CSlElizabeth - Sirach - 48

48:1  И воста Илиа пророк яко огнь, и слово его яко свеща горяше:

48:2  иже нанесе на ня глад и ревностию своею умали я,

48:3  словом Господним удержа небо и сведе тако трижды огнь с небесе.

48:4  Коль прославился еси, Илие, чудесы твоими, и кто подобен тебе похвалитися?

48:5  Воздвигнув мертвеца от смерти и из ада словом Вышняго,

48:6  сведый цари в пагубу и прославленныя от одра их,

48:7  слышавый в Синаи обличение и в Хориве судбы отмщения,

48:8  помазуяй цари на воздаяние и пророки преемники по себе,

48:9  взявыйся вихром огненным на колеснице коней огненных,

48:10  вписан во обличения на времена, утолити гнев прежде ярости и обратити сердце отчее к сыну и устроити колена Иаковля.

48:11  Блажени видевшии тя и любовию украшеннии.

48:12  Ибо мы житием поживем.

48:13  Илиа, иже вихром покровен бысть, и Елиссей исполнися духа его и во дни своя не поколебася от князей, и не преможе его никтоже:

48:14  всяко слово не превзыде его, и во успении пророчествова тело его:

48:15  и в житии своем сотвори чудеса, и во умертвии дивна дела его.

48:16  Во всех сих не покаяшася людие и не отступиша от грех своих, дондеже пленени быша от земли своея и расточени быша по всей земли.

48:17  И остася людий мало, и князь в дому Давидове.

48:18  Нецыи убо от них сотвориша угодное, нецыи же умножиша грехи.

48:19  Езекиа утверди град свой и введе посреде его воду: ископа железом камень и созда источники водам.

48:20  Во днех его взыде Сеннахирим и посла Рапсака, и воздвиже руку свою на Сиона и возвеличися гордынею своею.

48:21  Тогда подвигошася сердца и руце их, и поболеша яко раждающыя.

48:22  И помолишася Господу милостивому, воздевше руки своя к Нему:

48:23  и Святый с небесе скоро услыша я и избави я рукою Исаииною:

48:24  порази полки Ассирийския, и сокруши я Ангел Его.

48:25  Сотвори бо Езекиа угодное Господеви и укрепися на путех Давида отца своего, яже заповеда Исаиа, пророк велий и верен в видении своем.

48:26  Во днех его воспятися солнце, и приложи жития цареви:

48:27  духом велиим виде последняя и утеши сетующыя в Сионе:

48:28  даже до века показа будущая и сокровеная, прежде неже приити им.