CSlElizabeth - Sirach - 17

17:1  Господь созда от земли человека, и паки возврати его в ню.

17:2  Дни числа и время даде им, и даде им власть над сущими на ней.

17:3  Якоже они сами, облече их крепостию, и по образу Своему сотвори я:

17:4  и положи страх его на всяцей плоти, еже властелствовати зверьми (и скоты) и птицами.

17:5  Помышление и язык и очи, уши и сердце даде им размышляти:

17:6  художеством разума исполни я и добрая и злая показа им.

17:7  Положил есть око Свое на сердцах их, показати им величество дел Своих,

17:8  да имя святыни Его восхвалят и да поведают величества дел Его.

17:9  Приложил им художество и закон живота даде в наследие им.

17:10  Завет вечный постави с ними и судбы Своя показа им.

17:11  Величество славы видеша очеса их, и славу гласа их слыша ухо их.

17:12  И рече им: внемлите от всякия неправды. И заповеда им комуждо о искреннем.

17:13  Путие их пред Ним выну, не укрыются от очию Его.

17:14  Комуждо языку устроил вожда,

17:15  и часть Господня Израиль есть.

17:16  Вся дела их яко солнце пред Ним, и очи Его выну на путех их:

17:17  не укрышася неправды их от Него, и вси греси их пред Господем.

17:18  Милостыня мужа яко печать с Ним, и благодать человечу яко зеницу соблюдет.

17:19  По сих востанет и воздаст им, и воздаяние их на главу их воздаст:

17:20  обаче кающымся дал есть возвращение и утеши изнемогающих терпением.

17:21  Обратися убо ко Господу и остави грехи:

17:22  помолися пред лицем и умали претыкания:

17:23  восходи к Вышнему и отвратися от неправды, и зело возненавиди мерзость.

17:24  Вышняго кто восхвалит во аде, вместо живых и дающих исповедание?

17:25  От мертвеца яко ничто сущаго погибает исповедание:

17:26  живый же и здравый восхвалит Господа.

17:27  Коль велика милость Господня и очищение обращающымся к Нему?

17:28  Не могут бо вся быти в человецех:

17:29  яко не безсмертен сын человеческий.

17:30  Что светлее солнца? И то изчезает: и зло помыслит плоть и кровь.

17:31  Силу высоты небесныя Той Сам назирает, человецы же вси земля и пепел.