CSlElizabeth - Luke - 6

6:1  Бысть же в субботу второпервую ити Ему сквозе сеяния: и восторгаху ученицы Его класы, и ядяху, стирающе руками.

6:2  Нецыи же от фарисей реша им: что творите, егоже не достоит творити в субботы?

6:3  И отвещав Иисус рече к ним: ни ли сего чли есте, еже сотвори Давид, егда взалкася сам и иже с ним бяху?

6:4  Како вниде в дом Божий, и хлебы предложения взем, и яде, и даде и сущым с ним, ихже не достояше ясти, токмо единем иереем?

6:5  И глаголаше им, яко господь есть Сын Человеческий и субботе.

6:6  Бысть же и в другую субботу внити Ему в сонмище и учити: и бе тамо человек, и рука ему десная бе суха.

6:7  Назираху же книжницы и фарисее, аще в субботу изцелит, да обрящут речь Нань.

6:8  Он же ведяше помышления их и рече человеку имущему суху руку: востани и стани посреде. Он же востав ста.

6:9  Рече же Иисус к ним: вопрошу вы: что достоит в субботы, добро творити, или зло творити? Душу спасти, или погубити? Они же умолчаша.

6:10  И воззрев на всех их, рече ему: простри руку твою. Он же сотвори тако: и утвердися рука его здрава яко другая.

6:11  Они же исполнишася безумия и глаголаху друг ко другу, что быша сотворили Иисусови.

6:12  Бысть же во дни тыя, изыде в гору помолитися: и бе об нощь в молитве Божии.

6:13  И егда бысть день, призва ученики Своя: и избра от них дванадесяте, ихже и Апостолы нарече:

6:14  Симона, егоже именова Петра, и Андреа брата его, Иакова и Иоанна, Филиппа и Варфоломеа,

6:15  Матфеа и Фому, Иакова Алфеева и Симона нарицаемаго Зилота,

6:16  Иуду Иаковля, и Иуду Искариотскаго, иже и бысть предатель.

6:17  Изшед с ними, ста на месте равне: и народ ученик Его, и множество много людий от всея Иудеи и Иерусалима, и помория Тирска и Сидонска,

6:18  иже приидоша послушати Его и изцелитися от недуг своих, и страждущии от дух нечистых: и изцеляхуся.

6:19  И весь народ искаше прикасатися Ему: яко сила от Него исхождаше и изцеляше вся.

6:20  И Той возвед очи Свои на ученики Своя, глаголаше: блажени нищии духом: яко ваше есть Царствие Божие.

6:21  Блажени, алчущии ныне: яко насытитеся. Блажени, плачущии ныне: яко возсмеетеся.

6:22  Блажени будете, егда возненавидят вас человецы, и егда разлучат вы и поносят, и пронесут имя ваше яко зло, Сына Человеческаго ради.

6:23  Возрадуйтеся в той день и взыграйте: се бо, мзда ваша многа на небеси. По сим бо творяху пророком отцы их.

6:24  Обаче горе вам богатым: яко отстоите утешения вашего.

6:25  Горе вам, насыщеннии ныне: яко взалчете. Горе вам смеющымся ныне: яко возрыдаете и восплачете.

6:26  Горе, егда добре рекут вам вси человецы. По сим бо творяху лжепророком отцы их.

6:27  Но вам глаголю слышащым: любите враги вашя, добро творите ненавидящым вас,

6:28  благословите кленущыя вы, и молитеся за творящих вам обиду.

6:29  Биющему тя в ланиту, подаждь и другую: и от взимающаго ти ризу, и срачицу не возбрани.

6:30  Всякому же просящему у тебе дай: и от взимающаго твоя не истязуй.

6:31  И якоже хощете да творят вам человецы, и вы творите им такожде.

6:32  И аще любите любящыя вы, кая вам благодать есть? Ибо и грешницы любящыя их любят.

6:33  И аще благотворите благотворящым вам, кая вам благодать есть? Ибо и грешницы тожде творят.

6:34  И аще взаим даете, от нихже чаете восприяти, кая вам благодать есть, ибо и грешницы грешником взаим давают, да восприимут равная.

6:35  Обаче любите враги вашя, и благотворите, и взаим дайте, ничесоже чающе: и будет мзда ваша многа, и будете сынове Вышняго: яко Той благ есть на безблагодатныя и злыя.

6:36  Будите убо милосерди, якоже и Отец ваш милосерд есть.

6:37  И не судите, и не судят вам: (и) не осуждайте, да не осуждени будете: отпущайте, и отпустят вам:

6:38  дайте, и дастся вам: меру добру, наткану и потрясну и преливающуся дадят на лоно ваше: тою бо мерою, еюже мерите, возмерится вам.

6:39  Рече же притчу им: еда может слепец слепца водити? Не оба ли в яму впадетася?

6:40  Несть ученик над учителя своего: совершен же всяк будет, якоже и учитель его.

6:41  Что же видиши сучец, иже есть во очеси брата твоего, бервна же, еже есть во очеси твоем, не чуеши?

6:42  Или како можеши рещи брату твоему: брате, остави, да изму сучец, иже есть во очеси твоем, сам сущаго во очеси твоем бервна не видя? Лицемере, изми первее бервно из очесе твоего, и тогда прозриши изяти сучец из очесе брата твоего.

6:43  Несть бо древо добро, творя плода зла: ниже древо зло, творя плода добра.

6:44  Всяко бо древо от плода своего познается: не от терния бо чешут смоквы, ни от купины емлют гроздия.

6:45  Благий человек от благаго сокровища сердца своего износит благое: и злый человек от злаго сокровища сердца своего износит злое: от избытка бо сердца глаголют уста его.

6:46  Что же Мя зовете: Господи, Господи, и не творите, яже глаголю?

6:47  Всяк грядый ко Мне и слышай словеса Моя и творя я, скажу вам, кому есть подобен:

6:48  подобен есть человеку зиждущу храмину, иже ископа и углуби, и положи основание на камени: наводнению же бывшу, припаде река ко храмине той, и не може поколебати ея: основана бо бе на камени.

6:49  Слышавый же и не сотворивый подобен есть человеку создавшему храмину на земли без основания: к нейже припаде река, и абие падеся, и бысть разрушение храмины тоя велие.