Pohnpeian - Job - 29

29:1  Sohp pwurehng tapihada koasoi Sohp

29:2  I ahpw men ei mour en pwuralahng mahs, ni ahnsou me Koht kin ketin sinsile ie.

29:3  Koht ketiket rehi ahnsowo oh ketikihong ie marain ni ei weweidwei nan rotorot.

29:4  Iei ni rahn pwuko me I paiamwahu oh kalahngan en Koht sinsile imwei.

29:5  Koht Wasa Lapalahpie ketin ieiang ie ahnsowo oh ei tungoal seri kan kapikapil ie.

29:6  Ei tungoal kou oh kuht kan kihda milik laud, oh ei tuhkehn olip kan wosada wasa takain kan.

29:7  Ni ahnsou me mah kan kin tuhpene nan kahnimwo, oh I kin mwohndiong nanpwungarail,

29:8  mwahnakapw akan kin keisang mwohi ni ar kin kilang ie, oh me mah kan kin kasalehda ar waunekin ie.

29:9  Kaunen aramas ako pahn kin tokedihsang ar koasoi;

29:10  pil me keieu lapalap ako kin nennenla.

29:11  Koaros me kilang oh rong duwen ngehi kin koasoakoasoia duwen mwahu kan me I wiadahr.

29:12  Ni ahnsou me semwehmwe kan peki sawas, I sewese irail; I sewese me sepwoupwou kan me sohte sawasaparail.

29:13  Aramas akan me mihla nan apwal mwuledek, kapinga ie, oh I rapahkihong liohdi kan sawasaparail.

29:14  I wia mwekid pwung oh pahrek ahnsou koaros.

29:15  Ngehi me wia mesen me maskun kan, oh nehn me nehtuk kan.

29:16  I rasehng sahm emen rehn me semwehmwe kan oh uhpalihki mehn liki kan me milahr nan apwal.

29:17  I kauwehla manaman en aramas lemei kan oh doarehla me re kahpwalihalahr kan.

29:18  I kasik me ei mour pahn reirei oh I pahn mehla nan imwei ni nsenamwahu.

29:19  I rasehng tuhke pwoat me kalowe kan kin kelemwur ahnsou koaros, oh pwoaik kin kalamwur rah kan.

29:20  Aramas koaros kin kapikapinga ie ahnsou koaros, oh ei kehl sohte kin ohla.

29:21  Ni ei kihda kaweid, aramas akan kin nennenla oh rong mwahu dahme I patohwanda;

29:22  re sohte kin kapatahiong mehkot ni ei kin kaimwisekala ei pato kan. Ei pato kan kin lel irail rasehng dingiding en keteu;

29:23  koaros kin pwungki ei pato kan rasehng soumwet kan ar kin perenda ahnsoun keteu.

29:24  I kin sirei ong irail ni eh kin sohla ar koapworopwor; ei mesen nsenamwahu kin kakehlahda kapehdirail.

29:25  I kin ale pwukoa oh koasoanehdi wie lamalam akan; I kahluwa irail rasehng nanmwarki men me kin kahluwa sapwellime sounpei kan, oh kansenamwawihirailla nan ar pwunod.