Geez - Deuteronomy - 4

4:1  ወይእዜኒ ፡ እስራኤል ፡ ስምዑ ፡ ኵነኔሁ ፡ ወፍትሖ ፡ ዛእሜህረክሙ ፡ አነ ፡ ዮም ፡ ከመ ፡ ትግበሩ ፡ ወትኅየው ፡ ወትትባዝኁ ፡ ወትባኡ ፡ ወትትዋረስዋ ፡ ለምድር ፡ እንተ ፡ ይሁበክሙ ፡ እግዚአብሔር ፡ አምላኮሙ ፡ ለአበዊክሙ ።

4:2  ኢትወስኩ ፡ ላዕለ ፡ ቃል ፡ ዘእኤዝዘክሙ ፡ አነ ፡ ዮም ፡ ወኢትንትጉ ፡ እምኔሁ ፡ ከመ ፡ ትዕቀቡ ፡ ኵሎ ፡ ትእዛዞ ፡ ለእግዚአብሔር ፡ አምላክክሙ ።

4:3  አዕይንቲክሙ ፡ ርእያ ፡ ኵሎ ፡ ዘገብረ ፡ እግዚአብሔር ፡ አምላክነ ፡ በብዔል ፡ ፌጎር ፡ እስመ ፡ ኵሉ ፡ ብእሲ ፡ ዘሖረ ፡ ድኅሬሁ ፡ ለብዔል ፡ ፌጎር ፡ ቀጥቀጦ ፡ እግዚአብሔር ፡ አምላክክሙ ፡ እምኔክሙ ።

4:4  ወአንትሙሰ ፡ እለ ፡ ገባእክሙ ፡ ኀበ ፡ እግዚአብሔር ፡ አምላክክሙ ፡ ሕያው ፡ ኵልክሙ ፡ ዮም ።

4:5  ናሁ ፡ ርእዩ ፡ ዘአርአይኩክሙ ፡ ኵነኔ ፡ ወፍትሐ ፡ በከመ ፡ አዘዘኒ ፡ እግዚአብሔር ፡ እግበር ፡ ከማሁ ፡ በምድር ፡ እንተ ፡ ትበውኡ ፡ ህየ ፡ አንትሙ ፡ ከመ ፡ ትትዋረስዋ ።

4:6  ወዕቀብዎ ፡ ወግበርዎ ፡ እስመ ፡ ውእቱ ፡ ጥበብክሙ ፡ ወአእምሮትክሙ ፡ በቅድመ ፡ ኵሉ ፡ አሕዛብ ፡ እለ ፡ ይሰምዕዎ ፡ ለዝንቱ ፡ ኵሉ ፡ ኵነኔ ፡ ወይብሉ ፡ ናሁ ፡ ሕዝብ ፡ ጠቢብ ፡ ወማእምር ፡ ሕዝብ ፡ ዐቢይ ፡ ውእቱ ፡ ዝንቱ ።

4:7  ወመኑ ፡ ውእቱ ፡ ሕዝብ ፡ ዐቢይ ፡ ዘቦቱ ፡ አምላከ ፡ ዘይቀርቦ ፡ ከመ ፡ አምላክነ ፡ እግዚአብሔር ፡ በኵሉ ፡ ዘጸዋዕናሁ ።

4:8  ወመኑ ፡ ውእቱ ፡ ሕዝብ ፡ ዐቢይ ፡ ዘቦቱ ፡ ኵነኔ ፡ ወፍትሐ ፡ ዘጽድቅ ፡ በከመ ፡ ዝንቱ ፡ ኵሉ ፡ ሕግ ፡ ዘአነ ፡ እሁበክሙ ፡ ዮም ፡ ቅድሜክሙ ።

4:9  ዑቅ ፡ ርእሰከ ፡ ወዕቀብ ፡ ነፍሰከ ፡ ጥቀ ፡ ከመ ፡ ኢትርሳዕ ፡ ኵሎ ፡ ዘንተ ፡ ነገረ ፡ ዘርእያ ፡ አዕይንቲከ ፡ ወኢይፃእ ፡ እምነ ፡ ልብከ ፡ በኵሉ ፡ መዋዕለ ፡ ሕይወትከ ፡ ወማህሮሙ ፡ ለደቂቅከ ፡ ወለደቂቀ ፡ ደቂቅከ ።

