Kapingamarangi - II Samuel - 12

12:1  Dimaadua ga-hagau a soukohp Nathan gi David. Malaa, Nathan gaa-hana gi David, ga-helekai gi mee, “Nia daane dogolua i-lodo dahi waahale. Tangada e-dahi i meemaa e-maluagina, gei tangada dela i-golo le e-hagaloale.

12:2  Taane maluagina la ana siibi mono kau e-logo,

12:3  gei tangada hagaloale la dana siibi hua e-dahi, dela-hua dana mee ne-hui, e-benebene ge e-haga-tomo-aga i-lodo dono hale i-baahi ana dama. E-haangai go mee gi hunu meegai o ana meegai, e-haga-inu go mee gi ana ibu-inuinu, ge e-haga-ulungi i dono lima. E-hai go mee be tama-ahina ni-aana.

12:4  Dahi dangada ga-hanimoi gi-di hale tangada maluagina, gei taane maluagina deelaa hagalee hiihai e-daaligi di manu i ana manu donu bolo e-hai dana hagamiami gi tangada dela ne-hanimoi. Mee gaa-daa tama-siibi tangada hagaloale, ga-daaligi, gaa-hai-ai dana hagamiami gi tangada dela ne-hanimoi gi dono hale.”

12:5  David ne-longono-ia di mee deenei, gu-hagawelewele huoloo gi taane maluagina deelaa, ga-helekai gi Nathan boloo, “Au e-hagamodu adu gi-di-goe i-di ingoo o Dimaadua dela e-mouli, bolo taane dela ne-hai beenei, e-humalia-hua e-daaligi gii-made!

12:6  Mee la-gi-huia nia holongo haga-haa laa-hongo dana mee dela ne-kae i dana hagadilinga ngalungalua hagamuamua dela ne-hai.”

12:7  Nathan ga-helekai gi David boloo, “Ma kooe dela go taane deelaa, gei Dimaadua go di God o Israel e-helekai boloo, ‘Au gu-hagatulu goe e-hai di king o digau Israel, gei Au gu-haga-dagaloaha goe gi-daha mo Saul.

12:8  Au gu-gowadu gi-di-goe tenua o-maa mo nia lodo o-maa, guu-hai goe gii-hai di king o Israel mo Judah. Maa nei bolo di mee deenei la digi dohu, Au ga-gowadu labelaa nia mee llauehe ge humalia e-haga-uda haga-lua gi-nonua.

12:9  Goe e-aha dela gu-haga-balumee agu haganoho? Goe e-aha dela-hua guu-hai di huaidu deenei i-mua ogu golomada? Goe dela gu-daaligi a Uriah i-lodo tauwa, goe gu-dumaalia a-mee gi digau Ammon bolo gi-daaligi gii-made, gei goe gaa-kae di lodo o-maa ga-hai-lodo ginai!

12:10  Malaa, deenei-laa, hunu gau i-lodo nia adu-daangada o digau o doo hale gaa-mmade huaidu, mai i dau hai huaidu e-haga-balumee Au, gaa-kae di lodo o Uriah, ga-hai-lodo ginai.

12:11  Au e-hai dagu hagamodu bolo tangada i digau o doo hale ga-dugu-adu do haingadaa gi-di-goe. Goe la-ga-gidee dagu mee dela gaa-hai, ga-daa gi-daha oo lodo gaa-wanga gi tangada i-golo, gi-heia ginai di hiihai o taga-hai-lodo i-di laangi maalama.

12:12  Goe guu-hai hagammuni di mee deenei, gei Au gaa-hai di-maa i-di laangi madammaa i-mua digau Israel huogodoo.’ ”

12:13  Nomuli gei David ga-helekai-adu gi Nathan, “Au guu-hai dagu huaidu gi Dimaadua.” Gei Nathan ga-helekai gi mee, “Dimaadua la-gu-dumaalia-adu o huaidu, goe hagalee made.

12:14  Gei di-maa kooe dela ne-haga-balumee di dabuaahia o Dimaadua i dau hai deenei ne-hai, dau dama dela gu-haanau le e-made.”

12:15  Gei Nathan gaa-hana gi dono hale. Dimaadua gaa-hai di tama di lodo Uriah dela ne-hai go David gii-magi huoloo.

12:16  David ga-dangidangi ang-gi God gi-dumaalia di tama le e-hai gii-hili dono magi, gei mee hagalee miami. Nia boo huogodoo David e-hana gi-lodo dono hale gaa-kii-hua i-hongo di baba.

