Kekchi - Romans - 11

11:1  Tinpatzˈ e̱re, ¿ma xeˈtzˈekta̱na̱c laj Israel xban li Dios chi joˈcanan? ¡Chi ya̱l nak incˈaˈ! La̱in ajcuiˈ aj Israel la̱in ut la̱in ralal xcˈajol laj Benjamín ut laj Abraham.

11:2  Li Ka̱cuaˈ Dios incˈaˈ quixtzˈekta̱na lix tenamit, li quixsiqˈueb ru junxil chokˈ ralal xcˈajol. ¿Ma incˈaˈ nequenau cˈaˈru tzˈi̱banbil saˈ li Santil Hu chirix laj Elías nak quitijoc chiru li Dios chixjitbaleb laj Israel? Quixye:

11:3  At Ka̱cuaˈ, quilajeˈxcamsi la̱ profetas ut quilajeˈxjucˈ la̱ artal; la̱in xincana injunes ut joˈcan ajcuiˈ la̱in, teˈraj incamsinquil.

11:4  Li Dios quichakˈoc ut quixye re: Sicˈbileb ru inban cuukub mil chi cui̱nk chokˈ cue. Eb aˈan incˈaˈ queˈxcuikˈib ribeb chixlokˈoninquil li yi̱banbil dios aj Baal, chan.

11:5  Joˈcan ajcuiˈ saˈ eb li cutan aˈin. Cuan ajcuiˈ li quixsiqˈueb ru li Dios riqˈuin lix nimal ruxta̱n usta moco qˈuiheb ta.

11:6  Moco riqˈuin ta xyehom xba̱nuhomeb nak quixsiqˈueb ru. Yal riqˈuin ban lix nimal ruxta̱n li Dios nak quixsiqˈueb ru. Cui ta quixsiqˈueb ru saˈ xcˈabaˈ xyehom xba̱nuhomeb, aˈan ma̱cuaˈ raj chic xban xnimal ruxta̱n li Dios.

11:7  Nakaqˈue retal nak moco chixjunileb ta laj Israel queˈxtau rusilal li Dios li yo̱queb chixsicˈbal. Caˈaj cuiˈ li sicˈbileb ru queˈxtau, usta moco qˈui eb ta. Ut li jun chˈo̱l chic queˈcacuubresi̱c lix chˈo̱leb ut incˈaˈ queˈxba̱nu li quiraj li Dios.

11:8  Joˈcaˈin tzˈi̱banbil saˈ li Santil Hu: Queˈcanaba̱c xban li Dios joˈ eb li a̱leb xchˈo̱l li incˈaˈ nequeˈxtau xya̱lal. Cuanqueb xnakˈ ru ut incˈaˈ nequeˈril cˈaˈru li us. Cuanqueb xxic ut incˈaˈ nequeˈraj rabinquil lix ya̱lal. Chalen anakcuan incˈaˈ nequeˈraj xtaubal xya̱lal. (Is. 29:10)

11:9  Tzˈi̱banbil ajcuiˈ saˈ li Santil Hu li quixye laj David nak quitijoc: Eb li ninkˈe nequeˈxba̱nu chisukˈi̱k taxak chokˈ raylal saˈ xbe̱neb. Raylal taxak ta̱cha̱lk saˈ xbe̱neb re nak teˈxtoj rixeb lix ma̱queb li yo̱queb chixba̱nunquil.

11:10  Cheˈmo̱yk ta li xnakˈeb ru re nak incˈaˈ chic teˈilok, ut incˈaˈ teˈxtau xya̱lal. Cheˈcˈutzla̱k ta li rixeb chi junaj cua xban li raylal li yo̱keb chixcˈulbal. (Sal. 69:23)

11:11  La̱in ninye nak usta queˈxtich rib laj judío, incˈaˈ queˈtˈaneˈ chi junaj cua. Naraj naxye nak usta queˈxtzˈekta̱na li Cristo eb laj judío toj naru teˈpa̱ba̱nk ut teˈcolekˈ. Xban nak queˈxkˈet ra̱tin li Dios eb laj judío, joˈcan nak li colba-ib quiqˈueheˈ reheb li ma̱cuaˈeb aj judío re nak eb laj judío teˈxrahi ru li colba-ib ut teˈxpa̱b li Cristo.

