Kapingamarangi - Ezekiel - 37

37:1  Au gu-longono di mogobuna mahi o Dimaadua, gei dono Hagataalunga gaa-dagi au gaa-dugu au i-di gowaa baba dela dono gelegele guu-gahu go nia iwi.

37:2  Mee gaa-dagi au gi-nia gowaa huogodoo i-di gowaa baba deelaa. Au gu-gidee nia iwi logowaahee, gei nia maa gu-maangooakii.

37:3  Mee ga-helekai-mai, “Kooe go tangada-dangada, nia iwi aanei le e-mee di-mouli labelaa?” Au ga-helekai, “Meenei Tagi go Yihowah, Kooe hua dela e-iloo di mee deenaa.”

37:4  Mee ga-helekai-mai, “Helekai gi-nia iwi aanei. Hai gi-nia iwi maangoo aanei bolo digaula gi-hagalongo gi nnelekai Dimaadua.

37:5  Helekai gi digaula bolo Au, go Tagi go Yihowah, e-helekai gi digaula boloo: Au gaa-hai goodou gii-mee di-dogidogi, gaa-hai goodou gi-mouli labelaa.

37:6  Au ga-gowadu gi goodou nia uga mono goneiga, gaa-hii goodou gi-di gili. Au ga-dugu-adu gi goodou di mouli gii-mee goodou di-dogidogi ge gi-mouli labelaa, gei-ogo goodou ga-iloo-laa bolo Au dela go Yihowah.”

37:7  Gei au gu-hagi-anga gi digaula nnelekai a-Maa ne-helekai-mai. Dogu madagoaa nogo helehelekai iei-au, au ga-longono di lee o-nia iwi ala gu-haga-punipuni-mai.

37:8  Dogu madagoaa dela e-mmada gi-nia maa, nia uga mono goneiga ga-kila-aga i-hongo nia iwi, ga-nomuli-hua gei nia gili o digaula ga-kila-mai. Gei deai di-nadau mouli i nadau baahi ai.

37:9  Dimaadua ga-helekai-mai, “Kooe go tangada-dangada, helekai gi-di madangi. Helekai bolo Au go Tagi go Yihowah, gu-helekai bolo di madangi gi-hanimoi i-nia baahi e-haa o henuailala, ge gi-wanga-ina di togi gi-nia huaidina mmade aanei, ge gi-haga-mouli-ina digaula.”

37:10  Gei au guu-hai agu helekai ala ne-hagi-mai go Mee. Di madangi dogidogi gu-ulu gi-lodo nia huaidina aanei, gei digaula gu-mouli guu-tuu gi-nua. Togologo o-nia daangada aalaa le e-logo, guu-dohu di hagabuulinga-dauwa.

37:11  Dimaadua ga-helekai-mai, “Kooe go tangada-dangada, goe gi-iloo bolo digau Israel le e-hai gadoo be nia iwi aanei. Digaula e-helehelekai bolo ginaadou gu-maangoo guu-tugi i-nia iwi, gu-hagalee di-nadau hagadagadagagee ai, gei-ogo digaula gu-deai nadau mouli maalia ai.

37:12  Malaa, helekai gi agu daangada go Israel bolo Au, go Tagi go Yihowah, Au gaa-huge nadau daalunga, ga-haga-mouli-aga digaula, ga-laha-mai gi-di guongo go Israel.

37:13  Gei di madagoaa dela ga-huge-ai nia daalunga o agu daangada ala e-danu, ga-haga-mouli-aga digaula, gei digaula ga-modongoohia bolo ma ko-Au go Dimaadua.

37:14  Au gaa-hai digaula gii-dogi, gaa-hai digaula gi-mouli, ga-haga-noho digaula i nadau guongo donu. Gei digaula ga-iloo-laa bolo ma ko-Au go Dimaadua. Au gu-hagababa bolo Au gaa-hai di mee deenei, gei Au e-hai gi-haga-gila-aga! Ko-Au go Dimaadua dela ne-helekai.”