4:10  ወአይድዖሙ ፡ ዕለተ ፡ ቆምክሙ ፡ ቅድመ ፡ እግዚአብሔር ፡ አምላክክሙ ፡ በኮሬብ ፡ አመ ፡ ዕለተ ፡ ተጋባእክሙ ፡ እስመ ፡ ይቤለኒ ፡ እግዚአብሔር ፡ አስተጋብኦሙ ፡ ለሕዝብ ፡ ኀቤየ ፡ ወይስምዑ ፡ ቃልየ ፡ ከመ ፡ ይት[መ]ሀሩ ፡ ፈሪሆትየ ፡ በኵሉ ፡ መዋዕል ፡ እለ ፡ ቦንቱ ፡ የሐይው ፡ እሙንቱ ፡ ላዕለ ፡ ምድር ፡ ወይሜህሩ ፡ ለደቂቆሙ ።

4:11  ወመጻእክሙ ፡ ወቆምክሙ ፡ ታሕተ ፡ ደብር ፡ ወይነድድ ፡ ደብሩ ፡ በእሳት ፡ እስከ ፡ ሰማይ ፡ ወጽልመት ፡ ወዐውሎ ፡ ወጣቃ ።

4:12  ወነበበኒ ፡ እግዚአብሔር ፡ እምነ ፡ ማእከለ ፡ እሳት ፡ ወሰማዕክሙ ፡ አንትሙ ፡ ቃሎ ፡ እንዘ ፡ ይትናገር ፡ ወርእየቶሰ ፡ ኢርኢክሙ ፡ ዘእንበለ ፡ ቃሎ ።

4:13  ወአይድዐክሙ ፡ ኪዳኖ ፡ ዘአዘዘክሙ ፡ ከመ ፡ ትግበሩ ፡ ዐሥሩ ፡ ቃለ ፡ ወጸሐፎን ፡ ውስተ ፡ ክልኤቲ ፡ ጽላት ፡ ዘእብን ።

4:14  ወሊተኒ ፡ አዘዘኒ ፡ እግዚአብሔር ፡ ከመ ፡ እምህርክሙ ፡ በውእቶን ፡ መዋዕል ፡ ኵነኔ ፡ ወፍትሐ ፡ ዘትገብሩ ፡ ላዕለ ፡ ምድር ፡ እንተ ፡ ውስቴታ ፡ ትበውኡ ፡ አንትሙ ፡ ትትዋረስዋ ።

4:15  ወዕቀቡ ፡ ጥቀ ፡ ነፍሰክሙ ፡ እስመ ፡ ኢርኢክሙ ፡ ርእየቶ ፡ በይእቲ ፡ ዕለት ፡ እንተ ፡ ባቲ ፡ ተናገረክሙ ፡ እግዚአብሔር ፡ በኮሬብ ፡ በውስተ ፡ ደብር ፡ እምነ ፡ ማእከለ ፡ እሳት ።

4:16  ወኢትጌግዩ ፡ ወኢትግበሩ ፡ ለክሙ ፡ ግልፎ ፡ በአምሳለ ፡ ኵለ ፡ ምስል ፡ በአምሳለ ፡ ተባዕት ፡ አው ፡ ዘአንስት ፤

4:17  በአምሳለ ፡ ኵሉ ፡ እንስሳ ፡ ዘሀለወ ፡ ላዕለ ፡ ምድር ፡ ወበአምሳለ ፡ ኵሉ ፡ ዖፍ ፡ ሠራሪት ፡ ዘይሠርር ፡ መትሕተ ፡ ሰማይ ፤

4:18  ወበአምሳለ ፡ ኵሉ ፡ ሕያው ፡ ዘይትኀወስ ፡ ላዕለ ፡ ምድር ፡ ወበአምሳለ ፡ ኵሉ ፡ ዐሣ ፡ ዘሀለወ ፡ ውስተ ፡ ማይ ፡ መትሕተ ፡ ምድር ።

4:19  ወለእመ ፡ ነጸርከ ፡ ሰማየ ፡ ወርኢከ ፡ ፀሐየ ፡ ወወርኀ ፡ ወከዋክብተ ፡ ወኵሎ ፡ ሰርጓቲሃ ፡ ለሰማይ ፡ ዮጊ ፡ ትጌጊ ፡ ወትሰግድ ፡ ሎሙ ፡ ወታመልኮሙ ፡ ለእለ ፡ ገብረ ፡ እግዚአብሔር ፡ አምላክከ ፡ ለኵሉ ፡ አሕዛብ ፡ ዘታሕተ ፡ ሰማይ ።