11:12  Xban nak queˈxkˈet li ra̱tin li Dios eb laj judío, li rusilal li Dios quiqˈueheˈ reheb chixjunileb li cuanqueb saˈ ruchichˈochˈ. Reheb raj laj judío li osobtesi̱c, aban queˈxtzˈekta̱na. Joˈcan nak quiqˈueheˈ reheb li ma̱cuaˈeb aj judío. Ut kˈaxal cuiˈchic li sahil chˈo̱lejil takacˈul nak teˈpa̱ba̱nk lix qˈuialeb laj judío ut teˈqˈuehekˈ saˈ ajl saˈ kaya̱nk la̱o li ac colbilo.

11:13  Anakcuan tina̱tinak e̱riqˈuin la̱ex li ma̱cuaˈex aj judío. La̱in taklanbilin xban li Dios chixyebal resil li colba-ib e̱re. Ut ninqˈue xlokˈal lin cˈanjel.

11:14  Ma̱re chi joˈcan teˈyotˈekˈ xchˈo̱leb laj judío li cuech tenamitil ut teˈxpa̱b li Cristo joˈ xeba̱nu la̱ex ut teˈcolekˈ.

11:15  Xban nak queˈtzˈekta̱na̱c laj judío, li ma̱cuaˈeb aj judío queˈcˈameˈ saˈ usilal riqˈuin li Dios. Ut kˈaxal numtajenak li xlokˈal nak eb laj judío teˈcolekˈ. Chanchan teˈcuacli̱k chak chi yoˈyo saˈ xya̱nkeb li camenak.

11:16  Cui kˈaxtesinbil saˈ rukˈ li Dios li xbe̱n caxlan cua na-el, kˈaxtesinbil ajcuiˈ lix comon. Ut cui kˈaxtesinbil saˈ rukˈ li Dios lix xeˈ li cheˈ, kˈaxtesinbil ajcuiˈ chixjunil li rukˈ. Aˈin naraj naxye: Xban nak li Dios quixsicˈ ru laj Abraham, joˈcan nak sicˈbil ajcuiˈ ruheb li ralal xcˈajol.

11:17  Texinjuntakˈe̱ta riqˈuin li cheˈ olivo. Eb laj judío chanchan li cha̱bil cheˈ aubil ut chˈolaninbil chi us. Aban cuan li rukˈ qui-isi̱c ut aˈan retalil eb laj judío li queˈtzˈekta̱nan re li Cristo. Ut la̱ex li ma̱cuaˈex aj judío chanchanex li rukˈ li cheˈ li moco aubil ta. Yal xjunes quimok chak. Ut anakcuan yo̱quex chi tzˈako̱nc riqˈuin li usilal li quiyechiˈi̱c re laj Abraham xban li Dios.

11:18  Joˈcan nak mexnumta chiru li rukˈ li cheˈ li queˈisi̱c xban nak la̱ex yal rukˈex ajcuiˈ li cheˈ. Chenauhak nak moco la̱ex ta nequexqˈuehoc xyuˈam lix xeˈ li cheˈ, aban lix xeˈ naqˈuehoc e̱yuˈam la̱ex.

11:19  Ma̱re te̱ye la̱ex, queˈisi̱c li rukˈ li cheˈ re nak la̱o toletzekˈ saˈ xnaˈajeb.

11:20  Ya̱l ajcuiˈ nequeye, aban xban nak incˈaˈ nequeˈpa̱ban joˈcan nak queˈisi̱c. Ut la̱ex chic quexletzeˈ saˈ xnaˈajeb aˈan xban nak nequexpa̱ban. Joˈcan nak chexucua ru li Dios ut me̱nimobresi e̱rib.

11:21  Cui li Dios quirisi eb laj judío, li tzˈakal rukˈ li cheˈ, ¿ma tojaˈ ta chic la̱ex incˈaˈ texrisi cui incˈaˈ texpa̱ba̱nk?

11:22  Cheqˈuehak retal nak kˈaxal cha̱bil li Dios, abanan najoskˈoˈ ajcuiˈ saˈ xbe̱neb li nequeˈtzˈekta̱nan re li Cristo. Riqˈuin cacuil a̱tin narakoc a̱tin saˈ xbe̱neb li nequeˈkˈetoc re li ra̱tin. Cha̱bilak e̱riqˈuin la̱ex cui texcua̱nk junelic saˈ li rusilal. Cui incˈaˈ nequexcuan saˈ li rusilal tex-isi̱k ajcuiˈ la̱ex.

11:23  Joˈcan nak cui eb laj judío teˈpa̱ba̱nk, eb aˈan teˈletzekˈ cuiˈchic saˈ lix to̱naleb. Li Dios nim xcuanquil chixcˈulbaleb cuiˈchic ut chixcuybal lix ma̱queb.