12:17  Digau aamua o dono hale gaa-hula gi mee belee hai a-mee gi-du-gi-nua gi-daha mo hongo di baba, gei mee e-dehei-eia digaula, mee gu-hagalee miami dalia digaula.

12:18  Muli-hua nia laangi e-hidu, gei di tama deelaa la-guu-made. Gei-ogo digau hai-hegau David gu-mmaadagu di haga-iloo gi mee di made o-di tama. Digaula ga-helehelekai i nadau mehanga boloo, “Di madagoaa di tama la-nogo mouli, mee nogo dehei-eia gidaadou, malaa, gidaadou la-ga-helekai gi mee behee i-di tama dela guu-made? Mee e-mee-hua di hai dana mee huaidu ang-gi deia!”

12:19  David gaa-mmada gi ana gau hai-hegau i nadau helehelekai haga-moolee, ga-iloo-ia-hua bolo di tama la-guu-made. Mee ga-heeu-adu gi digaula boloo, “Di tama la-guu-made?” Digaula ga-helekai, “Uaa, guu-made.”

12:20  David ga-duu-aga gi-daha mo hongo di baba o-di hale, ga-gaugau, gaa-dala dono libogo, ga-liagi ono gahu gaa-hana gi-lodo di Hale Daumaha e-daumaha. I-muli dono daumaha, gei mee gaa-hana gi dono hale, gaa-hai gi digaula bolo gi-hagatogomaalia-ina dono hagangudu, ga-noho-adu gi teebele ga-miami.

12:21  Ana gau aamua ga-helekai gi mee boloo, “Meenei, gimaadou digi iloo-loo di mee dela ne-hai. I-di madagoaa nogo mouli-ai di tama, goe nogo dangidangi, gei nogo hagaonge. Dolomeenei gei goe gu-duu-aga-hua, gu-miami i-muli di made o-di tama!”

12:22  David ga-helekai gi digaula, “Ma e-donu. Au nogo hagaonge ge dangidangi i-di madagoaa nogo mouli-ai di tama. Au nogo hagamaanadu bolo Dimaadua la-ga-hila-mai ga-hagalee hai di tama la-gii-made.

12:23  Gei mee dela guu-made dolomeenei, au e-hagaonge eiaha? Au e-mee di-haga-mouli labelaa a-mee? Dahi laangi-hua, gei au gaa-hana gi-di gowaa dela e-noho-iei mee, gei mee e-deemee di-hanimoi gi-di-au.”

12:24  David ga-haga-manawa lamalia dono lodo go Bathsheba, ga-haga-puni ginaua di hai o taga-hai-lodo, gei di ahina la-ga-haanau dana dama-daane. David gaa-wanga dono ingoo go Solomon, gei Dimaadua gu-aloho i tama deelaa,

12:25  gaa-hai gi soukohp Nathan bolo gi-wanga-ina di ingoo o-maa go Jedidiah, idimaa Dimaadua dela e-aloho huoloo i mee.

12:26  Joab e-heebagi gi Rabbah, di waahale damana o Ammon, hoohoo bolo ga-haga-magedaa digaula.

12:27  Gei mee ga-hagau ana gau kae hegau gi David ga-haga-iloo, “Au gu-heebagi gi-di waahale o Rabbah, guu-kumi di-nadau gowaa dugu wai.

12:28  Dolomeenei gei goe gi-hagatogomaalia-ina au gau-dauwa ala ne-dubu i-golo, gi-heebagi gi-di waahale deelaa, gi-haga-magedaa digaula go kooe, i-di-au hagalee hiihai e-kae ogu danggee i-di haga-magedaa di waahale deelaa.”

12:29  Malaa, David ga-hagabudu-mai ana gau-dauwa, ga-heebagi gi Rabbah, ga-haga-magedaa di waahale deelaa.

12:30  David ga-daa gi-daha di hau goolo dela i-hongo di libogo o Molech, di balu-ieidu o digau Ammon, dela dono daamaha holongo nia pauna e-madahidu maa-lima (75) mo dono hadu hagalabagau i no-lodo. David gaa-kae di hadu hagalabagau deelaa, gaa-wanga gi dono hau. Gei mee guu-kae labelaa nia goloo e-logowaahee ala ne-kumi i-di waahale deelaa,

12:31  gaa-hai digau o-di guongo deelaa gi-hai-hegau gi towaa, nia dogi mono dalai, gaa-hai digaula gi-heia nia hadu hau-hale, gaa-hai labelaa beelaa gi digau o-nia waahale ala i-golo o Ammon. Nomuli, gei mee mo ana gau-dauwa gaa-hula gi-muli gi Jerusalem.