия словеса да речеши сыном Израилевым. Аще слухом послушаеши гласа Моего и сотвориши вся, елика реку тебе, враг буду врагом твоим и сопротивлюся сопротивником твоим.

23:23  Пойдет бо Ангел Мой наставляяй тя и введет тя ко Аморрею и Хеттею, и Ферезею и Хананею, и Гергесею и Евею и Иевусею, и потреблю их (от лица вашего):

23:24  да не поклонишися богом их, ниже послужиши им: да не сотвориши по делом их, но разорением разориши и сокрушением сокрушиши капища их,

23:25  и да послужиши Господу Богу твоему: и благословлю хлеб твой и вино твое и воду твою, и отвращу болезнь от вас.

23:26  Не будет безчаден, ниже неплоды на земли твоей: число дний твоих исполняя исполню.

23:27  И страх послю ведущий тя, и устрашу вся языки, в няже ты входиши к ним, и дам вся сопротивники твоя в бегуны:

23:28  и послю шершни пред тобою, и изжену Аморреи и Евеи, и Иевусеи и Хананеи и Хеттеи от тебе:

23:29  не изжену их в лете единем, да не будет земля пуста, и мнози будут на тя звери земнии:

23:30  помалу помалу изжену их от тебе, дондеже возрастеши и наследиши землю.

23:31  И положу пределы твоя от Чермнаго моря до моря Филистимля, и от пустыни до реки великия Евфрата, и предам в руце ваши седящих на земли и изжену их от тебе:

23:32  да не смесишися с ними, и с боги их да не завещаеши завета,

23:33  и да не останутся на земли твоей, да не сотворят тя согрешити ко Мне: аще бо поработаеши богом их, сии будут тебе в соблазн.