11:24  La̱ex ma̱cuaˈex aj judío, nequexinjuntakˈe̱ta riqˈuin li cheˈ olivo li yal quimok chak. Quex-isi̱c riqˈuin li cheˈ aˈan ut quexletzeˈ saˈ li aubil cheˈ. Eb laj judío nequebinjuntakˈe̱ta riqˈuin li tzˈakal rukˈ li cheˈ olivo li aubil. Incˈaˈ chˈaˈaj nak teˈletzekˈ cuiˈchic xban li Dios riqˈuin li aubil cheˈ xban nak aˈaneb tzˈakal rukˈ li cheˈ.

11:25  Ex herma̱n, nacuaj nak te̱nau jun li naˈleb mukmu nak quicuan, li quicˈutbesi̱c chak xya̱lal chicuu. Cui te̱nau aˈin incˈaˈ te̱nimobresi e̱rib riqˈuin xcˈoxlanquil nak cuan e̱naˈleb. Eb laj judío li incˈaˈ queˈpa̱ban queˈcacuubresi̱c lix chˈo̱leb. Abanan eb aˈan teˈpa̱ba̱nk ajcuiˈ nak talajeˈpa̱ba̱nk lix qˈuialeb li ma̱cuaˈeb aj judío.

11:26  Joˈcan nak teˈcolekˈ chixjunileb laj Israel joˈ tzˈi̱banbil retalil saˈ li Santil Hu li quixye li Dios: Aran Sión ta̱cha̱lk chak laj Colonel ut aˈan tixcuy xma̱queb li ralal xcˈajol laj Israel. (Is. 59:20-21)

11:27  Ut la̱in tincuyeb xma̱c joˈ quinye reheb nak quinqˈue li contrato reheb junxil. (Is. 27:9)

11:28  Xban nak eb laj judío queˈxtzˈekta̱na li colba-ib, moco cuanqueb ta saˈ usilal riqˈuin li Dios. Aˈan quicˈulman re nak texpa̱ba̱nk la̱ex li ma̱cuaˈex aj judío. Abanan li Dios naxraheb laj judío saˈ xcˈabaˈeb lix xeˈto̱nil yucuaˈeb xban nak eb aˈan ac sicˈbileb chak ru xban li Dios.

11:29  Li Dios incˈaˈ naxjal xcˈaˈux riqˈuin li cˈaˈru naxyechiˈi ke, chi moco naxjal xcˈaˈux nak quixsicˈ ku.

11:30  Ut la̱ex, li ma̱cuaˈex aj judío, la̱ex aj kˈetol ra̱tin li Dios nak quexcuan chak. Ut eb laj judío queˈxkˈet ajcuiˈ chak ra̱tin li Dios. Joˈcan nak la̱ex chic x-uxta̱na̱c e̱ru xban li Dios.

11:31  Eb laj judío queˈxkˈet chak ra̱tin li Dios. Abanan ta̱cuulak xkˈehil nak teˈpa̱ba̱nk ut teˈuxta̱na̱k ajcuiˈ ruheb xban li Dios joˈ nak x-uxta̱na̱c e̱ru la̱ex.

11:32  Li Dios quiril nak chixjunileb li cuanqueb saˈ ruchichˈochˈ aj ma̱queb. Joˈcan nak quixcanabeb chixba̱nunquil lix ma̱usilaleb xbaneb lix kˈetba a̱tin. Aban toj cuan ajcuiˈ ruxta̱n li Dios saˈ xbe̱neb.

11:33  Relic chi ya̱l nak kˈaxal numtajenak li ruxta̱n li Dios. Aˈan naxnau chixjunil. Numtajenak cuiˈchic lix naˈleb. Ma̱ ani nataˈoc ru chanru nak narakoc a̱tin. Ut ma̱ ani nataˈoc ru li naxba̱nu.

11:34  Joˈcaˈin tzˈi̱banbil saˈ li Santil Hu: Ma̱ ani nanaˈoc re xcˈaˈux li Ka̱cuaˈ. Ma̱ ani naru naqˈuehoc xnaˈleb. (Is. 40:13-14)

11:35  Ma̱ ani naru naqˈuehoc cˈaˈru re li Dios re nak ta̱qˈuehekˈ ta cuiˈchic re̱kaj re xban li Dios. (Job 35:7; 41:11)

11:36  Chixjunil li cˈaˈ re ru cuan, riqˈuin li Dios nachal chak. Li Dios quiyi̱ban re chixjunil ut aˈan aj e̱chal re chixjunil. Lokˈoninbil taxak li Ka̱cuaˈ Dios chi junelic kˈe cutan. Joˈcan taxak.