CSlElizabeth - Exodus - 37

37:1  И сотвориша скинии десять опон:

37:2  двадесять и осмь лакот долгота единыя опоны, таяжде бяше всем, и четырех лакот широта опоны единыя.

37:3  И сотвориша завесу от синеты и багряницы, и червленицы спрядены и виссона сканаго, дело швенно херувимы:

37:4  и возложиша ю на четыри столпы негниющыя позлащены златом, и верхи их златы, и стояла их четыри сребряна.

37:5  И сотвориша завесу дверем скинии свидения от синеты и багряницы, и червленицы спрядены и виссона сканаго, дело швенно херувимы,

37:6  и столпы их пять и крючки их: и главицы их и верхи их позлатиша златом, и стояла их пять медяна.

37:7  И сотвориша двор к югу, опоны двора из виссона сканаго, сто на сто:

37:8  и столпы их двадесять, и стояла их двадесять медяна:

37:9  и страна к северу, сто на сто: и страна к югу, сто на сто, и столпы их двадесять, и стояла их двадесять медяна:

37:10  и страна к морю, опоны пятидесят лактей, столпы их десять, и стояла их десять:

37:11  и страна к востоку пятидесят лактей,

37:12  опоны пятинадесяти лактей, яже созади, и столпы их три, и стояла их три.

37:13  И на вторей задней стране сюду и сюду у дверий двора, опоны пятинадесяти лактей: столпы их три, и стояла их три.

37:14  Вся опоны скинии из виссона сканаго,

37:15  и стояла столпов их медяна, и петли их сребряны, и главицы их посребрены сребром, и столпы их посребрены сребром, вси столпи двора.

37:16  И завеса дверий двора дело пестрящаго, из синеты и багряницы, и червленицы прядены и виссона сканаго: двадесяти лактей долгота, и высота и широта пяти лактей, равны опонам двора:

37:17  и столпы их четыри, и стояла их четыри медяна, и петли их сребряны, и главицы их посребрены сребром:

37:18  и вси колки двора около медяны, и тии посребрены сребром.

37:19  И сие сочинение скинии свидения, якоже заповедано бысть Моисею, служению быти левитов чрез Ифамара сына Аароня иереа:

37:20  и Веселеил, сын Уриев, от племене Иудина, сотвори, якоже заповеда Господь Моисею,

37:21  и Елиав, сын Ахисамахов, от племене Данова, иже созидаше тканыя вещи и швеныя и пестрыя, еже ткати из червленицы и виссона.