CSlElizabeth - Sirach - 43

43:1  Слава высоты, твердь чистоты, зрак небесе в видении славы.

43:2  Солнце во явлении возвещающее во исходе сосуд дивен, дело Вышняго.

43:3  В полудни своем изсушает страну, и прямо вару его кто постоит?

43:4  (Аки) пещь дышущее в делех вара, трегубо солнце пожигающее горы: воскурения огненная издышущее и простирающее лучи омрачает очи.

43:5  Велий Господь сотворивый е, и словесы Своими ускори шествие.

43:6  И луна всем во свое время являет лета и знамение века.

43:7  От луны знамение праздника: светило умаляющееся до конца.

43:8  Месяц по имени своему есть, возрастающь дивно во изменении.

43:9  Сосуд ополчений на высоте, на тверди небесней сияющь.

43:10  Доброта небесе, слава звезд, красота светящися на высоких Господних:

43:11  словесы Святаго станут по чину и не имут ослабети в стражбах своих.

43:12  Виждь дугу и благослови Сотворшаго ю, зело прекрасна сиянием своим:

43:13  окружи небо окружением славы, руце Вышняго простросте ю.

43:14  Повелением Его потщася снег, и ускоряет молнию судбою Своею.

43:15  Сего ради отверзошася сокровища, и парят облацы яко птицы.

43:16  Величием Своим укрепи облаки, и сокрушишася камение градное:

43:17  и воззрением Его подвижутся горы, и волею Его возвеет юг.

43:18  Глас грома Его порази землю, и буря северова и вихорь ветра.

43:19  Яко птицы парящыя сыплет снег, и якоже прузи садящиися спадения его.

43:20  Доброте белости его подивится око, и о дожди его ужаснется сердце.

43:21  И слану яко соль на землю сыплет, и смерзшися бывает на концы остра.

43:22  Студен ветр северный возвеет, и смерзнется лед от воды: на всяцем собрании воднем обитати имать, и аки во броню облечется вода.

43:23  Пояст горы и пустыни пожжет, и угасит траву яко огнь.

43:24  Изцеление всех со тщанием мгла: роса сретающая от вара утишит.

43:25  Мыслию его преста бездна, и насади в ней (Господь) островы.

43:26  Плавающии по морю поведают бедство его, и слухом ушес наших чудимся,

43:27  и тамо (суть) преславна и чудна дела его, различие всякаго животнаго, создание китов.

43:28  Им благополучный конец свой получают и словом Его составляются всяческая.

43:29  Много имамы рещи, и не имамы постигнути, и скончание словес: все есть Той.

43:30  Славяще Его где укрепимся? Той бо велик паче всех дел Своих:

43:31  страшен Господь и велик зело, и чудно могутство Его.

43:32  Славяще Господа вознесите, елико аще можете, превзыдет бо и еще:

43:33  возносяще Его умножитеся крепостию: не трудитеся, не имате бо постигнути.

43:34  Кто виде Его и исповесть? И кто возвеличит Его, якоже есть?

43:35  Многа сокровена суть вящшая сих: малая бо видехом дел Его.

43:36  Вся бо сотвори Господь и благочестивым даде премудрость.