4:20  ወኪያክሙሰ ፡ ነሥአክሙ ፡ እግዚአብሔር ፡ ወአውፅአክሙ ፡ እምነ ፡ እቶነ ፡ ኀፂን ፡ እምነ ፡ ግብጽ ፡ ከመ ፡ ትኩንዎ ፡ መክፈልተ ፡ ሕዝቡ ፡ እስከ ፡ ዛቲ ፡ ዕለት ።

4:21  ውተምዕዐኒ ፡ እግዚአብሔር ፡ በእንተ ፡ ዘትቤሉ ፡ አንትሙ ፡ ወመሐለ ፡ ከመ ፡ ኢይዕድዎ ፡ ለዝንቱ ፡ ዮርዳንስ ፡ ከመ ፡ ኢይባእ ፡ ውስተ ፡ ምድር ፡ እንተ ፡ ይሁበከ ፡ እግዚአብሔር ፡ አምላክከ ፡ ርስተ ።

4:22  እስመ ፡ አንሰ ፡ እመውት ፡ በዛቲ ፡ ምድር ፡ ወኢየዐድዎ ፡ ለዮርዳንስ ፡ ወአንትሙሰ ፡ ተዐድው ፡ ወትወርስዋ ፡ ለይእቲ ፡ ምድር ፡ ቡርክት ።

4:23  ወዑቁ ፡ እንከ ፡ አንትሙ ፡ ኢትርስዑ ፡ ኪዳኖ ፡ ለእግዚአብሔር ፡ አምላክክሙ ፡ ዘተካየደ ፡ ምስሌክሙ ፡ ወአበስክሙ ፡ ወገበርክሙ ፡ ለክሙ ፡ ግልፎ ፡ በአምሳለ ፡ ኵሉ ፡ ዘበእንቲአሁ ፡ ቀሠፈከ ፡ እግዚአብሔር ፡ አምላክከ ።

4:24  እስመ ፡ እግዚአብሔር ፡ አምላክከ ፡ እሳት ፡ እንተ ፡ ታኀልቅ ፡ ውእቱ ፡ ወአምላክ ፡ ቀናኢ ፡ ውእቱ ።

4:25  ለእመ ፡ ወለድከ ፡ ደቂቀ ፡ ወአዋልደ ፡ ወደቂቀ ፡ ደቂቅከ ፡ ወጐንደይክሙ ፡ ላዕለ ፡ ምድር ፡ ወአበስክሙ ፡ ወገበርክሙ ፡ ለክሙ ፡ በአምሳለ ፡ ኵሉ ፡ ወገበርክሙ ፡ እኪተ ፡ ቅድመ ፡ እግዚአብሔር ፡ አምላክክሙ ፡ ከመ ፡ ታምዕዕዎ ፤

4:26  ናሁ ፡ ኣሰምዕ ፡ ላዕሌክሙ ፡ ሰማየ ፡ ወምድረ ፡ [ከመ ፡] ትጠፍኡ ፡ ወትዶመሰሴ ፡ እምነ ፡ ምድር ፡ እንተ ፡ ውስቴታ ፡ አንትሙ ፡ ተዐድውዎ ፡ ለዮርዳንስ ፡ ህየ ፡ ከመ ፡ ትትዋረስዋ ፡ ወኢትጐነድዩ ፡ መዋዕለ ፡ ውስቴታ ፡ አላ ፡ ተቀጥቅጦ ፡ ትትቀጠቀጡ ።

4:27  ወይዘርወክሙ ፡ እግዚአብሔር ፡ ውስተ ፡ ኵሉ ፡ አሕዛብ ፡ ወትተርፉ ፡ ውኁዳ[ነ] ፡ በኍልቍ ፡ ውስተ ፡ አሕዛብ ፡ እለ ፡ ውስቴቶሙ ፡ ያበውአክሙ ፡ እግዚአብሔር ፡ ህየ ።

4:28  ወታመልኩ ፡ በህየ ፡ አማልክተ ፡ ባዕድ ፡ ግብረ ፡ እደ ፡ እጓለ ፡ እመሕያው ፡ ዕፀወ ፡ ወእበነ ፡ እለ ፡ ኢያሬእዩ ፡ ወኢይሰምዑ ፡ ወኢይበልዑ ፡ ወኢያጼንው ።

