CSlElizabeth - Luke - 17

17:1  Рече же ко учеником Своим: не возможно есть не приити соблазном, горе же, егоже ради приходят:

17:2  унее ему было бы, аще жернов оселский облежал бы о выи его, и ввержен в море, неже да соблазнит от малых сих единаго.

17:3  Внемлите себе. Аще согрешит к тебе брат твой, запрети ему: и аще покается, остави ему:

17:4  и аще седмищи на день согрешит к тебе и седмищи на день обратится, глаголя: каюся: остави ему.

17:5  И рекоша Апостоли Господеви: приложи нам веру.

17:6  Рече же Господь: аще бысте имели веру яко зерно горушно, глаголали бысте убо ягодичине сей: восторгнися и всадися в море: и послушала бы вас.

17:7  Который же от вас раба имея орюща или пасуща, иже пришедшу ему с села речет: абие минув возлязи?

17:8  Но не речет ли ему: уготовай, что вечеряю, и препоясався служи ми, дондеже ям и пию: и потом яси и пиеши ты?

17:9  Еда имать хвалу рабу тому, яко сотвори повеленная? Не мню.

17:10  Тако и вы, егда сотворите вся повеленная вам, глаголите, яко раби неключими есмы: яко, еже должни бехом сотворити, сотворихом.

17:11  И бысть идущу Ему во Иерусалим, и той прохождаше между Самариею и Галилеею.

17:12  Входящу же Ему в некую весь, сретоша Его десять прокаженных мужей, иже сташа издалеча:

17:13  и тии вознесоша глас, глаголюще: Иисусе Наставниче, помилуй ны.

17:14  И видев рече им: шедше покажитеся священником. И бысть идущым им, очистишася.

17:15  Един же от них, видев, яко изцеле, возвратися, со гласом велиим славя Бога,

17:16  и паде ниц при ногу Его, хвалу Ему воздая: и той бе Самарянин.

17:17  Отвещав же Иисус рече: не десять ли очистишася? Да девять где?

17:18  Како не обретошася возвращшеся дати славу Богу, токмо иноплеменник сей?

17:19  И рече ему: востав иди: вера твоя спасе тя.

17:20  Вопрошен же быв от фарисей, когда приидет Царствие Божие, отвещав им рече: не приидет Царствие Божие с соблюдением:

17:21  ниже рекут: се зде, или: онде. Се бо, Царствие Божие внутрь вас есть.

17:22  Рече же ко учеником (Своим): приидут дние, егда вожделеете единаго дне Сына Человеческаго видети, и не узрите:

17:23  и рекут вам: се зде, или: се, онде: не изыдите, ни пожените:

17:24  яко бо молния блистающися от поднебесныя на поднебесней светится: тако будет Сын Человеческий в день Свой.

17:25  Прежде же подобает Ему много пострадати и искушену быти от рода сего.

17:26  И якоже бысть во дни Ноевы, тако будет и во дни Сына Человеческа:

17:27  ядяху, пияху, женяхуся, посягаху, до негоже дне вниде Ное в ковчег: и прииде потоп и погуби вся.

17:28  Такожде и якоже бысть во дни Лотовы: ядяху, пияху, куповаху, продаяху, саждаху, здаху:

17:29  в оньже день изыде Лот от Содомлян, одожди камык горящь и огнь с небесе и погуби вся:

17:30  по тому же будет и в день, в оньже Сын Человеческий явится.

17:31  В той день, иже будет на крове, и сосуди его в дому, да не слазит взяти их: и иже на селе, такожде да не возвратится вспять:

17:32  поминайте жену Лотову.

17:33  Иже аще взыщет душу свою спасти, погубит ю: и иже аще погубит ю, живит ю.

17:34  Глаголю вам: в ту нощь будета два на одре единем: един поемлется, а другий оставляется:

17:35  будете две вкупе мелюще: едина поемлется, а другая оставляется.

17:36  Два будета на селе: един поемлется, а другий оставляется.

17:37  И отвещавше глаголаша Ему: где, Господи? Он же рече им: идеже тело, тамо соберутся и орли.