37:15  Dimaadua ga-helekai-mai,

37:16  “Kooe go tangada-dangada, kae-ina di laubaba, hihia gi-nonua boloo: Di guongo go Judah. Nomuli kae-ina labelaa tuai laubaba, hihia gi-nonua boloo: Di guongo go Israel.

37:17  Daahia nia laubaba e-lua aalaa gi-di gowaa e-dahi gii-hai be-di laubaba e-dahi.

37:18  Di madagoaa digau o do guongo ga-tangi-adu bolo gi-haga-modongoohia-ina gi ginaadou di hai deenei,

37:19  gei goe ga-haga-modongoohia gi digaula bolo ma ko-Au, go Tagi go Yihowah, gaa-daa di baahi laubaba dela e-haga-modongoohia bolo Israel, ga-nneennagi gi-di baahi laubaba dela e-haga-modongoohia bolo Judah. Malaa, nia baahi laubaba e-lua aanei gaa-kumi ko-Au gi-di gowaa e-dahi, gaa-hai di baahi laubaba hua e-dahi, ga-daahi ko-Au gi dogu lima.

37:20  “Daahia-aga nia baahi laubaba e-lua ala ne-hihi kooe nonua, heia nia daangada gi-gidee nia maa.

37:21  Helekai gi digaula bolo ma ko-Au, go Tagi go Yihowah, ga-laha-mai digau Israel gi-daha mo nadau gowaa ala ne-hula ginai. Au ga-haga-dagabuli-mai digaula, gaa-lahi digaula gi nadau gowaa donu.

37:22  Au gaa-hai digaula gii-hai tenua hua e-dahi i-lodo di-nadau henua, mo i-tomo nia gonduu o Israel. Digaula gaa-hai-hua di-nadau king e-dahi dela e-dagi ginaadou. Digaula ga-hagalee hai nia henua e-lua.

37:23  Digaula ga-hagalee haga-gulugulua ginaadou gi-nia ada balu-ieidu, be e-hagahuaidu ginaadou gi-nia haihai huaidu, gei Au gaa-daa digaula gi-daha mo nia hagadilinga huaidu huogodoo mo nadau de-hagalongo-mai. Au ga-haga-madammaa digaula, gaa-hai digaula nia daangada ni-aagu, gei Au gaa-hai di God ni digaula.

37:24  Dahi King dela e-hai be dagu dangada hai-hegau go David dela gaa-hai di-nadau king. Digaula huogodoo gaa-buni i-lala di-nadau King hua e-dahi, ga-manawa-dahi e-hagalongo gi agu haganoho.

37:25  Digaula gaa-noho i-lodo tenua dela ne-wanga ko-Au gi dagu hege go Jacob, di gowaa dela nogo noho-ai nadau maadua-mmaadua. Digaula gaa-noho i-di gowaa deelaa mo nadau dama mo nadau hagadili gi-muli gaa-hana-hua beelaa. Di King dela e-hai be dagu dangada hai-hegau go David gaa-dagi digaula gaa-hana-hua beelaa.

37:26  Au gaa-hai dagu hagababa gi digaula, di mee dela e-hai di hagamau o di-nadau mouli i-di aumaalia gaa-hana-hua beelaa. Au ga-haga-noho digaula, ge ga-haga-dogologowaahee digaula, ge ga-haga-duu dogu Hale Daumaha i-lodo tenua digaula gaa-hana-hua beelaa.

37:27  Au gaa-noho i-golo madalia digaula, gaa-hai di God ni digaula, gei digaula gaa-hai nia daangada ni-aagu.

37:28  Di madagoaa dela ga-haga-duu-ai dogu Hale Daumaha belee madalia digaula gaa-hana-hua beelaa, deenei di madagoaa nia guongo ala i-golo ga-iloo-ginaadou bolo ma dela ko-Au go Dimaadua, dela ne-hili-aga a Israel belee hai nia daangada ni-aagu.”