4:29  ወእምዝ ፡ ተኀሥሥዎ ፡ ለእግዚአብሔር ፡ አምላክክሙ ፡ በህየ ፡ ወትረክብዎ ፡ ሶበ ፡ ኀሠሥክምዎ ፡ በኵሉ ፡ ልብክሙ ፡ ወበኵሉ ፡ ነፍስክሙ ፡ በሕማምክሙ ።

4:30  ወይረክበክሙ ፡ ኵሉ ፡ ዝንቱ ፡ ነገር ፡ በደኃሪ ፡ መዋዕል ፡ ወትትመየጡ ፡ ኀበ ፡ እግዚአብሔር ፡ አምላክክሙ ፡ ወይሰምዐክሙ ።

4:31  እስመ ፡ አምላክ ፡ መሓሪ ፡ ውእቱ ፡ እግዚአብሔር ፡ አምላክከ ፡ ኢየኀድገከ ፡ ወኢያጠፍአከ ፡ ወኢይረስዕ ፡ ኪዳኖሙ ፡ ለአበዊከ ፡ ዘመሐለ ፡ ሎሙ ፡ እግዚአብሔር ።

4:32  ተሰአሉ ፡ ዘቀዲሙ ፡ መዋዕለ ፡ ዘኮነ ፡ እምቅድሜከ ፡ እምአመ ፡ ፈጠሮ ፡ እግዚአብሔር ፡ ለእጓለ ፡ እመሕያው ፡ ዲበ ፡ ምድር ፡ እምጽንፈ ፡ ሰማይ ፡ እስከ ፡ ጽንፈ ፡ ሰማይ ፡ ለእመ ፡ ኮነ ፡ ከመ ፡ ዝንቱ ፡ ነገር ፡ ወለእመ ፡ ኮነ ፡ ከመዝ ፤

4:33  ወለእመ ፡ ሰምዐ ፡ ሕዝብ ፡ ቃለ ፡ እግዚአብሔር ፡ አምላክ ፡ ዘሕያው ፡ እንዘ ፡ ይትናገር ፡ እምነ ፡ ማእከለ ፡ እሳት ፡ በከመ ፡ ሰማዕከ ፡ አንተ ፡ ወሐየውከ ፤

4:34  ለእመ ፡ አመከረ ፡ እግዚአብሔር ፡ ወቦአ ፡ ወነሥአ ፡ ሎቱ ፡ ሕዝበ ፡ እምነ ፡ ማእከለ ፡ ሕዝብ ፡ በአመክሮ ፡ ወበተአምር ፡ ወበመድምም ፡ ወበቀትል ፡ ወበእድ ፡ ጽንዕት ፡ ወበመዝራዕት ፡ ልዑል ፡ ወበመደንግፅ ፡ ዐበይት ፡ በከመ ፡ ኵሉ ፡ ዘገብረ ፡ እግዚአብሔር ፡ በምድረ ፡ ግብጽ ፡ በቅድሜከ ፡ እንዘ ፡ ትሬኢ ፤

4:35  ከመ ፡ ታእምር ፡ ከመ ፡ ውእቱ ፡ እግዚአብሔር ፡ አምላክ ፡ ወአልቦ ፡ ባዕደ ፡ እንበሌሁ ።

4:36  እምሰማይ ፡ ተሰምዐ ፡ ቃሉ ፡ ከመ ፡ ይማህርከ ፡ ወበምድር ፡ አርአየ ፡ እሳቶ ፡ ዐባየ ፡ ወሰማዕከ ፡ ቃሎ ፡ እምነ ፡ ማእከለ ፡ እሳት ።

4:37  እስመ ፡ ያፈቅሮሙ ፡ ለአበዊከ ፡ ወኀርዮሙ ፡ ለዘርኦሙ ፡ እምድኅሬሆሙ ፡ ኪያክሙ ፡ እምኵሉ ፡ አሕዛብ ፡ ወአውፅአከ ፡ ውእቱ ፡ በኀይሉ ፡ ዐቢይ ፡ እምነ ፡ ግብጽ ፤

4:38  ከመ ፡ ያጥፍኦሙ ፡ ለአሕዛብ ፡ ዐበይት ፡ ወጽኑዓን ፡ እምቅድመ ፡ ገጽከ ፡ ከመ ፡ ያብእከ ፡ ወየሀብከ ፡ ምድሮሙ ፡ ትረሳ ፡ በከመ ፡ ሀለውከ ፡ ዮም ።

