CSlElizabeth - Sirach - 38

38:1  Почитай врача противу потреб честию его, ибо Господь созда его:

38:2  от Вышняго бо есть изцеление, и от царя приимет дар.

38:3  Художество врача вознесет главу его, и пред вельможами удивимь будет.

38:4  Господь созда от земли врачевания, и муж мудрый не возгнушается ими.

38:5  Не от древа ли осладися вода, да познана будет сила Его?

38:6  И Той дал есть художество человеком, да славится в чудесех Своих:

38:7  теми уврачева и отят болезни их.

38:8  Мироварец сими состроит смешение, и не скончаются дела его, и мир от него есть на лицы земли.

38:9  Чадо, в болезни твоей не презирай, но молися Господеви, и Той тя изцелит:

38:10  отступи от прегрешения и направи руце, и от всякаго греха очисти сердце (твое):

38:11  даждь благоухание и память семидала и умасти приношение, акибы не первее приносяй:

38:12  и даждь место врачу, Господь бо его созда: и да не удалится от тебе, потребен бо ти есть.

38:13  Есть время, егда в руку его благоухание:

38:14  ибо и тии Господеви молятся, да управит им покой и изцеление ради оздравления.

38:15  Согрешаяй пред Сотворшим его впадет в руце врачу.

38:16  Чадо, над мертвецем источи слезы и якоже зле страждущь начни плачь: и якоже достоит ему, соскутай тело его и не презри погребения его.

38:17  Горек сотвори плачь и рыдание тепло, и сотвори сетование, якоже ему достоит, день един и два хуления ради, и утешися печали ради:

38:18  от печали бо смерть бывает, и печаль сердечная слячет крепость.

38:19  В нанесении пребывает и печаль, и житие нищаго в сердцы.

38:20  Не даждь в печаль сердца твоего, остави ю помянув последняя.

38:21  Не забуди, несть бо возвращения: и ему пользы не сотвориши, и себе озлобиши.

38:22  Помяни суд Его, яко сице и твой: мне вчера, а тебе днесь.

38:23  В покои мертвеца упокой память его, и утешися о нем во исходе духа его.

38:24  Премудрость книжника во благовремении празднества, и умаляяйся деянием своим упремудрится.

38:25  Чим умудрится держай орало и хваляйся остном, гоняй волы и обращаяйся в делех их, и повесть его в сынех юнчих?

38:26  Сердце свое даст возрыти бразды, и бдение его на насыщениих юниц.

38:27  Тако всяк древоделя и архитектон, иже нощи яко дни провождает, делая изваяния печатей, и прилежание его изменити различие:

38:28  сердце свое даст уподобити живописание, и бдение его еже совершити дело.

38:29  Такожде и ковачь седя близ наковални и соглядаяй дело железа: курение огня удручит тело его, и теплотою пещи утрудится:

38:30  глас млата обновит ухо его, и прямо подобию сосуда очи его:

38:31  сердце свое вдаст на скончание дел, и бдение его украсити до конца.

38:32  Такожде и скудельник седя на деле своем и вертя ногама своима коло,

38:33  иже в печали лежит выну на деле своем, изчисляемо все делание его:

38:34  мышцею своею вообразит брение и пред ногама преклонит крепость его:

38:35  сердце свое вдаст скончати сосуд, и бдение его очистити пещь.

38:36  Вси сии на руки своя надеются, и кийждо в деле своем умудряется.

38:37  Без тех не населится град, и не вселятся, ни походят и в соборище не возмутся:

38:38  на престоле же судий не сядут и завета суду не размыслят, ниже имут извещати наказания и суда, и в притчах не обрящутся:

38:39  но токмо зданием житейским прилежат, и моление их в делании художества.