4:39  ወታአምር ፡ ዮም ፡ ከመ ፡ ውእቱ ፡ እግዚአብሔር ፡ አምላክ ፡ ውእቱ ፡ እግዚአብሔር ፡ በሰማይ ፡ በላዕሉ ፡ ወበምድር ፡ በታሕቱ ፡ ወአልቦ ፡ ባዕደ ፡ እንበሌሁ ።

4:40  ወዕቀቡ ፡ ኵነኔሁ ፡ ወትእዛዞ ፡ ዘእኤዝዘክሙ ፡ አነ ፡ ዮም ፡ ከመ ፡ ሠናይ ፡ ይኩንክሙ ፡ ወለውሉድክሙሂ ፡ እምድኅሬክሙ ፡ ከመ ፡ ይኑኅ ፡ መዋዕሊክሙ ፡ ውስተ ፡ ምድር ፡ እንተ ፡ ይሁበከ ፡ እግዚአብሔር ፡ አምላክከ ፡ በኵሉ ፡ መዋዕል ።

4:41  ወይእተ ፡ አሚረ ፡ ፈለጠ ፡ ሙሴ ፡ ሠላሰ ፡ አህጉረ ፡ በማዕዶተ ፡ ዮርዳንስ ፡ በመንገለ ፡ ሠረቀ ፡ ፀሐይ ፤

4:42  ከመ ፡ ይስኪ ፡ ህየ ፡ ቀታሊ ፡ ዘቀተለ ፡ ካልኦ ፡ እንዘ ፡ ኢያአምር ፡ ወኢኮነ ፡ ጸላኢሁ ፡ ትካት ፡ ወይስኪ ፡ ውስተ ፡ አሐቲ ፡ እምእላንቱ ፡ አህጉር ፡ ወየሐዩ ፤

4:43  ቦሶር ፡ በውስተ ፡ ገዳም ፡ ውስተ ፡ ምድረ ፡ ሐቅል ፡ ለሮቤል ፡ ወራሞት ፡ በገላአድ ፡ ለጋድ ፡ ወአውሎን ፡ በባሳን ፡ ለምናሴ ።

4:44  ዝንቱ ፡ ውእቱ ፡ ሕግ ፡ ዘአዘዞሙ ፡ ሙሴ ፡ በቅድሜሆሙ ፡ ለደቂቀ ፡ እስራኤል ።

4:45  ወዝንቱ ፡ ውእቱ ፡ ትእዛዝ ፡ ወኵነኔ ፡ ወፍትሕ ፡ ኵሉ ፡ ዘነገሮሙ ፡ ሙሴ ፡ ለደቂቀ ፡ እስራኤል ፡ በገዳም ፡ ወፂኦሙ ፡ እምነ ፡ ምድረ ፡ ግብጽ ፤

4:46  በማዕዶተ ፡ ዮርዳንስ ፡ በቈላት ፡ ዘቅሩበ ፡ ቤተ ፡ ፌጎር ፡ በምድረ ፡ ሴዎን ፡ ንጉሠ ፡ አሞሬዎን ፡ ዘይነብር ፡ ውስተ ፡ ሔሴቦን ፡ ዘቀተለ ፡ ሙሴ ፡ ወደቂቀ ፡ እስራኤል ፡ ወፂኦሙ ፡ እምነ ፡ ምድረ ፡ ግብጽ ።

4:47  ወተወርሱ ፡ ምድሮ ፡ ወምድረ ፡ አግሂ ፡ ንጉሠ ፡ ባሳን ፡ ክልኤቱ ፡ ነገሥተ ፡ አሞሬዎን ፡ እለ ፡ ይነብሩ ፡ ማዕዶተ ፡ ዮርዳንስ ፡ መንገለ ፡ ሠረቀ ፡ ፀሐይ ፤

4:48  እምአሮኤር ፡ እንተ ፡ ማዕዶተ ፡ ፈለገ ፡ አርኖን ፡ እስከ ፡ ደብረ ፡ ሴዎን ፡ ዘኤርሞን ፤

4:49  ኵሉ ፡ አራባ ፡ ዘማዕዶተ ፡ ዮርዳንስ ፡ ዘመንገለ ፡ ምሥራቀ ፡ ፀሐይ ፡ ዘመትሕተ ፡ አሴዶን ፡ ዘቦ ፡ መንደቀ ።